یاییلان خبرلر اساسیندا، تاسفله زنگانین گؤرکملی اوستاد صنعتکاری «عاشیق مسلم عسگری» آذر آیی‌نین یئددینجی گونو وفات ائتمیشدیر.
عاشیق مسلم عسگری ۱۳۱۷-جی گونش ایلی «تاریم» ماحالی‌نین «بادامستان» کندینده آنادان اولموش و آذربایجانین، ائله‌جه‌ده زنگانین اوستاد صنعتکارلاری سویه‌سینه یوکسلمیش و یارادیجی عاشیقلار سیراسیندا آدی چکیلمیشدیر.
اوستاد عاشیق مسلم عسگری‌نین روایتی اساسیندا آذربایجان شیفاهی خالق ادبیاتی نمونه‌لریندن ۲۷ داستان، دکتر محمد رزاقی و مصطفی رزاقی جنابلارینین تشبثی ایله، «داستانلار» کیتابی باشلیغی آلتیندا یاییلمیش و اوستادین یاراتدیغی «میرزا کاظیم» داستانی دا بو کیتابا داخیلدیر. بوندان علاوه اوستادین شعرلرینی احتوا ائدن «ائل آشیغی» شعر توپلوسو دا ۱۳۹۹-جی ایل نشر ائدیلمیشدیر. بو کیتابا دا اوستادین، اوستادنامه، قوشما، گرایلی، غزل، جیغالی تجنیس، وجودنامه و دیگر قالب‌لردن یازدیغی شعرلری داخیل ائدیلمیشدیر.
اوستاد عاشیق مسلم عسگری‌نین جنازه‌سی آذر آیی‌نین سکگیزینجی گونو بهشت زهرا مزارلیغیندا سئونلری و قوهوم- اقرباسی‌نین اشتراکی ایله تورپاغا تاپشیریلمیشدیر.
ایشیق- آذربایجان ادبیات و اینجه صنعت سایتی امکداشلاری آدیندان گؤرکملی صنعتکارین ایتگیسینی آذربایجان خالقینا، اوستادین محترم عائله‌سینه و سئونلرینه باش ساغلیغی وئریر و خاطیره‌سینی عزیزله‌ییریک.

ایشیق- آذربایجان ادبیات و اینجه صنعت سایتی
۹ آذر ۱۴۰۴