شوشه قانادلی کپنک‌لر
حسین خوجالی
شوشه قانادلی کپنک‌لر پالچیقلی چیینیمده یوخلارکن، اوره‌ییمین باشیندان بیر سانجی قوپوب دوز ویردی کوره‌ییمین اورتاسینا. چیینیمده کی کپنک‌لر دیک آتیلیب اوچوشدولار. های قوپدو، هنده‌وریم دولدو. توزاناق قالخدی، خانا خبر وئردیلر. اسگی‌دن ده بو سانجیلار اوره‌ییمده، کوره‌ییمده اولموشدو؛ هنده‌وریم لاپ ایندییه تای دولوب بوشالمیشدی؛ قالماقال قورتولاندان سونرا هامی داغیلیشیب، یئنه شوشه قانادلی کپنک‌لر دؤنموشدولر.
سانجیم زامان-زامان آرتسادا کئچیجی اولاجاغینا لاپ بو باشیما شیغییان گونش کیمی امین‌ایدیم.
های توشدو خان گلیر. آز سونرا خانین آتینین آیاقلارینین سسی ائشیدیلدی. خان آتی لاپ سوردو قنشریمه؛ گؤزلرینه الی ایله کؤلگه سالیب، باشین قووزاییب بیر منه باخدی. توفنگین یئرینی چیینینده ساهمانلاییب، اوز توتدی الی توفنگلی کیشی‌لرینه، اوجا سس ایله دئدی: توپچولاااار!! توپو سورون بورا، باغرینا ده‌ین گولله‌لره باخمایین، ییخیلماز سنگریمیز ارک‌دیر.
های قوپدو؛ کپنک‌لر دوه چی یه دوغرو اوچوردولار….
