یاییلان خبرلره گؤره، «خوی» شهرینین تانینمیش شاعرلریندن اولان «انزاب خویی» یاشادیغی تهران شهرینده حیات گؤز یومموشدور.
«انزاب خویی» تخلص ائدن شاعر «غلامرضا انزابی‌پور» ۱۳۱۴نجی ایل خوی شهرینده دونیایا گؤز آچمیش، ابتدایی و اورتا مکتبی خوی شهرینده اوخوموش، ۲۰ یاشیندان تهران شهرینه کؤچموشدور. همن ایلدن ادبیات و تاریخ موضوعلاریندا تحصیلینه داوام ائدن «انزاب خویی» آذربایجانین تانینمیش ساتیرا شاعری «کریمی مراغه‌ای»نین اثرلری ایله تانیش اولور و بو تانیشلیق اونون یارادیجیلیغیندا عؤمرونون سونونا قده‌ر درین ایز بوراخیر. او اؤزونو «کریمی مراغه‌ای»نین شاگیردی آدلاندیراراق، بیر چوخ ساتیریک شعرلر یازیر و اثرلرینین کلی مقدارینی اونونلا «کریمی مراغه‌ای»نین آراسیندا یارانان منظوم مکتوبلار تشکیل ائدیر.
تاسفله بو قوجامان شاعر شهریور آیی‌نین بیرینجی گونو یاشادیغی تهران شهرینده وفات ائدیر و تهرانین بهشت زهرا مزارلیغیندا تورپاغا تاپشیریلیر.
ایشیق امکداشلاری آدیندان آذربایجان شاعری «غلامرضا انزابی‌پور» (انزاب خویی)نین ایتگیسینی اونون حؤرمتلی عائله‌سینه و سئونلرینه باش ساغلیغی وئریر، بیر شعرینی عزیز اوخوجولارا تقدیم ائدیریک:
من جهانی یورموشام دورِ جهان نئیلر منه
چکمیشم دونیادن ال، یاخشی- یامان نئیلر منه
من کی یانمیش مهربان کؤنلوم محبت داغینه
جور و نازِ دلبرِ نامهربان نئیلر منه
من کی هر رنج و عذابه هر زمان قاتلاشمیشام
هر نه ایستر ائیله‌سین، قهرِ زمان نئیلر منه
نه وارا، نه دؤولته، نه شؤهرته دلبسته‌یم
طعنۀ بیجای هر پیر و جوان نئیلر منه
اول قده‌ر نامرد الیندن دلده وار دیل یاره‌سی
چسب زخم و یا ضماد و پانسمان نئیلر منه
من تناور بیر چنارم چوخ حوادث گؤرموشم
باد و باران، سیل و طوفانِ خزان نئیلر منه
روزگارین مؤحنتیندن سینه‌م آتشدان اولوب
برق خرمنسوز شیمشک‌دن شاخان نئیلر منه
من کی دونیانین الیندن ایچمه‌میشدن کئفلی‌یم
ساقیا مینانی دولدور، استکان نیئلر منه
باور ائیله هم سؤزومدن، هم اؤزومدن بئزمیشم
ایندی بوندان بئیله پندِ این و آن نئیلر منه
وئرمیشم «انزاب» بیر بی مهرِ مه رخساره دل
بیلمیرم آخیردا اول ابرو کمان نئیلر منه؟!
