۱
ملانی خانیم ونکووئرین یاغیشینی سئومزدی.
بو شهرین یاغیشی چوخ ساکیت ایدی. سسسیز یاغاردی؛ سانکی هئچکسی ناراحت ائتمک ایستهمیردی. آپارتمانین بؤیوک پنجرهلرینین اوستونده سوزولور، کوچه چیراغلارینی دومانلاندیراردی؛ آمما نه تورپاق قوخوسو وار ایدی، نه ده گؤی گورولتوسو.
ملانی خانیم پنجرهنین قاباغیندا دوروب ایسلانمیش کوچهیه باخیردی. گئجه ساعت اون بیره یاخین ایدی. تازه خستهخانادان قاییتمیشدی. آیاققابیلاری هله ده قاپینین یانیندا ایدی، ساچلاریندا ضدعفونی مادّهلرینین قوخوسو قالمیشدی.
ائوده سکوت وار ایدی.کیچیک اوغلو یاتمیشدی، بؤیوک اوغلو ایسه احتمالاً اوتاغیندا، قاپالی قاپینین آرخاسیندا، لپتاپ و قولاقلیقلا اوتورموشدو.
ملانی خانیم گؤزلرینی یومدو. بعضن فیکیر ائدردی کی حیاتی خستهخاناداکی دستگاهلارا بنزهییر؛ ایشلهین، دقیق، ایشیقلی… آمما روحسوز.
کیشیسینین اؤلوموندن بئش ایل کئچمیشدی. او یاغیشلی گئجهدن، تئلفونون چالدیغی گئجهدن بئش ایل. اوندان سونرا هر شئی فقط داوام ائتمیشدی. باشقا هئچ نه.
۲
هر سحر هامیدان تئز اویاناردی. چای دملهیر، اوغلانلارا سحر یئمهیی حاضیرلایار، سونرا آرام- آرام آغ خلتینی گئیینردی. ائودن چیخماقدان قاباق همیشه بیر نئچه ثانیه آینانین قاباغیندا دوراردی؛ بزهک اوچون یوخ، هله ده آیاغ اوستده اولدوغونا اطمینان تاپماق اوچون.
خستهخانادا هامی اونو سئوردی. پرستارلار دئیردیلر، «دوکتور ملانی خانیمین اؤزونه مخصوص بیر توختاقلیغی وار.»
خستهلر اونا اعتماد ائدردیلر. حتی اوشاقلار دا باشقا دوکتورلره نیسبت اوندان آز قورخوردولار؛ آمما ملانی خانیم بیلیردی کی بو توختاقلیق اصلینده یورغونلوقدان باشقا بیر شئی دئییل.
بعضن نسخه یازارکن، دهلیزدن تانیش بیر عطیر قوخوسو گلردی و اورهیی سانکی بیر آنلیغا دایاناردی. آخی،کیشیسی همیشه بئله عطیرلهنردی. سونرا یابانچی بیر کیشی کئچیب گئدردی و هر شئی بیتردی. ملانی خانیم باشینی آشاغی سالیب دوباره نسخه یازماغا داوام ائدردی.
۳
تانیشلیقلاری بیر شکیلله باشلادی.
بیر گئجه ملانی خانیم اینترنت صفحهسینده بیر نئچه آغ گولون عکسینی پایلاشمیشدی؛ هئچ بیر یازی اولمادان. صبح اویاناندا بیر مئساژ گؤردو:
– هله ده گول سئچه بیلن بیر اینسان تمامیله سوسماییب.
مئساژی بیر نئچه دفعه اوخودو. نه عاشقانه ایدی، نه ده عادی. جواب یازمادی؛ آمما آخشام اوستو یئنیدن بیر مئساژ گلدی:
– ونکووئرین یاغیشی اینسانا اونودا بیلمهدییی شئیلری خاطیرلادیر.
بو دفعه ملانی خانیم یازدی:
– بعضی شئیلر اونودولمامالیدیر.
کیشی بیر نئچه دقیقهدن سونرا جواب وئردی:
– آمما بعضی اینسانلار خاطیرهلرده یاشاییرلار کی یئنیدن یاشاماق مجبوریتی اولماسین.
ملانی خانیم تئلفونو یانا قویدو. قیزغین دئییلدی، آنجاق حیسس ائدیردی بیریسی ایللردیر هئچ کسین گؤرمهدییی بیر یئره یاخینلاشیب.
