منی قورخودانماز نه گورشاد، نه سئل
سیسقا گلن آغ یاغیشدان قورخورام.
قلبیمی تیترتمز نه هارای، نه های
ساکیت باخان بوز باخیشدان قورخورام.
عؤمور کئچیر سنسیز کئچن ایل کیمی،
آرزو سولور واختسیز سولان‌گول کیمی؛
غمی سونسوز، دوگون دوشموش دیل کیمی
زهرلنمیش سون گؤروشدن قورخورام.
ساچ آغاریر، گؤز تورالیر، یاش کئچیر
باهار گولور، زامان بیزه قیش کئچیر،
اوره‌ییمدن گؤزلریمه یاش کئچیر،
من اؤلسم ده بو نمیشدن قورخورام.
آی «سئوینمز» نئجه قورخور گؤر آدام
قورخا- قورخا عؤمور سورور هر آدام؟!
مین‌لر قادا، مین‌لر بلا بیر آدام؛
اؤلمه‌سم ده بو دؤیوشدن قورخورام.
