چئویرن: ایشیق
ترجمه: ایشیق
ایشیق

reza-huseyni-marand
منه اینتیحاردان بیر حئکایه یازین
سید رضا حسینی مرند

یوخودا گؤردوم اؤزومو آسیرام. اَل-آیاق چالاراق سون نفسلریمده بیتیردی. بیردن کندیر قیریلاراق یئره سریلدیم. یوخو گؤردویومو بیلدییمدن آسیلی، یئنه دار کندیرینی قوشدوم. اَل-آیاق چالدیم، نفسیم سونا اَردی، یئنه کندیر قیریلدی…
سحر چاغی زیرنا موبایلیمین سسی ایله یوخودان قالخدیم. سانکی باشیما داش سالدیلار. هر گون سحر یئمه‌ییمی رادیونو‌دینله‌یرکن یئیه‌رم. آپاریجی خبرلرین باشلیقلارینی سؤیله‌ییردی: سورییه‌ده تئروریسلرین یوروشو ایله قیرخ سسکیز قادین و اوشاق جانینی ایتیردی. . . بغداد دا بیر اینتیحاری بومبا ایلا یوزلرله اینسان قانینا بلشدی. . . تئروریسمه قارشی بیر توپلانتیدا تروریستلرین تؤرتدییی ایشلر یارغیلاندی. . . میلل سازمانینین اوشاقلاری ساوونما بولومو افغانیستاندا اوشاقلارین پیس دورمدا اولدوغونو وورغولادی. . .
بیلیم یوردوندا ادبیاتدان باشقا هر سؤز دانیشدیم. اؤزومده بیلمیردیم نه دانیشیرام، قالسین اؤیرنجی‌لر. سونوندا وئردییم قونودا حئکایه یازمالارینی تکلیف ائده‌رک، سؤز وئردیم کیمسه اَن گؤزل حئکایه‌نی یازیرسا اونو درگی‌ده یاییملایاجاغام. یوروقون-آرغین ائوه دوشدوم. مطبخده یئمه‌یه هئچ نه تاپا بیلمه‌دیم. حیات یولداشیم بئش-آلتی آی اؤنجه بوشانیب گئتمیشدی. گئدیشیندن اوزگون دئییلدیم، دوغروسو چوخ دا سئوینیردیم.
یوخودا یئنه اینتیحار ائدیردیم. حامام وانیندا داماریمی وورموشدوم. قان ایستی سویون ایچینده یاواش-یاواش سوزولوردو. سوزولدو. . . سوزولدو. . . ! سو آل قیرمیزییا بویاندی. داشیب ائوی قوینونا آلدی. یوخو گؤردویومو بیلدیییمدن آسیلی ایسته‌میردیم اویانام. آنجاق یئنه زیرنا موبایلیمین سسی یوخونو زهر ائله‌دی. رادیو بیر قادینین اؤزونو یاندیرماسیندان سؤز آپاریردی. یئردن-گؤیدن اینتیحار یاغیردی. اؤیرنجی‌لر اینتیحار قونوسوندان یازدیقلاری حئکایه‌لری گتیرمیشدیلر. اونلارا گؤز گزدیره‌رک هئچ بیری ماراغیمی چکمه‌دی. آنجاق اینتیحارلاری قولتوغوما ووروب، ائوه ساری یؤنلدیم. ائوده اولان درمانلارا گؤز گزدیردیم. آروادیم دلی کیمی ایدی. گئجه‌لر یاتا بیلمزدی. یارامازین یوخو درمانلاری هله قالیردی. هر گئجه یاتاقدا بیرینی، بیر بارداق سو ایله ایچه‌ری آتاردی. سونرا مندن اوز چئویریب یاتاردی. آروادیم بو درمانلارین بیری ایله گون اورتایا دک کیمی یاتاردی. بونلارین بئش-آلتیسی منی‌دینج ائده بیلردی.
اؤیرنجی‌لره سؤز وئرمیشدیم اَن گؤزل حئکایه‌نی درگی‌ده یاییملایام. گئجه یاریادک اونلاری اوست –آلت ائله‌ییردیم. نئچه‌سی من دئدییم قونودا یازیلمامیشدی. بیریسی تانرییا مکتوب یازاراق اونو پوست ائتمیشدی. کاغیذین آلتیندا یازدیم: اینترنتله تانریلا ایلگیلنسن داها تئز جواب آلارسان. نئچه‌سی سئوگی حئکایه‌سی یازمیشدی. اونلارا دا یازدیم: سئوگی اودوندان یانیرسینیزسا، حئکایه یازمایین. او یانیق اوره‌یینیزین اودو بیر یول سئوگیلیزایله یاتاقدا یاتماقلا سؤنر. یازیلارا چوخلو اتک یازی یازدان سونرا یاتاغیما گیردیم.
