تبریزیمین گونئیینده
گونه وئریر اؤزونو آددیملانان اؤلولر
نفسلری اؤلوم قوخویان
دایانمادان، هوس‌لریندن ظولوم پؤسگورن
سانکی روحسوزجاسینا
یئرآلتی قوناقلیقلارینا یئم اولمایاجاق جانلاری.
گؤزلریم،
بیر‌به‌بیر گؤزونون آلتیندان کئچیردیر قبیر داش‌لارینی.
شانس‌‌گتیرن‌لر، یئتمیش‌له، تکه‌توک دوخسان آراسیندا،
چوخلاری یئتمیشی بئله حاقلایا بیلمه‌میش.
نه چوخ سولموش چیچکلر
گؤیرمیش قارا داش‌لار
قازیلمیش سینه‌لرینه نیسگیل دولو شعرلر.
بیر‌آندا اؤزومه توتولورام
داها نه قالدی‌کی…
بختین اولسا، یالنیز بیر نئچه ایل،
پاییزلی، قیشلی، بوران‌لی.
بیر آز داها گیجه‌لیرم پارلاق قارا گرانیتلر آراسیندا
دیریلمه‌یه جان آتیرام
داش اولورام، دیریلیرم
دیریلیرم، داش اولورام
داش اولورام، قایالارا چئوریلیرم.
شَهَریمین قوزئیینه گؤز آتیرام
داش بورویوب بور-بوجاغین.
هوس‌دن دوشموشم داها
من ده بیر داش، آددیملانیر اونا ساری.
یولا دوشورم، باشی آشاغا
آددیملانیرام، گونه وئریرم اؤزومو.
