آذربایجانین گؤرکملی تاریخ تدقیقاتچیسی دوکتور «سیروس برادران شکوهی»، اسفند آیی‌نین ۲۱نجی گونو یاشادیغی تبریز شهرینده وفات ائتدی.
دوکتور «سیروس برادران شکوهی» ۱۳۱۵-جی ایل تبریز شهرینین سورخاب محله‌سینده دونیایا گؤز آچمیش؛ تحصیلینی دوغما شهرینده تاریخ و جغرافیا اوزره لیسانس درجه‌سی ایله تماملامیش‌دیر. سونرا، یوکسک لیسانس آلماق اوچون تهران دانیشگاهینا داخیل اولموش و تحصیلی بیتدیکدن سونرا تورکیه‌یه گئتمیش و تاریخ اختصاصی اوزره دوکتوراسینی آنکارا دانیشگاهیندان الده ائتمیشدیر.
1354-جو ایلده تبریز «دانشسرای مقدماتی»سینین تاریخ درس‌لیگی‌نین بیرینجی حصه‌سینی -صفوی سلسله‌سیندن باشلایا‌راق، محمدشاه قاجار دؤرونه قده‌ر- یازمیشدیر. او، هر زامان معاصر ایران و آذربایجان تاریخی اوزه‌رینده آراشدیرما‌لارینی، خصوصیله ده قاجار دؤرو، مشروطه حرکاتی و ژورنالیسم تاریخی موضوعلاریندا چالیشمالارینی داوام ائتدیرمیشدیر.
دوکتور «سیروس برادران شکوهی»نین اثرلریندن «تاریخچه روزنامه‌نگاری در تبریز از آغاز تا حال»، «زندگی‌نامه میرزا جواد‌آقا سلطان‌القرایی»، و «یادداشت‌های میرزا اسداله ضمیری ملازم خاص ثقه‌الاسلام شهید» کیتابلارینا اشاره ائتمک اولار. بونلاردان علاوه اونون تاریخی مقاله‌لری‌نین ده سایی اون‌لار مقاله‌دن آرتیقدیر.
ایشیق- آذربایجان ادبیات و اینجه صنعت سایتی امکداشلاری آدیندان گؤرکملی تاریخ تدقیقاتچیسی دوکتور «سیروس برادران شکوهی»نین ایتگیسینی حؤرمتلی عائله‌سینه، دوست و تانیشلارینا باش ساغلیغی وئریر و خاطیره‌سینی عزیزله‌ییریک.
ایشیق- آذربایجان ادبیات و اینجه صنعت سایتی
۲۲/۱۲/۱۴۰۳