۴
کیشینین آدی حاتم ایدی. شاعر دئییلدی، آمما شاعر کیمی دانیشاردی. بعضن یارپاقلاردان، بعضن موسیقیدن، بعضن ده یاخیندان سئومکدن قورخان اینسانلاردان یازاردی. ملانی خانیم ایسه عادتاً قیسا جواب وئرردی؛ آمما گئجهلر، اوغلانلار یاتاندان سونرا، مئساژلاری یئنیدن اوخویاردی.
بیر گئجه حاتم یازدی:
– سن چوخ یورغونسان.
ملانی خانیم اوزون مدت صفحهیه باخدی. سونرا فقط یازدی:
– هامی یورغوندور.
حاتم جواب وئردی:
– یوخ. بعضیلرین فقط یاتاغی آزدی. سن حیاتدان یورولموشسان.
او گئجه ملانی خانیم گئج یاتدی.
۵
ایلک گؤروشلری دنیز قیراغیندا بیر کافهده اولدو.
ملانی خانیم تئز گلمیشدی. ایکی دفعه گئری قاییتماق ایستهمیشدی.
حاتم ایچری گیرنده، او اؤزونه گووهنن و نمایشچی کیشیلره هئچ بنزمیردی. ساکیت ایدی. بیر آز یورغون ایدی. آغارمیش ساچلاری و چوخ سوسغون گؤزلری وار ایدی. اوتوراندا یالنیز دئدی:
– سلام دوکتور.
و ملانی خانیم اختیارسیز گولدو. اؤزو ده بیلمیردی آخرین دفعه نه واخت بئله ساده گولموشدو.
او گئجه داها آرتیق حاتم دانیشدی: مهاجرتدن، تنهالیقدان، قیرخ یاشدان سونرا اینسانلارین عاشق اولماقدان چوخ، اؤزلری اولابیلهجکلری بیر یئر آختاردیغیندان…
ملانی خانیم یالنیز دینلهییردی، آمما ایچیندن بیر پارچا هله ده قاچماغا حاضیر ایدی.
۶
ائوه قاییداندا کیچیک اوغلو هله یاتمامیشدی. دیوانین اوستونده اوزانمیشدی، تئلفونلا اویناییردی. آناسینی گؤردوکده دئدی:
– بو آخشام سن داها خوشبخت گؤرونورسن.
ملانی خانیم پالتوسونو یاواشجا چیخارتدی.
– هارادان بیلدین؟
اوغلان چییینلرینی چکدی.
– بیلمیرم… اوزون فرقلیدیر.
سونرا یئنه باشینی آشاغی سالدی.
آمما او بیر جومله، ملانی خانیمین گئجه یاریسی حمام آیناسی قاباغیندا اوزون مدت اؤز- اوزونه باخماسینا بس ائدردی. ایللر ایدی اؤزونه بئله باخمامیشدی.
۷
سونراکی گؤروشلری داها ساکیت کئچدی. بعضن دنیز قیراغیندا گزیردیلر؛ بعضن ساده بیر شام یئییردیلر؛ بعضن ایسه یالنیز قهوه ایچیردیلر.
حاتم هئچ واخت تلسمیردی. نه مناسیبتدن دانیشیردی، نه ده گلهجکدن. اونون بو داورانیشی، ملانی خانیمی داها چوخ قورخودوردو. ظننینجه، هئچ نه ایستهمهین اینسانلار داها تهلکهلیدیرلر. چونکی اینسان اؤزونون نهدن قوروندوغونو آنلامیر.
بیر آخشام ساحیلده حاتم بیردن سوروشدو:
– سن سون دفعه نه واخت توختاقلیق حیسس ائتمیشسن؟
ملانی خانیم جواب وئرمهدی. بیر نئچه دقیقهدن سونرا پیچیلدادی:
– بیلمیرم.
حاتم ساکیتجه دئدی:
– شاید توختاقلیغی حیسسسیزلیکله سهو سالمیسان!
سویوق کولک اسیردی. ملانی خانیم ایللردن سونرا ایلک دفعه آغلاماق ایستهدییینی حیسس ائتدی.
۸
او گئجه کیشیسینی یوخودا گؤردو. همیشه کیمی ساکیت ایدی. پنجرهنین یانیندا دورموشدو و هئچ نه دئمیردی. ملانی خانیم اونا یاخینلاشماق ایستهییردی، آمما حرکت ائده بیلمیردی.
