چئویرن: ایشیق
ترجمه: ایشیق
ایشیق

tagizade-122x150
اوشاقلیق جنتیمده آجی بیر گون
علی تقی‌زاده لاریجان

شوبهه‌سیز اورا اوشاقلیق جننتیم ایدی. آجیلی شیرینلی خاطیره‌لری ایله. اورا زرنه یوردی، صحرامانین اته‌گینده، مئشه لرین اوستونده یئرلشن گوزل ییلاق ایدی. هاما او گون او جنتده سوردویوم ان آجی بیر گون ایدی. ۱۳۴۹ اونجی گونش ایلی یایین قیرخ بئشی‌دی. بیر ساکیت ایکیندی چاغی ایدی. آتام، من، بیرده یاشلی، قیرمیزی یابوموز زرنه یوردونون اویون یئریندن قانلی قجله طرف گئدیردیک. اوزون ایللر آتام بیر آل وئرچی کیمی کلیبردن، آبش احمد دن مال آلیب اونا چاتیب کندیمیزه گتیرردی. بیرخیرداجا کاسیب دوکانی، نئجه دئیرلر چاققی چوققو وارایدی. اودور کی اوزاق یوللاری اوزون موددتلر یولداشی اولموشدی قیرمیزی یابو. سونرالار گوردوم گلساری ایله تانابایین یولداشلیقینا چوخ اوخشاری وارمیش.
یابونون یئدگی آتامین الینده منسه آرخادان گئدیردیم. آتامینان آز چوخ سفره چیخمیشدم قاباقلار. عادتاً یا او منه تجروبه‌لریندن، خاطیره‌لریندن یادا دیندن، معجیزه دن دانیشاردی، یادا منیم اوشاق دونیالی سورغولاریما آراملا جاواب وئرردی.
اوگون ایسه، نه منیم سوالیم واریدی نه ده آتامدا دانیشماغا کیف داماغ.
قالین شوشه‌لی عینک گوزونده اولسایدی دا، گاهدان یاخشی گؤرمه‌دن ایاغی داشا ایلیشیردی. ییخیلماسین دئیه آتین نوخداسیندان آسلانیردی. بیلمیردیم نیه آتی مینمیر. یهرسیز پالانسیز اولسایدی دا مینیب او داشلی یوللاری گئده بیلردی.
دولایی بولاغ ین اوستوندن آشیب مرزولویه طرف یوللاندیق. یولون آلتی مئشه‌نین سون سرحددی ایدی. خاللانمیش قره قات، بویورتگان، آلچا، اوردا بوردا گؤزه ده‌ییردی. منسه هئچ اونلارا مئییللنمیردیم. سوکوت باغریمی چاتلادیردی.
گؤیه باخدیم. گؤیون ده حالی قاریشیق ایدی. صحرامانین اوستونده آغ یوموشاق پامبیق لئچه‌یی کیمی بولودلار اویناشیردی. گون باتاندا خریل هاچاسی‌نین اوستونده ایسه قارا بولود غضبلی هده کسن کیمی آرانا طرف یاییلیردی.
خیرداجا بیر آشیریم آشاندان سونرا، برزوند یالیندا بیر کیشی تاپیلدی. یدگینده بیر مال یادا داوار. یامانجا دارتینیردی. . قویونون بوینونا عادتاً ایپ باغلاییب چکمزلر، آنجاق او حیوانین خیردالیقی قویون اولماقیندا مومکون گؤستریردی.
او کیشی‌دن آشاغی، دره کیمی قجللیقا گوم گوم دئیرلر. سببی‌ده بودور کی اوردان اؤتن مال حیوان یا اینسانین ایاق سسی قایادان عکس اولوب بیر آغیر گوم گوم سسلنر.
گوم گومدا یولدان آیریلیب اوکیشی‌یه طرف دیکلندیک. بیر داشین دیبینده اوتوروب ایکی یاشلی بیر دیشی بئزوون بوینونا دولادیغی ایپدن توتموشدو.
گونشدن، داها دوغروسو کاسیبلیقدان، قاراگوندن، اوز گؤزو قارالمیش، آریق اوتوزبئشه یاخین یاشلی، هاما چوخ قوجا گؤرونتولو او کیشی نین آدی نورالله ایدی.
آتام یابونون نوخداسین بوراخدی. نورالله ایله سالاملاشدی. آت بیر آز آرالانیب اوتلاماغا باشلادی.
نورالله‌نین بئزوو آرتیق وحشی جیرانا اوخشاییردی. بیرجوت زیل قارا پارلاق گؤزلری ایله بیزه همده یابویا سورغولو بیر نظر سالیب، اوتلاماغا داوام وئردی.
من او دیقیه کیمی سببین بیلمه‌دن کدرلیدیم. اونداکی نورالله‌نین دانیشیغیندان سببین بیلدیم آرتیق مکدر اولدوم.
دئمه آتامین پولا احتیاجی اولدوغوندان نورالله ایله ایکی گون اول کلیبرده قیرمیزی یابونون معامله‌سین یاپموش، آل وئر اوچونده اوگونو برزوند یالین قرارلاشموشلار.
