چئویرن: ایشیق
ترجمه: ایشیق
ایشیق

چای دادیندا کوکاکولا
محمود مهدوی

«حامد احمدی»‌یه

آینالاردا اؤلموشدو حامد؛ زئرزمی‌نین دیوارلارینا دؤشه‌دیگیمیز آینالاردا. هفته‌اینن یئرآلما زمیسی‌نده ایشله‌ییب، پولوموزلا اؤزوموز بویدا آینا آلدیق. آینالاری گتیریب قالدیغیمیز زئرزمی‌نین دیوارینداکی زاوارلارا سالدیق. حمید سقف‌دن آسلانمیش بوکس کیسه‌سینی یوموروقلادی. یورولوب اَلی‌نین دالی‌لا ترینی سیلدی. سو ایچدی. حامد سیقار فیسقیرتدی؛ من کیسه‌نی یوموروقلادیم. حمید یئرینده دایانیب تؤوشونو دَردی. حامد سیقار داماغیندا کیسه‌‌یه یاخینلاشیب، ساغدان سولدان یوموروقلادی. من دالا چکیلدیم. نم‌هاردان آینالارا ایشیق دوشدو. آینالار ایشیغی قایتاردی گؤزوموزه. حامد توستونو کیسه‌یه پیله‌دی. بالاجا ایشیق آینالاردا اوینادی. کیسه اؤز باشینا فیرلاندی. بیز ده میداندا گیجلدیک. یئرآلماچیلارلا چنه ووروب گئتدیک آراللی کندینه. گون چیخمامیشدان تریلی‌نین دالیندا یئر اوستونه چاتاناجان بیر- بیریمیزی یوموروقلادیق. حامدین قیچیندان یاپیشدیق. او آشا- آشا آیاغا دوروب بُر سسله اوخودو: «یئل یاتار طوفان یاتار یاتماز تراختور بایراغی.» یئر ییه‌سی فرمان دالیندا چارتلاق آینادا بیزه باخیب باشینی توولادی. او بیزی تراختور دالیندا آپاریردی اؤز یئرآلما زمیسی‌نه. آخشاماجان یئرآلما دؤشوردوک، بئلله‌دیک. آخشام اوستو یئر یئیه‌سی وئردیگی نئچه استانبیل یئرآلمانی تزه‌میداندا ساتیب پولونو وئردیک حامده. حامد تلسه- تلسه سو قویدو. قینه‌جه‌یین ایستی سویوق سو حاضیرلادی. تؤکدوم باشینی یودو. قورولادی. اووجونا یاغ ووروب چکدی باشینا. باشینی دارادی. ساعاتینا باخیب دئدی: «چاتارام. هله واخت وار.» قاپی‌یا چیخماق همن سسینی ائشیتدیک: «دربست!» او تراختورون اویونونا باخماغا گؤره قاچدی تبریزه. دئییردی: «استادیومدا (داغلاری سؤکر تراختور) دئین‌ده روحوم بدنیمدن چیخیر.
حامد تبریزدن قاییداندان سونرا سسی توتولموشدو. او داغ‌سو ایچدی. ‌حسرت‌له اَلیمیزده‌کی رنگلی چایا باخدی. آنجاق تراختور گئتدی لیگین بیرینجی دسته‌سینه. حامد بیزه خیرتده‌یه‌جن چای آلدی، کباب آلدی، سیقار آلدی. بیزی آپاردی کنده تراختورا میندیک، عکس سالدیردیق. تراختور سوردوک. تراختور جدول ده نیریلدایا- نیریلدایا یوخاری قالخدی. بیزده تلویزیونون قاباغیندا اویناقلادیق. حمید آتیلیب بوکس کیسه‌سینی قوجاقلادی. من یاخینلیغیمداکی ستونو. حامد ده دئییردی: «من ده بؤیرومده‌کینی قوجاقلادیم. طرفین سیبیلی‌نین توکو اوزومه باتجایین آیریلدیم. آنجاق او ترمینالاجان منیم دالیمجان گلدی.
