پاییزدان پاییمی آلانمامیشام،
سانکی گؤیلرینده یاشی گئدیبدی!
نسیل‌لر کیمی ده چؤنوب فصیل‌لر،
کوسوب طبیعتین قیشی گئدیبدی!
بولودلار باشیمین اوستن سان گئدیر،
گاه یاخین دولانیر، گاه‌دان یان گئدیر،
صؤبحه یئتیرمه‌دن اوباشدان گئدیر،
ائله بیل بوستانا ناشی گئدیبدی!
چشمه‌لر قورویوب، چای‌لار آغلاییر،
سئللرین یئرینده داش- قوم چاغلاییر،
داشا ال وورورسان الی داغلاییر،
اوجا زیروه‌لرین قاشی گئدیبدی!
داغیلیب، وئرانا قالیب یایلاق‌لار،
چیچکلر پوزولوب، سولوب اویلاق‌لار،
بیر یولچو گؤزله‌ییر جیغر یولاق‌لار،
اوچوب بره‌لردن قوشو گئدیبدی!
حیاتدا قالماییب سئوگی‌دن نیشان،
نه یاغمور گؤرونور، نه قار، نه بوران،
«روشن» یاشامایا نه داغ، نه آران،
اله‌نیب تورپاغی- داشی گئدیبدی!
