بویوم دوکانلارین یوزه‌بیری قده‌ر
قالدیریملار بویونجا
بولوارلارین آغاجلاری‌نین بئله‌سیندن
اینسان اوغلونون آغزی نه‌دیر بویومو اوزسون
بویوم دایاز اورتا، درین یارغان
بوی وئرر ده، بوی وئرمز ده
بللی‌می اولور؟
بویوم ییرغالانان شیشک قویروغونا یانداش
بویوم بالاجا قاریجلا دوققوز
ییغجام اوووجلا صیفیر
بیلگه الینده آلتین
بویوم تورکجه‌بسته
باغلی قوتو
آغیز آچدیرماز
سونوج‌‌سوز چاتیشمالارا سوسوب دوران
قونوشمالارا الینده قیرمیزی Stop گؤستردن
یوللاردان اوزون اوفوقه دیره‌نن
نازلی لی‌لی‌پوت
لاله‌یه قان قیزیل قوسدوران گؤبه‌لک
۳۹ آیاق نؤمره‌سینه اوتورغون
یاناغیندان چیمدیک آلیناسی
یانیندا دورماسان ایپک باهاسینا
توتوش-موتوش.
اوزه‌ریندن ایچینده‌کی قیزیل گولو، ناری، هئیوانی
گؤروکدورن قورخاق شیمشاد دوواری
بالیقچی تورونا دوشموش آغ قیزیل
بالیقچی یاخالیغی‌یلا سویوق پاییز قیش.
بویوم آرزو قده‌ر
کیبریت قوتوسونون ایچینه سیغاجاق قده‌ر
یاشامی سئویب ساریلاجاق
هر شئیه توخاناجاق قده‌ر
زامان دا سئوگی‌نین آنلامینی او اوز، بو اوز ائده‌جک قده‌ردی
بویوم مر‌مر دریمله اویوشموش
قایغیلی دوشومو ساریب سارمالاییر
چوخ گونشلی اؤلکه‌سینه ساچماغی باشاریر
گئجه‌سی الیمده
ایسته‌دیییم رنگه بویانیرام
گونوزونه قاریشمام
او آرتیق سئوگی‌سینی سونا بیلن‌لره گوندور
بویوم سویوم- سویوم
عؤمور یوللاریما اونو یاشام یونتاج کیمی اویور
آتام کیمی
آنام کیمی یورویور.
