شعرلر
کریم قربان‌زاده
(۱)
اودلو گولله‌لرین
آجی دیل‌لرین
یامان گون‌لرین
یاراسینندان اؤلمه‌دیم؛
سنسیز
اپریدیم،
چوروم , چوروم , چورودوم،
تؤکولدوم،
اؤلدوم
سونسوز
و
توکنمز انتظاردا.
(۲)
ایچیمده بیر اسکیکلیک:
“سولطان”ین اتک‌لری،
بیر دولو بارداق چوبان چایی،
“عنصرود”ون پار – پار پاریلدایان قلمه‌لری،
بیر چیمدیک یاز هاواسی
و گونشین
یاماجلارداکی یاشیل ساچلی بوغدالیقلارد آغناماسی .
(۳)
کیمسه‌نین اینامی
میناره‌لرین, ناقوس‌لارین زنگوله‌سینده
و من
سنین سربست یاشامینا اینانیرام
گونشه دوغرو،
سئوگییه دوغرو.
(۴)
محبوسلار
ایللری، آیلاری؛
یولچولار
جیغیرلاری، یوللاری سایار؛
و من
گؤز قیرپیم‌لاریندا اؤلوب, دیریلیرم
سن گؤزومدن ایتن کیمی.
(۵)
بو شه‌هرده
کهنه بیر دییرمان
کهنه بیر تانری
کهنه بیر تولامبار یاشاییر؛
گونشی دارتیر
سئوگینی یاندیریر
و عالمی توستویه چکیر
بو خارابا شه‌هرده.
یک پاسخ
حورمتلی قربان زاده ، سوزلری داها آرتیق اینجه له دین ، اولسون کی بیر گون هایکو قالیبینه چئویرین ، عنصرودون گؤزللیکلری الهیانه دیر. ۵ ـ نجی شعرینیز آچیق وقلبه توخاناندیر آنجاق گؤزلدیر ،همن شعیری داها گؤزل قیلین . ایکی هایکو سیز اوچون تقدیم ائدیرهم :
۱
قاچ گه ل
الینی وئر الیمه
کؤرپه لیییم
۲
قوجاغیم
یئتیم ده ده دیر
آنامین کؤرپه لییینه .