کیسه حمیدین اَلیندن بوشلانیب اویناقلادی. بیر بیریمیزه شیللاق آتدیق. حامد آینالارا چای تعارف ائله‌دی. بیز یئرآلما یئدیک. آینادا تراختور عکسینی چکدیک. حامد بوکس کیسه‌سینی تومارلاییب اؤپدو. حمید بوکس کیسه‌سینی فیرلاتدی. کیسه قاباغیما گلجه‌یین اونو یوموروقلادیم. حامد تلسه- تلسه چای تؤکوب ایچدی. آغزی یاندی. تراختور نم‌نییه اودوزدو. حامد باغیردی. بیر هفته‌نین ایچینده، گئتدیگیمیز قفه‌‌لرین هامیسینا دوربین قویدولار. بیز چای‌دان قالخان بوخارا حسرت‌له باخدیق. حمید دئدی: «اؤزوم اؤلوم دای آخیر چایمیزدی بیردا ایچیوغ.»
اونون اوره‌یی یامان دولو ایدی. دوربین‌لر اولماسایدی قفه‌چی‌نین نه‌کی‌وارینی چال چؤیور ائله‌یردی. دئدیم: «دیلوو دیشده، بو نه سؤزدی. قفه یئیه‌سی گؤیلی ایسدئییب دوربین قویوب، بیزه نه؟»
حمید اَلینی ظرافت‌له استکانین بؤیورونه چکیب دئدی: «ائله قفه‌چی‌لرین هامیسی بیردن بو فیکره توشوب‌لر هَی؟ به نییه دوربین‌‌لرین سمتی بیز اوتوردوغوموز میزه طرفدی؟»
حامد سیقار داماغیندا فیکره گئتمیشدی. او، او حالدا سیقارینی کول قابی‌نین قیراغینا قویدو. چایینی نلبکی‌یه تؤکوب پیله‌ییب ایچدی. بیز اونا اَیری- اَیری باخیب حیرصیمیزدن سیقار آلیشدیردیق. بو اویون‌بازچیلیق‌لار بیزه یاراشمازدی. چایی قَینه‌‌یه- قَینه‌یه ایچمه‌سئیدیک داها گرک ییخیلیب اؤلئیدیک. حامد نلبکی‌یه یئنه چای تؤکوب، سویودوب، آغلایا- آغلایا بیزه دئدی: «دای قَینر چای باشیمیزا چکمه‌یین زمانی سووشدی.
من‌له حمید آغلامسییب دئدیک: «بیزی اؤلدور‌سه‌‌لر‌ ده ایلمانقی چای ایشمیه‌جیوغ.»
او حیرصلی حیرصلی دئدی: «بی دور و بروزه باخون سورا مَژمئی جیرون!»
بیز قورخودان باشیمیزی قالخیزمادیق. بیلیردیک سسیمیز اوجالان واخت دوربین بیزیم اوستوموزده دایانیر. اونا گؤره اَتیمیز کسیله- کسیله نلبکی‌ده سویوتدوغوموز ایلمانقی چایی آغزیمیزا طرف گتیردیک. دوربین قیژیلداییب، یالاندان قفه‌نین او بیری قیسمت‌لرینی دولانیب یئنه بیزیم اوستوموزده دایاندی. پؤرتوب قالمیشدیق. اوچوموزده نلبکینی دوداغیمیزا یاپیشدیردیق. ایلمانقی چای بوغازیمیزدان آشمیردی. حمید نلبکی‌نین قیراغینی خیرچیلتی‌لا دیشله‌دکی. او سسی ائشیتجه‌یین توکوموز بیز- بیز دوردو. من نلبکینی یئره چیرپماغا گؤره گؤیه قالخیزدیم. حامد گؤیده بیلنگیمدن یاپشیب دئدی: «اؤزونن چیخما!»
ائله او آن‌دا دوربین‌ین کؤلگه‌سی یاواشجیلی موزائیک‌دن سووشدو. اَلیم قورودو. دیش‌لریمی بیر- بیرینه قیسیب دئدیم: «گؤره‌سن اَلیم گؤیده اولاندا دوربین هارا دؤنمیشدی؟»
حامد سیقارینی سوموردو. دریندن نفس آلیب وئردیم. حمید حیرصیندن اَسیردی. حامد دئدی: «منه وئرن آللاه، بیلارا وئرن آللاه!»
