خورالی شه‌هر
قوجا موغانلی

بورا خورالی شه‌هر-
قارا یاخیلیب دووارلارینا؛
آتیشقالاریندا-
سارالان گونشین بارماق ایزلری.

کوچه‌لری یارالی شه‌هر،
بورا خورالی شه‌هر!
ایستی – هنیرتی یوخ…!اوجاغیندا،
دونور کؤرپه محبّت بوز قوجاغیندا،
بو شه‌هرین:
نه آدی وار! نه سانــــی!
قارا دئولر آیاغیندان-
آغ توز قوپور، مئیدانیندا، دوراغیندا،
سولور چیچک بوداغیندا؛
بو شه‌هرین دردی بؤیوک، بئلی بوکوک.!
اؤلوم گزیر کؤرپه‌سینین یاناغیندا،
سئل داشلانیر، گؤزلرینین چاناغیندا.

قان…!
قارا قان چیله‌نیر قار اوستونه،
سیبیــر!
آلاســـکا، دئییل.!
اوجا داغلار اَتـــگی،
قارتالی! آسلانی! پلنگی…
قهرمانلار دوشرگه‌سی‌دیر.
یوللاری-
قامچیلار زولاغی،
بولودلاریندان یالان یاغیر،
یاوان گولور گونشـــی،
قوردلــو سـؤز!
… قوزقونلار باخیشیندا.
خوفلو، خورالــی شه‌هر!
کیفلـی، قارالـی شه‌هر!
بورا … خورالی شه‌هر. . .!
بورا … خورالی شه‌هر. . .!