آذربایجان تدقیقاتچیسی عبدالحسین ناهیدی آذر حیاتا گؤز یومدو
آذربایجانین معاصر تاریخی اوزره تانینمیش تدقیقاتچیسی عبدالحسین ناهیدی آذر بهمن آیی‌نین ۲۱ینجی گونو تبریز شهرینده حیاتا گؤز یومدو.
عبدالحسین ناهیدی آذر ۱۳۲۰ینجی ایل قورو گؤلون یوسف‌آباد کندینده آنادان اولوب، عائله‌سیله بیرلیکده تبریز شهرینه کؤچوب و عؤمرونون بؤیوک بیر حصه‌سینی بو شهرده یاشامیشدیر. او تبریزین “دانشسرا”سیندا تحصیل آلدیقدان سونرا اوزون ایللر شبستر شهرینده معلم اولموشدور. سونرالار تبریز شهرینه گلمیش و بو شهرده ده تقاعده چیخمیشدیر.
عبدالحسین ناهیدی آذر گنجلیک ایللریندن معاصر آذربایجان تاریخی اوزره تدقیق ایشلرینه باشلامیش؛ ایلک تدقیقی اثری شیخ محمد خیابانی حقینده قیرخینجی ایللرده آدینه هفته‌لیگینده چاپ اولموشدور. یارادیجیلیق ارثیندن “دو مبارز مشروطه”(رحیم رئیس‌نیا ایله بیرگه)، “جنبش آزادی شیخ محمد خیابانی”، “روزنامه های تبریز در مشروطیت”، “زن در تاریخ”، “زنان ایران در جنبش مشروطه”، “سه مبارز”، “نقش کودکان و نوجوانان در جنبش مشروطه” کتاب و تدقیق‌لرینی آد آپارماق اولار.
عبدالحسین ناهیدی آذرین تورپاغا تاپشیرما مراسیمی بهمن آیی‌نین ۲۲ینجی گونو ساعات ۱۰ تبریز شهری‌نین وادی‌الرحمه مزارلیغیندا کئچیریله‌جکدیر.
بیز بو آجی ایتگینی مرحومون محترم عائله‌سینه، دوست و تانیشلارینا، ادبی مدنی جمعیتیمیزه و عمومیتله آذربایجان خالقینا باش ساغلیغی دئییر و گؤرکملی تدقیقاتچیمیزین شرفلی خاطیره‌سینی عزیزله‌ییریک.
4 پاسخ
ایکی گوز باخیشیندان بیر کیشی بیلگی باخیشیندان مینلر
روحو شاد اولسون
تانری رحمت ائیله سین ،بویوک اینسانی الدن ویردیک.
اؤلوم آتی چاپار اولار ،
– آتالار دئمیش ،
بس سن نییه بو آتی مینیب چاپییب گئتدین !…
تانریم رحمت ائله سین.
بئله سی اینسانلار خالقا یاپدیقلاری سئوگی و دویغولاری ایله یاشارلار خالقین اوره یینده میلیون میلیون ییل لار.