منیم آدیم وحید ایدی. اوچوموزون‌ده آدیمیزین دؤرد حرفی واریدی. آنجاق تکجه حامدین الیفی اونو بیزدن آیریردی. شانس‌دان حامدین قدی من‌له حمیددن داها اوجا ایدی. هر زئرزمی‌ده‌کی قفه‌یه گئتسئیدیک، پیله‌لردن آشاغی توشجه‌یین قلیان توستوسونون ایچینده اَل اَله وئریب، بوش صندلی تاپیب اوتوروردوق. اَیلشمه‌میشدن قاباق حامد دوربین‌‌لرین یئرینی دئییردی. بیز پیچیلداییردیق: «بیردا گؤز گؤزو گؤرومور سن هاردان دوربین‌لری تاپدون؟»
او گوندن حامدی گؤرن اولمامیشدی. قارانلیقدا حمیدله اوتورموشوق. قفه‌لرده چای ایچیب اوندان بوندان سوروشوردوق حامدی گؤرن اولوب یا یوخ. ائشیتمیشدیک او نم هانسی توالتده لوت اویناییرمیش. بیز او آراداکی توالت‌لرین آیناسی‌نین قاباغیندا دایانیب میزیلداندیق: «اوینا گولوم اوینا… اوینا بالام اوینا…» بیری‌ده دئییردی: «او بیر خارابا قفه‌نین قاباغیندا ییخیلیب قالمیشدی.» بیز اونون سؤزونه اینانمادیق. شهرده قفه‌لریمیزین هامیسینی دوربین‌لر قوشولاندان بو یانا گول کیمی ائله‌میشدیلر. بیز حامدی هم آختاریردیق، همی ده گیزلدیردیک اونونلا یولداشیق. دوربین‌له دولو قفه‌نین قاپیسینی اوزوموزه باغلاسایدی‌لار، باغریمیز چارتلایاردی. بیر دفه ائشیتدیک حامد قفه‌لرین بیرینده چیخیب میزین اوستونه. پالتوسونون آلتیندان قارا اسپرینی چیخاردیب، دوربین‌ین شیشه‌سینی رنگ‌له‌ییب. بیری آند ایچیردی او لحظه‌ده قفه‌نین هاوا سوموران‌لاری سرعت‌له فیرلانیب توستونو سوموروبلار. قفه‌ده‌کی‌لر حامدی او حالدا گؤرجه‌یین تؤکولوبلر چؤله. قفه‌چی حامده یاخینلاشجایین حامد چیغیرا- چیغیرا دئمیش‌میش: «من تکم. منیم بو ایشده یولداشیم زادیم یوخدی. اسپری ده قنوودان تاپمیشام.»
قفه‌چی‌نین شه‌ییردی دئییردی قفه‌چی‌ده آغلایا آغلایا دئیب: «من‌ده تکم ائه بالا.» سونرا او گوشینی گؤتوروب تکجه گوشی دالیندا دئمیشدی: «قاچمئییب گلون.!»
هله بیری ده دئییردی «حامد قارا اسپری‌له او دوربینی رنگ‌له‌مه‌میشدن بیر گون قاباق، تبریزده تراختورون علیهینه توتدوغو خطایا گؤره، داورین گؤزونه آینایلا ایشیق سالمیشدی. او بیری تیمین طرفدارلاری دا حامدی ازیشیدیریب استادیومدان آتمیشدیلار چؤله.
زئرزمی‌نین پیلله‌سینده اوتورموشوق. قورتوم قورتوم چای ایچیریک. حمید بوکس کسیه‌سی‌نین سمتینه دونوخوب قالیب. ایکی سیقار آلیشدیریب، بیرینی اونا وئریرم. او بیری سیقاری دا دوداقلاریملا یاپیشیب قوللاب وورورام. سیقارین توستوسو گؤزومه دولمایینا گؤره گؤزومو قیییرام.
اوزونو گؤرمه‌دیگیمیز بیر نفر هره‌نین قاباغینا دارالانق نلبکی قویدو. نلبکی‌نین ده اوستونه استکانی قویوب یوخ اولدو. قلیان‌لار اطرافیمیزدا قورولداییردیلار. حامد دئییردی: توستو زاد اونا فرق ائله‌مز؛ الان او بیزیم اوستوموزده‌دی. ایچون یوخسا بو سویوق‌دا گلیب آتاللار چؤله!»
