کندیمیزده، گؤز آچدیم دونیایا، دیل آچدیم دانیشدیم و آنامین لای – لای لاریندان موسیقی اؤیرنیب نغمه‌لر اوخودوم.
گونلرین بیر گونونده تندیریمیزین تؤکولوب داغیلان بیر چاغیندا، آنام دئدی: آی منیم نازلی بالام! آرتیق داها تندیریمیز تؤکولوب – داغیلیبدیر، گل گئدک تندیر توپراغی گتیرک و یئنی‌دن بیر تندیر قویاق (دیکک). دئدیم:
– آی آناجان تندیر توپراغی ندیر؟
آنام دئدی:
– گول بالام ! بیر قیرمیزی توپراقدیر. یاخشی بیر پالچیغی (چومورو) اولار و اوندان گؤزل تندیر قوروب قویماق اولار. بونون اوچون ده بو توپراغا تندیر توپراغی دئییریک.
آنجاق اوزون سؤزون قیساسی بیز یولا دوشدوک، کندین شمال تاییندا بیر تپه واریدی. بیز تپه‌یه دوغرو یوللاندیق و یئتیشدیک. تپه‌نین چوخلو یئرلری قازیق- قازیق ایدی. من سوروشدوم:
– آناجان بو تپه ندن بؤیله قازیلیبدیر؟
آنام سؤیلدی:
– دوزلو بالام! بو تپه‌نین توپراغی چوخ یاخشی، قیرمیزی توپراق اولدوغو اوچون کندین هامیسی بوردان توپراق آپاریرلار.
آناملا بیرلیکده توپراغی قازیب، بیر ائششک ایله بیر قاتیرا یوکله‌ییب، ائوه قاییتدیق. ائوده باشلادیق پالچیق توتماغا و پالچیغی بوللو آیاخلاماغا. بیر گون سونرا (پالچیق یئتیشندن سونرا) آنام باشلادی تندیری قویماغا. آنجاق تندیر دوزلیب بیتدی. آنام تندیرده اود یاندیریب، اونون پالچیغینی بیشیریب ساخسی‌دک برکیتدی. بیر گون سونرادا خمیر دوزلدیب، چؤرک یاپدی.
آنام تندیریمیزده یئدی چئشیت (نوع) چؤرک یاپاردی: ۱- ساج لاواشی ۲- تندیر لاواشی و بئش چئشیت قالین چؤرک:
۱- یالین قالین (خمیریله اولونموش قالین چؤرک)،
۲- یاغلی فتیر (ساری یاغ ایله دوزلمیش خمیردن اولونان قالین چؤرک)،
۳- سوت فتیری (سوت ایله اولونموش خمیردن اولونان قالین چؤرک) ۴
۴- قاتیق فتیری (یالین خمیرین اوزونه قاتیق یاخیب اونو قالین یاپاردی و بو فتیر هامیسیندان آرتیق قیزاراردی)، ۵
۵- ته ته (tƏ tƏ) (بو قالین چؤریی‌ده اؤزللیکله یاز چاغیندا داغ تره‌سینین واختیندا یاپاردی. آنام گئدیب داغدان یئملی اوتلاردان او جمله دن: یاغلیجا، قاز آیاغی، ماندا، سیغیر دیلی و باشقا دادلی – یئملی اوتلاردان دریب گتیریب و خمیرین ایچینه قویوب و بیر قالین و بؤیوک چؤرک یاپاردی بو قالین چؤرک هامیسیندان دادلی اولاردی.
بو چؤرک لر کندیمیزین دییرمانیندا دارتیلان اون‌لاردان اولدوغو اوچون و بو اون‌لار کپکلی (سبوسدار) اولدوغو اوچون، بیرده یاناجاقلاری آغاج و تزک (حئیوانلارین فضولاتی) اولدوغو اوچون چوخ دادلی اولاردی.
آنامین تندیرینده چوخلو شیرین آنلاریم اولوبدور، یاز ایله یای‌دا مکه، ات کابابی، یئر آلما کابابی بیشیرردیک، پاییزایله قیشدا ایسه چؤرک یاپاندان سونرا هامیمیز بیرلیکده آیاقلاریمیزی تندیره ساللاییب، آنام ایسه بیزه ناغیل دئیردی.
کاش او گونلر بیر ده قاییتسایدی! … کاش!