سحر یئنه زیرنا موبایلیمین سسی ایله یوخودان قالخدیم. سحر یئمه‌ییمی رادیو ایله بیرگه یئدیم. اؤیرنجی‌لرله حئکایه‌لرینین‌ دیرسیز اولدوغونو آنلاشاراق بیر داها قلم توتمالارینی ایسته‌دیم. صینفده پنجره‌نین اؤنونده دایانمیشدم. دوشونجه‌لریم اوچوب اوزاقلارا گئتمیشدی. چوخ اوچماسین دئیه اونلاری گئری قایتاردیم. من یئنیجه گؤیلردن یئره ساری قاییتمیشدیم. گئجه تئلئویزیوندا کی وئرلیشلر یادیما دوشدو. “الله اکبر” سسیله قانلار یئره آخیردی. “الله اکبر” قارا بایراغین اورتاسیندا توتستاق قالمیشدی. “محمد رسول الله” دا اونا اتک یازی اولموشدو. قیز اؤیرنجی‌لر‌دن بیرینین آتاسی گلمیشدی. قیزی اوره‌ک خسته‌لییینه اوغراشمیشدی. اونو بیر قیراغا چکدیم. یئکه‌پر بیر کیشی ایدی. گؤزلری دولموشدو. اوره‌یینی بوشالتدی. حکیملر درمان اوچون اوتوز میلیون پول ایسته‌ییردیلر. بللی- بلیرسیز یئکه‌پر کیشی دانیشارکن بئینیمده بیر ایشیق چاخماق کیمی چاخدی. دئدیم:”من سنه قیرخ میلیون وئره‌رم، آنجاق منه بیر ایش گؤرمه‌لیسن”. شاشقینجاسینا باخیردی. “قورخما بو پول سنه آنا سوتوندن حلالدی” دئیه‌رک موبایل نومره‌سینی آلدیم.
آخشام چاغی قالدیریملاردا آدیملایارکن دوشونجه‌یه دالمیشدیم. خیاباندا ماشینلار گل- گئت ائدیردیلر. من اؤزومو ماشینین اؤنونه‌ده آتا بیلمیرم‌می؟ قورخونون بالاسی اؤلسون. قورخورام. کئچن گئجه داما چیخمیشدیم. دایانمیشدیم اوچ قاتلی تیکینتینین قیراغیندا. اؤزومو یئره آتا بیله‌رم می؟ اؤلمه‌سم کیم منه یییه دوراجاق؟ بونلار البت باهانادی. قورخورام. منیم یارامازلیغیم بیر باشا قورخومدان و چیخارسیزلیغیمدان آسیلی ایدی!
گئجه پنجره‌نین اؤنونده موبایلیملا اویناییردیم. “زنگ آچیم؟ آچماییم”؟ یئکه‌پر کیشی‌یه زنگ آچدیم. اوندان سونرا دلی‌لر کیمی ائوده گزیردیم. بیر آن اؤزومو اوتاغیمین اؤنونده گؤردوم. بو اوتاغی اونوتموشدوم. سؤز وئرمیشدیم داها اورا آیاغیمی قویمایام. آنجاق یئنه تپیلدیم ایچه‌ری. بیر آز دایاندیم، اویان- بویانا گؤز گزدیردیم. ایره‌لی گئده‌رک ماسانین اؤنونده دایاندیم. بو ماسانین آرخاسیندا چوخلو گئجه‌لری سحر ائتمیشدیم. آنجاق ایندی توز ایچنده ایدی. نه یازیق هامیسی بیر ایلغین ایمیش. اوتوراجاغی گئری چکیب اوتوردوم. سون یازیمین کاغیذلاری ائله قویدوغوم یئرده قالمیشدی. دوداغیما بیر آجی گولوش اوتوردو. کاغیذلاری یئره سپه‌له‌دیم. کیتابلار اوست-اوسته قالانمیشدی. هگل دن،‌نیچه دن، بورخس دن، کافکادان. . . بیر یومروقلا اونلاری دا یئره سردیم. کافکا یئره سریلدی، آنجاق باخیشلاری مندن آیریلماییردی.
سحر یئنه زیرنا موبایلیمین سسی ایله یوخودان قالخدیم. اؤیرنجی‌لره دئدیم بو قونو دا یازمالی‌سینیز: “بیر کیشی پول وئریر اونو اؤلدورسونلر”. اؤیرنجی‌لرین شاشقین باخیشلارینا اؤنم وئرمه‌دن صینیفدن چیخدیم. بانکا ساری یؤنلدیم. اوردان ایسه ائوه دؤندوم. یوخ! ائوه دؤنمه‌دیم. قبریستانا ساری گئتدیم. اؤلولرین سایی بیزدن چوخ اولورسادا «بیز دئمه‌سم داها یاخشی اولار»،‌سیزلردن چوخ اولورسادا شهرلری بالاجا ایدی. منده بویون-صاباح اؤلولرین قوینونا‌سیغیناجاغام. بونلارا تای یاتاجاغام. داها سحر چاغی موبایلیم زیرنا چالمایاجاق. رادیو ‌دینله‌مه‌یه‌جه‌یم. اؤیرنجی‌لری حئکایه یازماق زوروندا قویمایاجاغام. قوی شاعیرلرین سایی بونداندا آرتیق آرتیریلسین. من اؤلندن سونرا حئکایه ‌نه‌ییمه یارار؟ بونا باخمایاراق وصیت ائده‌جه‌یم منیم قبیر داشیمدا شعر یئرینه بیر حئکایه‌جیک یازسینلار.