آینالاردا اؤلموشدو حامد. بیز قورخا- قورخا اونا یاخینلاشدیق. چارپایا اوستونه چیخیب اونو آشاغی گتیردیک. منیم اَلیم اَسیردی، حمیدین دیلی توتولموشدو. حامدی دوربین سیمی‌له آسمیشدیلار. اونون کیفینی‌ده قلیان شیلنگی‌له اَلینه باغلامیشدی‌لار. شیلنگی آچدیق. کیفین زیپینی‌ده آشجایین گؤردوک کیفینین ایچینده نئچه دنه دوربین وار. بیز او یان بو یانا باخا باخا دوربین‌لری یان یانا قویوب اونلارین قاباغیندا دوردوق. حمید تزه دم چای‌دان بیر استکان گتیریب قویدو دوربین‌لرین یانینا. چای‌دان بوخار قالخسادا دوربین‌لر قیژیلدامادی. بیزه طرف دؤنمه‌دی. من حمیددن گیزلین ذئهنیم ده دوربین‌لری یوموروقلادیم، تپیک‌له‌دیم، سیندیردیم، داغیتدیم، تؤکدوم توالته. جیبیم‌ده بیچاغیم اولسایدی شیشه‌لرینی‌ده جیزاردیم. یادیم‌دا دئییل بیزی کیم آلدادیب دئمیشدی: پیچاغوزی سیندیرون، یا دا آتون او یانا. بو نه وضعدی باشوزو دا دالا دارئیون.
حمید اَینیندن آغ کؤینگینی چیخارتدی. چیخارتدیغی کؤینک‌دن اَینینده ده واریدی. او اَلینده‌کی کؤینه‌یی اییله‌ییب وئردی منه. دئدی: حامدین کفنی.
کؤینه‌یی اییله‌ییب دئدیم: «بو کی، چای اییسی وئریر؟»
حمید دئدی: «حامد اؤزی بونون اوستونه چای تؤحمیشدی. دئییردی: قوی چورویه‌نه‌جن بیرنیمدا چای اییسی اولسین.»
حامدین اَینینده‌کی کؤینه‌یی چیخاردیب او کؤینه‌یی گئیدیردیک. یامان چای اییسی گلیردی. ایسته‌ییردیم اونون اَل‌لرینی سینه‌سی‌نین اوستونه قویام؛ بیردن اووجون‌دان تیکه آینا توشدو. آینانی گؤتوروب باخاندا گؤردوم اوستونو قارا رنگ‌له رنگ‌له‌ییب‌لر. اوره‌ییمدن سووشدو جومام دیوارداکی آینالاری قیریق- قیریق ائله‌ییم، آنجاق اؤزومو ساخلادیم. دئدیم: «بلکه آینادا بی دفه ده حامدی گؤره بیلدوغ. اونونلا چای ایچدوغ».
حامدین بؤیرونده اوزاندیم. حمید ده او بیری طرف‌ده اوزاندی. اوخودوم: «یئل یاتار طوفان یاتار…» حمید ده سسیمه سس وئردی: «یاتماز تراختور بایراغی.» نه قدر گؤزله‌دیک حامد یئریندن دورمادی. بیچاغی قویدوم حامدین اووجونا. حمید دئدی: «بی دا پیچاغ ایندی دور. هر کیمین اوزونه خط سالسون بیز اونی دوغرام- دوغرام ائله‌روغ. اصلا دئییرسن قفه‌چی‌لری بیر بیر گتیرغ بیرا سن باشدارین کس، بیز گؤزدرین چیخارداق. سن فقط دور.»
صاباحدان هئچ بیر قفه‌یه گئتمه‌دیک. حامدی آینالارین دالیندا باسدیردیق. بیچاغی نلبکی‌نین دالی‌لا ایتیلتدیک. کوکا کولا ایچدیک.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

چای دادیندا کوکاکولا / محمود مهدوی

ایشیق
www.ishiq.net

آذربایجان ادبیات و اینجه‌صنعت سایتی

چای دادیندا کوکاکولا / محمود مهدوی

ایشیق
www.ishiq.net

آذربایجان ادبیات و اینجه‌صنعت سایتی

چای دادیندا کوکاکولا / محمود مهدوی

ایشیق
www.ishiq.net

آذربایجان ادبیات و اینجه‌صنعت سایتی