آتام اعتراض ائدیردی کی: سن پول گتیرمه‌لیدین بئزو یوخ. بیز بئله دانیشمامیشدیق. نورالله‌نین کی سؤزلریندن بیرجور خواهیش و التماس یاغیردی دئدی: قیمتین هامیسی قدر پول الده ائده بیلمه‌دیم. سن بو بئزوو گؤتور قالانینا پولوم چاتار.
آتام نورالله‌نی اوزوندن ده یازیق گؤردوکده راضیلاشدی. اونلار ال وئردیلر بیر بیرینه معامله‌دن خئییر آپارماق آرزولادیر.
آتام آهسته قیرمیزی یابویا طرف گئتدی. همان یابو کی اوزون ایللر، اوزاق یوللار ایستیده سویوقدا کلیبر چایی یولوندا، آبش احمد، موتاللیقدان بئله الینین عصاسی همده یول یولداشی اولموشدو. آراملا آتین بوینون قوجاخلادی. او اوزوندن بو اوزوندن بیرده قاشقا آلنیندان اوپدو. تومارلاماق قصدیله الین. بوینونا ,یالینا چکدی. سونونجی نوازش سونونجی تومار!.
آت آراملا دؤندو منه طرف باخدی. سانکی نئچه آن باخیشی ایلیشدی. گؤزون گؤزومدن چکه بیلمدی. من او باخیشا تابلاشانمادیم. اوزومو دوندردیم آرانا طرف. گؤز ایشله‌دیکجه مئشه‌لر چکیلمیشدی. باخیشیم دوزداق‌دان علی آباد مئشه‌سیندن آشدی، آغیدان هیجران دوستدان ایکی چای آغزی‌ناجان گؤردو. داها تارلاشدی هئچ یان گؤرونمه‌دی. گؤزومون یاشی قویمادی گؤرم. قویمادیم آتام یا نورالله آغلاماغیمی گؤرسونلر. قهر بوغازیمی کسسیده ده سسیز آغلاییردیم. هم آغلاماقدان اوتانیردیم همده ایسته‌میردیم گؤز یاشیمی اونلارین سئودالاشماسینا نحس گتیرن کیمی دوشونه‌لر.
منیم اؤزومونده قیرمیزی یابوینان آزماز یولداشلیغیم اولموشدو. چوخ آلاتوران آخشاملار اونو مینیب بولاغدا سووارماغا آپارمیشدیم. اونون بئلینده بولاغدا شکیلیمی گؤردوکده بؤیومک، کیشی‌لنمک حیسسی تاپاردیم.
– بالا گئداق.
آتامین بو سؤزو منی آییردی بوتون شیرین خاطیره‌لریمدن. امینم کی آتام اؤز گؤزیله آغلاماغیمی گؤره بیلمه‌سه ده اوره‌ک گؤزوایله گؤردی و هئچ نه دئمه‌دی. آخی بیلردی کی هیمه بندم.
باشیم آشاغی یول گئدیردیم. یعنی گئدیردیگ. بیلمیردیم هارا گئدیریگ مهم ده دگیلدی. آز مدتدن سورا برزونده یتیشدیگ. نورالله نین ائوینه. بللی اولدو کی نورالله بیر چای ایچمه‌یه همده قالان بورجون اؤده‌مک اوچون آتامی راضی سالیب ائوینه گئدک.
بیزیم آران کندلرینده ائولر حصارسیز اولور، هاما تات کندلرینین چوخوندا ائولرین حصاردیواری همده بؤیوک گیریش قاپوسو اولاردی.
نورالله حیطینده بئزولا یابونو باغلاییب، قاباقلارینا بیرقوجاق اوت تؤکدی . ایچری کئچکدیک.
نورالله نین من یاشدا بیر بالاجا زیرنگ قیزی وارایدی. آنجاق بئش یاشی اولاردی ائله. چاینیکی سوایله دولدوردو قویدو اوجاغا.
گؤزلریده ائله بیزولارینین گؤزو کیمی زیل قارا یامانجادا اورکک ایدی. دوغروسو آرتیق معنالی. حیسس ائله‌دیم اودا من تکی آرامسیزدی. ایشلرین تله‌سیک گؤروردی. باخیشیدا بوتون سورغو سواللی.
آتاملا نورالله صحبته مشغولیدیلر. منسه گؤزومو کؤهنه پالازین ناخیشلارینا تیکیب یابونون اولماماقین اوزومله آراشیدیریردیم.
نورالله نین قیزی چاینیک الده ایچری گیردی. ایکینجی دفعه سینی ده استکان نعلبکی‌لری، صون دفعه ده بیرپارچا ایله توتدوغو چینی چایدانی گتیردی.
چینی چایدانا چاتلادیغینا گورا دمیردن نئچه بند آتموشدولار. مکتبه گئدندن سورا یئر کوره‌سینین مدارلارین گؤرنده او چایدان یادیما دوشردی.
