اویاق قاپی
انصار قره‌داغلی

بیزیم کوچه‌ده بیر اویاق قاپی وار
دده‌مین عشقینین یادگاری
بیر سس دوگونلنمیش جفته‌سینه؛
آللاهین سؤنموش گونشینین سون تاپشیریغی.
دیکسینیر قارانلیغین آیاق سسلرینه بو قاپی،
قارانلیغین دار آغاجینا تیکیر باخیشلارینی.
اف….!
او دار ایپیندن تانرینی آسمیشلار !…
سوچو ، آینادیر ـ سودور ،
او تانرینین گوناهی یالنیز بودور !…
*
کیل کورسونون سول توووندا پاپاغی یاماقلی بیر کیشی اوتورموش،
اونون نَفسیندن نَفس آلیر توستولری باریشدیران اوجاق،
اونا اوره‌ک دوگونله‌یه،
قورخماییر تانریسی دار ایپیندن آسیلان چیراق.
ائوین قاریسی،چرشتبه سویویلا قادالاماقچین ارینین پاسلی قیلینجینی،
باجا اوسته گلن گلین اولدوزا نیّت توتموش !…
پاپاقی یاماقلی کیشی اوره‌ک‌لنیر قاریسینا ؛
– « قؤی ساعاتی اؤلدورسونلر اوره‌ییمین قاریسی،
بان خوروزونا نه گلمیش کی !…
هئیبمده چؤره‌ک یئرینه اولدوز گؤتوره‌جه‌یم،
ایشیق آتینی هؤروک‌له‌ین بیر سَحر مردلییمین یولونو گؤزله‌ییر ،
سؤکولمورسه ده، سؤکه‌جه‌یم دان یئرینی،
آند اولا توستوسو یارالی اوجاغیما.
ناغیلی اؤلموش چیراق سایاق یاغسیزلاما عؤمرومون اؤتوملرینه قده‌رلی قاریم!
آجیقلی گتیر پاسلی قیلینجیمی سولار اوستوندن،
پاپاغیما بیر داها یاماق تیکرسن،
و قارانلیغی بو قاپینین دابانلیغیندان سؤکرسن… .»