طناز و ساتیریک شاعیر اوستاد “نجار اوغلو” ایله مصاحبه
دانیشیغی آپاران : محمدرضا شوکتی
اؤن سؤز:
عبید زاکانی، میرزه فتحعلی، میرزه جلیل، میرزه علی اکبر صابر و معجز کیمی بؤیوک شخصیت‌لرین داوامچیسی و رحمتلیک آرش آزاد، یالقیز و ساپلاغین معاصیری، قلمداشی و یولداشی اولان استعدادلی و قدرتلی قلم صاحیبی «نجار اوغلو» تخللوصو ایله یازیب یارادان ساتیراچی شاعیر اوستاد حاج علی عطائیه‌نین قوللوغونا گئتمک ایستیره‌م . شعرلریله اونسیتیم وار، تهرانین بهمن فرهنگسراسیندا صابر ادبی انجمنی «رحمتلیک ساپلاغا»عزیزله‌مه مراسیمی «شب شعر طنز» آدیله قوران زامان اونونلا همسفر اولدوم. اوستاد شهرک، نجار‌اوغلو و من (محمد رضا شوکتی)بیر گئجه طنز ایله سحر ائتدیک. نجار اوغلو ایله بیر صندل‌ده ایدیم، قوجالیغینا باخمایاراق دانیشدیریب سؤزلریندن بهره‌لنیردیم و….بئله فیکره دوشدوم کی بیر گون اونونلا قونوشوب، دانیشیب و ماحصلی بیر مصاحیبه کیمی(امید تبریزنشریه‌سینین) اوجاق صحیفه‌سینده چاپ ائدیم. او گون یئتیشدی. نجار اوغلونون نجار توکانین آختاریب تاپیب اونونلا گؤروشرکن خاطیره‌لری یادیما دوشدو. آرتیق حؤرمت، متانت و شخصیت صاحابی‌دیر، قوجامان، طنز شعری‌نین داوامچیسی«نجار اوغلو» مریض احوالدیر. اما منیم سؤزلریمه حوصله ایله جاواب وئردی. منده حالین دوشونه‌رک آرتیق سورغو سوالا چکمه‌دیم. «نجار اوغلو»نون اوغلودا نجاردیر. اوندان خواهیش ائتدیم بیزدن بیر شکیل چکسین و…..
…و نهایت بو سیز بودا نجار اوغلو ایله آپاردیغیم مصاحبه:
س- اوستاد اؤزونوزو بیزه هابئله اوخوجولاریمیزا تانیتدیرین.
ج: من اوستاد خلیل نجارین نوه‌سی، حاج تقی نجارین اوغلو، حاج علی عطائیه حؤکم آوارین باغلار باشیندا آنادان اولموشام. دوغوم ایلیم ۱۳۱۱-اینجی گونش ایلی‌دیر. او زامان بئش کیلاسادک گونوزلر درس اوخوموشام. سونرالار بیر سیرا چتینلیکلره گؤره گئجه‌لر تحصیله داوام وئریب سعدی‌نین گولوستانین تامام اؤیره‌نمیشم. اینقیلابدان بری شعر یازماغا باشلامیشام. آتا بابا صنعتیمیز نجارلیقدیر. اونا گؤره ده (نجار اوغلو) تخللوصونو سئچمیشم. شعرلرله حیکایه‌لریم طنزدیر، من آرتیق طنز یازار بیر شاعیر کیمی تانینمیشام. یازیلاریم ده‌ده قورقود، جوالدوز، فروغ آزادی، آذربایجان، فجر آذربایجان و دئمک محللی نشریاتدا چاپ اولوبدور.
س- اوستاد طنز نه دئمکدیر؟
ج: حکومت طرفیندن آغیزلار باغلاناندا و قلم‌لر سیناندا، طنز شعر و یاخود طنز دیلی مئیدانا گلیر. طنز حقیقتلری گو لمه‌لی کلمه‌لر، جومله‌لر و شعرلر ایله خالقا چاتدیرماقدیر. طنز فکاهی دئییل. بونلار فرقلی دیرلر.
س- اثرلرینیزده ن بویورون لوطفا.
ج: بئش جیلد نجار اوغلو آدیله چیخارتدیغیم اثرلردیر کی چوخ زامان بوندان قاباق‌دان ال آیاغی چکیلیب. قات قاریشیق آدلی طنز شعرلریم، شعرلر کیتابیم و حؤکم آوار کیتابیم داکی نثر دیلی ایله مصور بیر کیتابدیر. ایندی ده ایکی کیتابیم وار دیر کی چاپ ائتمک ایمکانیم یوخدور.
س- اوستاد شعرده هانسی شاعیر لردن تاثیر آلیرسینیز؟
ج: اصل اوستادیم رحمتلیک اوستاد شیدادیر. اوندان اینسانلیق درسی آلمیشام. سیاسی، اجتماعی و ساییره موضولاردا اولان شعرلری اوندان اؤیره‌نمیشم. معجزدن، کریمی‌دن ایلهام آلمیشام. آرتیق چالیشمیشام معجزین یولون گئده‌م، چون او حقیقتلری پرده‌سیز و طنز دیلی ایله عالی سوییه‌ده یازیب، یارادیب، جهل ایله و خرافات ایله مبارزه آپاریب .
س- بیر خاطیره بویورون.