اویاناندا اورهیی آغیر ایدی. بوتون گون خستهخانادا فیکری داغینق قالدی. آخشام حاتم مئساژ یازدی:
– یاخشیسان؟
ملانی خانیم فقط بو سؤزلری یازدی:
– گؤرونور اونا خیانت ائدیرم.
بیر نئچه دقیقهدن سونرا جواب گلدی:
– سنی سئون کیشییه… یوخسا ایللردیر یاشامایان قادینا؟
ملانی خانیم تئلفونو سؤندوردو؛ آمما او جومله بوتون گئجه ذهنینده قالدی.
۹
بؤیوک اوغلو آز دانیشیردی؛ آمما آناسینداکی دهییشیکلری باشا دوشموشدو. بیر آخشام شام یئینده سوروشدو:
– حیاتیندا بیرى وار؟
ملانی خانیمین الی استکانین اوستونده دوندو. بیر نئچه آن سوسدو. سونرا دئدی:
– فقط بیر دوست.
اوغلو اونا باخدی. نه عصبی ایدی، نه ده اینجیک. فقط غمگین ایدی.
– آتامی اونوداجاقسان، ائلهمی؟
بو سؤز ملانی خانیمین کؤکسونه یاواشجا تاخیلان بیر بیچاق کیمی اولدو. او گئجه سحرهجک یاتمادی.
۱۰
بیر نئچه گون سونرا گؤروشلری یاخشی کئچمهدی. حاتم بیر شئیین دهییشدییینی حیسس ائتمیشدی.
– گئری چکیلیرسن؟
ملانی خانیم یورغون سسله جواب وئردی:
– شاید داوام ائتمهمهلییک.
حاتم بیر مدت سوسدو؛ سونرا آهسته سوروشدو:
– نه اوچون؟
ملانی خانیم گؤزلرینی پنجرهدن چکدی.
– چونکی آرتیق او قاباقکی اینسان دئییلم.
حاتم آجی بیر تبسّومله دئدی:
– هئچ بیریمیز دئییلیک.
آمما ملانی خانیم باشقا هئچ نه دئمهدی.
۱۱
بوندان سونرا بیر نئچه گون دانیشمادیلار. ائو یئنه ساکیتلشدی. ملانی خانیم قاباقکی حیاتینا قاییتدی. خستهخانا… مارکت… یئمک… پالتارلار… حسابلار. آمما ایندیکی سکوت فرقلی ایدی. قاباقلار قالین یورغان کیمی ایدی؛ ایندی ایسه بوش بیر اوتاغا بنزهییردی.
بیر گئجه شدتلی یاغیش یاغارکن، بیردن دوشوندو کی دانیشماق اوچون داریخیب. عشق اوچون یوخ… گؤرولمک اوچون.
۱۲
بیر نئچه گئجه سونرا حاتم یئنه مئساژ یازدی:
– بو گئجه یاغیش تبریز قوخوسو وئریر.
ملانی خانیم اوزون مدت صفحهیه باخدی.
«تبریز» آدی اونا گنجلییینی، دانیشگاه ایللرینی، تویونو و آرازلا کئچن آجی-شیرین خاطیرهلری خاطیرلاتدی. بیر داملا گؤز یاشی یاناغیندان سوزولدو. سونرا یازدی:
– من خوشبختلیکدن قورخورام.
بو دفعه جواب فوراً گلمهدی. اون دقیقه سونرا فقط بیر جمله گلدی:
– بیلیرم.
و عجیب ایدی کی آنلاشیلماق اونو داها چوخ آغلاتدی.
۱۳
قیش یاواش-یاواش بیتیردی. بیر سحر کیچیک اوغلو مطبخه گیردی، تعجبله سوروشدو:
– آنا… گول آلمیسان؟
ملانی خانیم ماسانین اوستوندهکی کیچیک آغ گولدانا باخدی. سولغون بیر گولومسهمه ائتدی.
– هه
اوغلو یاخینلاشدی.
– گؤزلدی.
سونرا بیر آز دایانیب دئدی:
– ائو داها آز غمگیندیر.
ملانی خانیم هئچ نه دئمهدی. فقط اورهیینده ساکیت بیر آغری حیسس ائتدی.
