۱۸ یاشلی ترجمه‌چی «آی‌سو اصلانیان»ین انگلیسجه‌دن ایکینجی چئویریسی کیتاب شکلینده نشر اولدو.
«آی‌سو اصلانیان» آذربایجانین قدیم شهرلریندن اولان میانا شهرینده یاشاییر و ایکینجی چئویریسی «فرقلی چای» باشلیغی آلتیندا «آذرتوران – نباتی» انتشاراتی طرفیندن شکیللی و بویالی فورمتده یاییلمیشدیر.
«فرقلی چای» کیتابی ویتنام‌لی یازیچی «بائو فی»نین اثری‌دیر. بو اثر فارس دیلینده ده «دریاچه‌ای دیگر» آدیندا «نازنین فیروزی»نین ترجمه‌سیله «چار» انتشاراتی طرفیندن یاییلیبدیر.
«فرقلی چای» کیتابی ساده، گؤزل و معنا‌لی عائله حکایه‌سی‌دیر و آمریکادا یاشایان بیر عائله‌نین گونده‌لیک حیاتینی ایضاح ائدیر و عائله عضو‌لری‌نین آراسینداکی درین و قیریلماز علاقه‌نی و اونلارین اؤز آنا وطن‌لرینه اولان دویغولارینی، بالیق توتماق اوچون ائتدیک‌لری قیسا بیر سفرده گؤستریر.
«آی‌سو اصلانیان»ین«فرقلی چای» چئویریسی ۳۲ صحیفه‌ده و ۱۰۰۰ نوسخه‌ده یاییلیبدیر. بو کیتابی ۱۰۰۰۰۰ تومن قیمتینده آشاغیداکی آدرسدن الده ائتمک اولار:
تبریز- مابین سه‌راه طالقانی و تربیت- مجتمع تجاری استاد شهریار- طبقه زیر همکف- پلاک ۴۶- تلفن: ۳۵۵۴۷۵۱۰
«آی‌سو اصلانیان»ین بیرینجی چئویریسی ۴۶ صحیفه‌ده، یولداشی «آیناز کیانی‌ماوی»نین امکداشلیغی ایله ۱۴۰۰نجی ایل «سو پریسی» آدیندا آذربایجان تورکجه‌سینه ترجمه اولوب و «کمچی» انتشاراتی طرفیندن ۱۰۰۰ نوسخه‌ده یاییلیبدیر. بو کیتاب «والت دیسنئی» کیتابلاری سیراسینداندی.