ج: تربیت کیتابخاناسیندا دؤولت ایجازه سیله انجمن قورموشدوق کی بیر عیدده زیندانی‌لاردان بیر آز مدت بیزی تعقیب ائتدیلر، سونرا بیر گون گلیب اورادا بیزی دویونجاق کتک‌لدیلر. یحیی شیدانین قابیرقاسی سینمیشدی، دؤکتور «مبین»ین گؤزو شیشمیشدی و ….. هئچ بیر یاندان دادیمیزا دوران اولمادی. ۱۳۶۰- اینجی ایلین آخیرینجی جلسه‌سی او اتفاق اوز وئردی.
س- ایندی لیک شهریمیزده «طنز شعر» یا طنز شعر یازان شاعیرلر نه حالدادیر؟
ج: شهریمیزده طنز شعرین دوزگون رونقی یوخدور. قدرتلی شاعیرلری الده‌ن وئردیک. آللاه یالقیزا، آرشه، ساپلاغا رحمت ائله‌سین. بیر سیرا شعر یازانلاردا واردیرکی طنز شعر آدیله بیر زادلار یازیرلار….!؟
س- هانسی شاعیرلرله ارتباطینیز واردیر؟
ج: قاباق زامانلار آرش، یالقیز و ساپلاغلا دوستلوغوم وار ایدی. ایندی‌لیک «سلیمان ثالث» ایله ارتباطدایام، اودا طنز پرداز دئییل.
س- ادبی انجمنلره گئده‌رسینیز؟
ج: قوجالمیشام…..مریض اولاندان بویانا گئتمه‌رم. اوچ ایل ناخوش اولاندان سونرا «ادبی انجمن» ده کی شاعیر دوستلاریم گؤروشومه گلمه‌دیلر. اونلار قلم دوستلاریم ایدی، اونلاردان آرتیق انتظاریم وار ایدی، اما منی یاددان چیخارتدیلار. ۳۰- ایل تبریزین ادبی انجمنینه گئده‌ندن سونرا حؤرمتلی شاعیر دوستلاریم ۳۰- ایللیک دوستلوغون ارزیشین بیلمه‌دیلر. بیر گون انجمن ادبی‌ده میکروفون دالیندا دئدیم کی، او کس‌لر کی ایندییه‌دک گلیب منی گؤروب، حالیمدان خبر دوتوبلار، منی یوخلاییبلار اونلاردان یئرده‌ن گؤیه کیمی تشکر ائدیره‌م، بیر یئرده ایکی استکان عرق ایچن ایکی یولداش هئچ زامان بیر- بیرلرین یاددان چیخارتمیر. اما سیز ۳۰- ایللیک قلم یولداشیزی مریض اولان زامان گلیب گؤرمه‌دیز. اونا گؤره سیزده‌ن تشکر ائدیره‌م . سونرا بو بایاتینی اوخویوب، سؤزومو قورتاریب اوتوز ایللیک انجمنی ترک ائتدیم.
اولو تانرییا قسم
کیم اینانار دوز دئسم
زامان بئله گؤسته ریر
سیز یاخشیسیز من پیسم
س- جشنواره لرده ایشتیراک ائتدییینیزدن آلدیغینیز تقدیرنامه‌لردن بویورون ؟
ج: بستان‌آباد سپاهی‌نین جشنواره‌سینده تقدیر آلمیشام. زنجفیل آدلی طنز شعر جشنواره‌سینده تقدیر و جاییزه آلمیشام. شهرداری‌نین جشنواره‌سینده و ۸۳-اونجو ایلده حوزه هنری‌نین جشنواره استانی شعر طنزینده تقدیر آلمیشام.
س- سون سؤزونوز؟
ج: سیزه و اوخوجولارینیزا جان ساغلیغی و خوش و طنز ایله دولو گونلر آرزیلاییرام و بیرشعر تقدیم ائدیرم:
زینال ایله اوغلو بیر گون سحری
گزیردیلر نجار اوغلو شه‌هه‌ری
گؤردولر کی قوپدو عجب قیامت
بیراؤلونو آپاریری جماعت
اوغول دوتوب آتاسینین الینی
دئدی هارا آپاریرلار اؤلونی
زینال گؤردو بالاسی فیکر ائدیری
دئدی اؤلو سون ائوینه گئدیری
او بیر ائودیر نه فرشی وار نه منقل
نه چیراغی، نه گازی وار، نه صندل
نه رادیو، نه ضبطی وار، نه تلفون
نه لیباسشو، نه ویدیو وار، نه آیفون
نه گیرده کان، نه پوسته وار، نه خورما
نه پور تاغال، نه موز واردیر، نه آلما
نه بال کره، نه موراببا، نه قایماق
نه دولما وار، نه کوفته وار، نه قویماق
نه چال چاغیر، نه اویناماق، نه پئشه
نه ایچمه‌یه اوزوم سویو بیر شوشه
نه پیلووار، نه بوز باشی، نه آشی
نه یئمه‌یه ساری بوغدا لاواشی
نه یون یورقان، نه توک بالیش، نه پتو
نه سئشوار وار، نه پنکه وار، نه اوتو
اوغول دئدی بابا طول وئرمه سؤزه
بیرکلمه دئ اؤلو گئدیری بیزه
4 فروردین ۱۳۹۱
قایناق: http://rezashokaty.blogfa.com
