چوخ تاسفله یاییلان خبرلر اساسیندا، تانینمیش آذربایجانلی صنعتکار «ناصر جهان آرا» بیر مدت خسته‌لیکدن سونرا آبان آیی‌نین اوچونجو گونو آنادان اولدوغو تبریز شهرینده حیاتلا ابدیلیک وداعلاشمیشدیر.
1342نجی ایل تبریز شهرینده دونیایا گؤز آچان «ناصر جهان آرا» ایران و آذربایجان سویه‌سینده گؤرکملی پیانو ایفاچیسی اولموش و «۲۰ اثر»، «۴۰ اثر برگزیده» و «پیانو آسان» کیمی اثرلری ان چوخ قارشیلانان موسیقی اثرلری سیراسیندا ایدی.
اوستاد جهان آرا موسیقی تحصیلینی آذربایجان جمهوریسینده (باکی موسیقی آکادمیاسیندا) بیتیرمیش و آنا یوردو تبریز شهرینده بیر چوخ ده‌یرلی موسیقی اثرلرینین موللیفی اولموشدور. اوستادین پیانو صنعتی تحصیلینه دایر بیر نئچه کیتابی و اونلارلا اوغورلو و پارلاق پیانو چیخیشلاری یاددا قالان اثرلر کیمی صنعت دونیامیزا یادگار قالیبدیر.
ایشیق- آذربایجان ادبیات و اینجه صنعت سایتی- امکداشلاری آدیندان گؤرکملی آذربایجانلی صنعتکار و تانینمیش پیانو ایفاچیسی اوستاد «ناصر جهان آرا»نین ایتگیسینی حؤرمتلی عائله‌سینده و صنعت اجتماعیاتینا باش ساغلیغی سؤیله‌ییر، اونودولماز خاطیره‌سینی عزیزله‌ییر و عشق اولسون دئییریک.
ایشیق- آذربایجان ادبیات و اینجه صنعت سایتی
۴ آبان ۱۴۰۳