۱۴
اونلار یئنه گؤروشدولر. بو دفعه داها ساکیت؛ داها دفاعسیز. حاتم آرتیق آز دانیشیردی. سانکی آنلامیشدی کی بعضی اینسانلارا یارالی قوشلارا یاخینلاشان کیمی یاخینلاشماق لازیمدیر، صبیرله. ساحیل بویو گزرکن بیردن دئدی:
– من هئچ کسین یئرینی توتماق ایستهمیرم.
ملانی خانیم آهسته دئدی:
– بیلیرم.
حاتم داوام ائتدی:
– فقط ایستهمیرم عؤمرونون قالانینی سؤنموش کیمی یاشایاسان.
ملانی خانیم باشینی آشاغی سالدی.کولک ساچلارینی قاریشدیرمیشدی. ایلک دفعه کیشینین الینی توتماق ایستهدی، آمما توتمادی.
۱۵
بیر نئچه هفته سونرا حاتم، شاید ونکووئردن گئتمهلی اولاجاغینی سؤیلهدی. باشقا بیر شهرده موقتی ایش تاپمیشدی. بونو دئینده ملانی خانیم فقط باشینی ترپتدی؛ آمما گئجه ایشیقلار سؤنندن سونرا بیردن حیسس ائتدی کی ایچینده بیر شئی چؤکور.
ایللرایدی هئچ نه ایتیرمهمیشدی. چونکی آرتیق هئچ نهیه باغلانمیردی.
۱۶
سون گون ساحیلده گؤروشدولر. هوا بولودلو ایدی. دنیز بوز گؤرونوردو. اوزون مدت دانیشمادیلار. سونرا حاتم دئدی:
– هله ده قورخورسان.
ملانی خانیم آهسته گولومسهدی.
– هه
– نهدن؟
قادین سویا باخدی.
– یئنیدن دیریلمکدن.
حاتم هئچ نه دئمهدی. فقط الینی یاواشجا اونون الینین اوستونه قویدو و ملانی خانیم بو دفعه الینی گئری چکمهدی.
۱۷
حاتم گئدندن سونرا بیر نئچه هفته دومان کیمی کئچدی. ملانی خانیم یئنه ایشلهییر، یاتیر، اویانیردی؛ آمما آرتیق بیر شئی دهییشمیشدی. او آرتیق یالنیز دؤزمهیین بس اولدوغونا اؤزونو ایناندیرا بیلمیردی.
بیر گئجه کیشیسینین چرچیوهلی شکلینی ماسانین اوستوندن گؤتوردو. اوزون مدت باخدی. سونرا آهسته دئدی:
– من سنی هله ده سئویرم… آمما فقط ساغ قالماقدان یورولموشام.
و ایللردن سونرا ایلک دفعه اؤزونو گوناهکار حس ائتمهدی.
۱۸
یاز گلمیشدی. یاغیش هله ده یاغیردی، آمما داها یوموشاق. ملانی خانیم او گون خستهخانادان تئز قاییتدی. اوغلانلار هله ائوده دئییلدیلر. چای حاضیرلادی، پنجرهنین یانیندا اوتوردو و اوزون مدت کوچهیه باخدی. سونرا بیردن تئلفونونو گؤتوردو. بیر مدت فقط صفحهیه باخدی. سونرا یازدی:
– بورادا هله ده یاغیش یاغیر.
بیر نئچه دقیقه سونرا جواب گلدی:
– اورادا همیشه یاغیش یاغاجاق.
ملانی خانیم گولومسهدی.
ایللردن سونرا ایلک حقیقی تبسّومو ایدی.
۱۹
آخشاماوستو پنجرهنی آچدی. سرین هاوا و یاغیش قوخوسو ائوه دولدو.کوچهدن اوشاقلارین گولوش سسی گلیردی. ملانی خانیم گؤزلرینی یومدو و ایلک دفعه حیسس ائتدی کی بلکه حیات هله بیتمهییب. عاشق اولدوغو اوچون یوخ، یالنیز یئنیدن بیر شئی حیسس ائده بیلدییی اوچون.
۲۰
گئجه اوغلانلار ائوه قاییداندا کیچیک اوغلو تعجبله دئدی:
– آنا… پنجره آچیقدیر.
ملانی خانیم یاغیشا باخدی. سونرا آهسته سسله دئدی:
– قوی بیر آز هوا دهییشسین.
ونکووئر یاز آیی ۲۰۱۴
