نئچه ایللر
من اؤزومله داشیمیشام هیجران یوکو،
یاشامیشام حسرت داغی.
یاشیم آرتیب قوجالمیشام،
گؤزوم یاخشی سئچه بیلمیر
نه یاخینی، نه اوزاغی!!
واختی چاتیب
قاپالی سیر صاندیغیمدان
گیزلی- گیزلی ساخلادیغیم
«یاساق سئوگی» سیرلریمی آچیم سیزه.
ایسته‌ییرم
چکدیکلریم دوشه دیله
گنجلییمده سئودیگیم او قیز دا بیله؛
بیله کی من
ماراقلانیب آرامیشام،
دوست- تانیشا اوز توتموشام
مین بیر عونوان آلاراق، من آختارمیشام هر بیر کونجو بو شه‌هرده.
سنی مندن،
منی سندن گیزلتدیلر،
دوزنلییه سؤیکنن او عزتلی‌لر
سئوگی سؤزون
لاغا قویوب هئی گولدولر،
لوغتلریندن سیلدیلر،
اونلار بیزی محو ائتدیلر…
تاپماسام دا سئوگیلیمی
هرچند گیزلی،
آمما اونو اوره‌ییمده یاشاتمیشام؛
کاش بیله کی،
بیله کی من
دؤنمه‌میشم اؤز عهدیمدن، ایلقاریمدان.
چوخداندیر بیر قورخو چؤکوب اوره‌ییمه
زهر قاتیب چؤره‌ییمه؛
قورخوم بودور
او بیلمه‌دن، دینله‌مه‌دن اوره‌ییمی
کؤچوب گئده‌م بو دونیادان.
کاش اونا من
بیرجه دفعه دئیه بیلم
دئیه بیلم:
اللرینی اللریمه کاش وئرئیدین،
سینه‌م اوستده
قولاغینی سؤیکه‌یه‌رک
دینله‌یئیدین اوره‌ییمین دؤیونتوسون،
حزین سسین.
کاش بیلئیدین
آنجاق سنی،
آنجاق سنی سسله‌ییر او.
منیم
بوتون شعیرلریم
سندن آلیب اؤز عطرینی؛
دادین، دوزون، ایلهامینی سندن آلیب.
بعضن حتتا
گؤزله‌میشم من ده سنی؛
کاش گلئیدین،
سن گلنده
توپوق ووروب تیتره‌مه‌یه کاش‌کی دیلیم!
کاش‌کی سنه دئیه بیلیم:
من نه قده‌ر،
من نه قده‌ر سئودیییمی.
کاش بیلئیدین
یادداشیمدان سیلینمه‌سی قورخوسویلا
تصویرینی،
هم سسینی
ایللر بویو تکرار- تکرار خاطیرلادیم
مکتبده درس ازبرله‌ین اوشاق کیمی.
من یاشاتدیم –
خاطیره‌می سنسیزلیک‌له
من یاشادیم خاطیره‌می –
هرگون، هرگون خیالیمدا
سندن خبر تاپماسامدا.
بیر قلمیم، بیر آغ کاغیذ
حاضیر ایدی حاضیر منیم اوز ماسامدا،
سنین اوچون شعیر یازیب،
خیالیمدا سنین اوچون اوخوسام دا.
کاش گؤرئیدین
هر گون گلیب کوچه‌نیزدن کئچمه‌ییمی،
قاپینیزا حسرت- حسرت باخیشیمی،
نیشانینا توش گلمه‌ین اووچو کیمی-
ساللاق- ساللاق آخیشیمی.
کاش بیلئیدین
یوخولاردا سئیره چیخیب،
دولانمیشیق کئچمیشده‌کی گونلر کیمی؛
بعضن لئیسان یاغیش آلتدا
بیز چتیرسیز آددیملاییب
کئچمیشلردن دانیشمیشیق؛
آغاجلارین گولون دریب
من تاخمیشام ساچلارینا؛
کیمسه بیزی،
بیرگه گؤرن اولار دئیه،
تئز- تئز یولو ده‌ییشمیشیک؛
یا دؤنوب بیز بیر کافه‌یه
تزه دملی چای ایچمیشیک؛
بعضن تیاترا گئتمیشیک
بعضن کونسئرت‌ده اوتوروب
موسیقی‌لر دینله‌میشیک؛
گاه کوسموشوگ،
باریشمیشیق؛
گؤزه‌ل گونلر یاشامیشام من سنینله یوخولاردا.
کاش بیلئیدین
سنسیز عؤمروم نئجه کئچیب!
سانکی تانری
بوحسرتی، بو طالعی
یاشاماقچون منی سئچیب!
سنسیزلییه اؤیرنسم ده
سنه الیم چاتماسادا
سنه
خوشبخت، گؤزه‌ل حیات
آرزولاردیم من همیشه.
گؤزه‌ل گولوم!
حیاتیمدا
سندن قاباق،
سندن سونرا
سنین قده‌ر سئومه‌میشم بیر کیمسه‌نی.
عؤمروموزون چوخو گئدیب،
آزی قالیر؛
گئتدیکجه شانسیم آزالیر.
اگر سنی من گؤرمه‌دن حیاتیمی ده‌ییشرسم
سون ایسته‌ییم بودور سندن:
سن باغیشلا گوناهیمی، قصورومو
وارسا اگر!
بلکه هاردا اوره‌یینه ده‌یمیشم‌سه، سن باغیشلا!
اونوتما کی گؤروش یئری هله واردیر،
هر گون آخشام
ساعات بئش‌ده
من اوردایام؛
همن یئرده کولک اسه،
یاغیش یاغا یا قارلایا،
طوفان گله فرقی یوخدور
من اوردایام، گؤزوم یولدا.
کاش بیر گئجه گله بیلم من یوخونا،
لاپ اوزاقدان سنی گؤروب
اوره‌ییمی اووندورسام منه یئتر.
مومکون اولسا یاخینا گل!
بارماقلاریم ساچلارینا بیر توخونا؛
اوره‌یینی
آچ سوفره تک منیم اوچون!
دانیش من‌له،
چوخ- چوخ دانیش،
اوزات سؤزو بهانه‌یله!
آمما منی هئچ قیناما،
نئجه کی من قینامیرام!
بیز
تام یانلیش عادتلرین قوربانییق؛
بیزیم اورتاق سوچوموزدور«اصیل سئوگی».
اونلار
هوسله سئوگینی بیر- بیریله قایناتدیلار،
اؤزه‌ل معجون چیخارتدیلار؛
چاش باش سالیب حقیقتی
فاجیعه‌لر یاراتدیلار.
سئوگی‌نین او
قوتساللیغین
گولونج ائدیرلر هله ده،
محبته سایی قویوب
عونوان وئریرلر هله ده،
ایلکین سئوگی
ایکینجی عشق
سون محبت، و هابئله ….!
سئوگی البت یگانه‌دیر، مقدس‌دیر-
دئیه، اینسان بیرجه دفعه سئوه بیلیر.
سئوه‌ن اوره‌ک اسیر دوشور،
قاچغین اولور،
لاپ دا دؤزور گرگینلییه،
آنجاق خیلاص اولا بیلمیر اؤلنه‌دک.
سئوگی‌نین
نه ایلکی اولور، نه ده سونو.
بیز توپلوما
گرکمه‌ین اینسان اولدوق،
گئرچک ایکن یالان اولدوق.
اونلار
سنی ایلیم- ایلیم ایتیردیلر.
اونلار
منیم اوره‌ییمین درینلییین
دقیق اؤلچوب،
سنسیزلییین آجیسینی
سومویومه اؤتوردولر.
