نه یاخشی، بوش‌ایدی اللریمیز
ایسته‌ییجه سیخاجایدی اللرینی
اینسانلیغین.
یئنیلمز بایراغدیر دئدین،
چیرمانمیش بیلک‌لر.
آددیملاریمیزدا دوغرولدو یوروش،
باریشا دؤیوشدوک قورد اوره‌یی‌یئمیش کیمی
اریدی دوزلویوموز اَیری‌لرده
پرده-پرده قالخدیق،
و آسیلدیق گؤیلرین یئددی قاتیندان
تانریلار اوتوردو چیینلریمیزده،
و گوناهلار ساریلدی اللریمیزه.
هئی …
یاشاماق نه قریب شئی بیزه.
یاشاماق اؤلمک‌دیر و اؤلمک‌دیر یاشاماق،
و بوراخیلماق حیاتین کوچه‌لرینده یییه‌سیز،
بیر جانلی اؤتمه‌دن دیوارلار گولمه‌دن،
سس بوشلوغوندا آددیملاماق،
باشقا بیر دونیا.
بؤیله‌دیر سوچلو، بیر عؤمور بورجلو،
ده‌ییشیک دونیایا گؤز آچیریق؛
قاچیریق،
قاچیریق،
قاچیریق …
کؤکلنمیش اویونجاغلار کیمی.
هارداسا اونودولور کؤرپه‌لیییمیز،
کیملر یاشاییر گنجلیییمیزی،
و دینجلیک،
بیزدن اوزاق گؤیلرده اوچان قوش کیمی،
و بیزه یاخین
دار آغاجلارینین باشیندا، اوتورموش کیمی‌دیر.