گون اورتا چاغی موبایلیم زنگ چالدی. یئکه‌پر کیشی‌ایدی. پول ایسته‌ییردی. دئدیم” گل ایشیوی یئرینه یئتیر سونرا”. گلیشی یاریم ساعات سورمه‌دی. هووشنه ایچینده ایدی. من ایسه ‌دینج دورومدا تئلئویزیون قارشیسیندا اوتورموشدوم. آز قالیردی دوشسون آیاقلاریما. آیاغا قالخاراق آچاری گؤتوروب ایشقابا ساری یورودوم. ایشقابی آچیب پوللاری اونا گؤستردیم. سونرا باغلاییب آچاری جیبیمه قویدوم.
دئدیم:”من بوش یئره پول وئره‌سی دئییلم. سن منی اؤلدورمه‌لیسن. سونرا جیبیمدن آچاری گؤتوروب پوللاری آپارا بیلرسن. یالوار-یاخار دا یارارسیزدی. سؤز وئرمیسن، اونوتوموسان می”؟
یئکه‌پر کیشی دئدی:”من بو آن قیزیمدان باشقا هئچ نه‌یه دوشونه بیلمیرم. ایندی پولو وئر، سؤزومده وارام، صاباح سنین ایشین بیتیب”
بو دارتیشما چوخ سوردو. یئکه‌پر کیشی یاواش – یاواش اؤزوندن اولوردو. قیزارمیشدی. سویوق یانا یاناشمامدان داها آرتیق ‌سینیرلی اولوردو. یاخامدان یاپیشاراق منی بیر بوجاقدان باشقا بوجاغا سوروتله‌دی. سونوندا باشیمی هارا ایسه چیرپدی. یئره سریلدیم. کافکا کیمی یئره سریلدیم.‌ دیل-دوداغی قوروموشدو. نه ائده‌جه‌یینی بیلمیردی. سونوجدا جیبیمدن آچاری چیخارداراق، پوللاری گؤتوروب گئتدی. گئجه‌نین قارانلیغیندا اؤزومه گلدیم. باشیم قانامیشدی. گؤزگونون اؤنونده دایاندیم. اوز – گؤزومو قان بویامیشدی. آنجاق هله اؤلمه‌میشدیم. یاراماز گئده منی اؤلدورمه دن پوللاریمی گؤتوروب گئتمیشدی.
باشیمین ساغلام سوره‌جی چوخ سورمه‌دی. یئکه پر‌ دیوثون دا قیزی خسته‌لیکدن ساغلام اولاراق پولومو گئری قایتاردی. چوخ دوشونوب- داشیناندان سونرا بیر سونوجا چاتمادیم. یئنه یاشاما گئری دؤندوم. آنجاق هله دوشونجه‌لریم یئرینده ایدی. بیلیم یوردوندا من اولمادیغیم سوره‌ده اؤیرنجی‌لر حئکایه‌لرینی بیتیرمیشدیلر. قونو “پول وئریم، گل منی اؤلدور” ایدی. حئکایه‌لری بیر یئره توپلادیم. گئجه‌لر حئکایه‌لره ‌سیغینیردیم. اونلارین آراسیندا اؤزومه اویغون بیر حئکایه آختاریردیم. بیر حئکایه‌ده قادین حیات یولداشینی اؤلدوروردو. نه یاخچی بو قونو اؤز کافاما چاتمامیشدی؟ منیم آروادیم چوخ اسکیح آدام ایدی. پول وئرسه ایدین هر ایش گؤرردی. موبایلیمدا نومره‌سی قالیرمی؟. . .

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

منه اینتیحاردان بیر حئکایه یازین /‌سید رضا حسینی مرند

ایشیق
www.ishiq.net

آذربایجان ادبیات و اینجه‌صنعت سایتی

منه اینتیحاردان بیر حئکایه یازین /‌سید رضا حسینی مرند

ایشیق
www.ishiq.net

آذربایجان ادبیات و اینجه‌صنعت سایتی

منه اینتیحاردان بیر حئکایه یازین /‌سید رضا حسینی مرند

ایشیق
www.ishiq.net

آذربایجان ادبیات و اینجه‌صنعت سایتی