بو فانی دونیادان من کوچ ائدنده

هامی سؤیلردی دوستومدو، تانیشدی

نه بیرکس بیلدی دردین، قاندی سیررین

کی یانقین اودلارا، یاندی، آلیشدی

حیاتین گونلرینده، آلتمیش ایلده

دوشوب، قالخیب، سوروندو، چاخنالاشدی

یاشاییش صحنه‌سینده دفعه‌لرله

قارا بختیله گاه کوسدو، باریشدی

من ایله شادمانلیق، ایللریله

کنار گزدی، اوزاقلاشدی، ساواشدی

درنده محصولون، غم- غصه دردی

قالاندی، دالغالاندی، آشدی، داشدی

بو دونیا محنتی قورتولمامیشدان

دئدی زاهید، ایشین اوردا دا یاشدی

اؤلومدن جور به‌جور تعریفلر وار

کلامین قیساسی: قورتولدو، قاشدی

بو چیرکین دونیانی هئچ سئومه‌دیم من

اوره‌ک اییرندی، گؤزلر ده قاماشدی

بو بیر حسرتدی هئچ واخت چاتماق اولماز

هوسدی، آرزیدی، بی‌خود تلاشدی

هره بیر نوعیله تابلاشدی، دوزدو

قلم تابلاشماییب، اوستونو آشدی

قالیبدیر “مجدفر”، کؤرپو  اوتایدا

سنی تک قویدو کاروان، چوخ آراشدی