بیرآز قاینارسو ایله استکان نعلبکیلری ییخالادی. چینی چایدانی گؤتوردی کی چای تؤکسون. بیر ملایم تبسم ایله منه باخدی. بو معناداکی :بویومون بالاجالیغینا باخما. ایشیمی بلدم. !
منده او سایاق بیر تبسوم ایله‌دیم.
بیرینجی ایستکانا چای عوضینه داغ سو بوشالتدیقدا خجالتدن قیزاردی، سورعتله منه باخیب هؤنکوره هؤنکوره ائشییه قاچدی.
من دونموش کیمی قالدیم. اوشاغلیق دوشونجه‌سی ایله بئله ظن ائله‌دیم کی چای آلماغا پوللاری چاتماییر داغ سو ایچیللر بلکه. چوخ متاثثیر اولدوم.
سکوت حاکیم اولدو نئچه آن. نورالله الیله گؤزونون نمین سیله‌رک دئدی: باغیشلایین سیز آلله. ! اوچ آی قاباقدان کی آناسی اولوب، هردن هوشون ایتیریر. اونودوب کی چایدانا چای آتسین. هم یتیملیک همده آناسی عوضینه ائو ائشیک ایشی! نه دئییم آخی !؟
دردیم نئچه قات اولدو. بوغولوردوم سانکی. تکی نورالله دان توالت‌لرینین هاردا اولماسین سوروشوب اؤزومو ائشیگه سالدیم.
توالتده دویونجا آغلاییب تام یونگوللشدیم. چیخیب حیطده ال اوزومو یویوب آرخالیقیمین آستاری ایله قورولاییب ایچری گیردیم.
نورالله نین قیزی چای تؤکوردو. آتالاریمیزدا ایچه ایچه صحبت ائدیردیلر!.
اودا دئیه‌سن من تکی یونگوللشیب آراملاشمئشدی. بختیار وهابزاده دئمیشکن: سنی گوردوکده من البت ائله یونگولله شیرم * بوشالیر گویده بولوتلاردا دولاندان دولانا.
ینه گولومسه‌یه‌رک دیققتله گؤزومه باخدی. باخیشیندان بو خواهیشی آنلادیم:
هیچ یئرده بوگونکی سهویمی سؤیله‌مه لوطفن. ! من ده گولومسه‌یه‌رک الیندن چایی آلیب باخیشیملا خاطرجمع اول دئدیم.
ال چوره‌ئی ایله قاتیقدا گتیردی. دویونجا یئیب ایچندن سورا زرنه یوردونا طرف یوللاندیق.
یابو حیطده باش آشاغا اوت یئییردی. نه او باشین قالدیردی نه ده بیز آیریلیق دردین تزه‌له‌مک ایسته‌دیک.
آتام بئزوون بوینونداکی چاتینی چکیردی. بئزودا گاه گئدیردی گاهدا دارتینیردی.
گوم گوما چاتاندا آرتیق گون باتیردی. قارا بولودون کؤلگه‌سی قویموردو اوزاقلار گؤرونسون. یکه دنه‌لی یاغیش بیربیر باشلادی.
یئنه اوره‌گیم سیخیلدی. بیرده بئزو دارتیناندا بوتون باش وئرنلرین آجیغین آوندان آچیب قارنینا موحکم بیر تپیک ایلیشدیردیم.
بیرایلدن سورا او بئزووی ایئله ییلاقدا مئشه آراسیندا جاناوار یئدی. منده چوخلاری کیمی اون ایکی اوچ یاشیمدان شهره ک‌چدوم. ییلاق دا بیر حسرته چئوریلدی. بو یاشدا هردن زرنه یوردونا اوشاقلیقیمی آختارماغا گئده‌رم. صحرامایا چخارام. اوردان برزونده طرف باخیب اؤزومدن سوروشارام :گؤره‌سن ایندی نورالله‌نین قیزی هاردادی ؟!!
یای ۱۳۷۸ تهران

چاپ

2 پاسخ

  1. منیم عزیز دوستوم تقی زاده جنابلاری؛ دوغوردان دا چوخ یوکسک سوییه لی بیر نووئل اوخودوم. سنین گؤزلرین دولان کیمی منیم ده بیر نئچه دفعه گؤزوم ده، اوره ییمده دولدو. منی ده اؤزونله چکیب آپاردین کئچمیش لره. سنه مننتدارام… اوره یینه ساغلیق. اؤزل لیک له صحنه لری چوخ گؤزلجه سینه گؤز اؤنونه سرگی له مه یی باجارمیسان.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوشاقلیق جنتیمده آجی بیر گون/ علی تقی‌زاده لاریجان

ایشیق
www.ishiq.net

آذربایجان ادبیات و اینجه‌صنعت سایتی

اوشاقلیق جنتیمده آجی بیر گون/ علی تقی‌زاده لاریجان

ایشیق
www.ishiq.net

آذربایجان ادبیات و اینجه‌صنعت سایتی

اوشاقلیق جنتیمده آجی بیر گون/ علی تقی‌زاده لاریجان

ایشیق
www.ishiq.net

آذربایجان ادبیات و اینجه‌صنعت سایتی