(۱)
آرزیلاریم ایپک یولو یوللانیر
اوره‌ییم تبریزی بویلانیر
آخشام چاغلاری تبریزله‌نیرم
آغلاماغیم گلیر
آمما تبریزه آغلاماق یاراشماز
اورمونون گؤزیاشی قورویاندان بری
ساچلاریمدان آغلاییرام
آنجاق گؤرمه‌سین قاری دوشمان
دده قورقود دئمیشکن:
«اوجاق داشی یانماز!»
(۲)
گئدیرم
یوللاری سئوه- سئوه
یوللار دا یورغوندو، من ده
هله منه یولداش مهربان کؤلگم کی وار….
آمما یول تنهادیر تنها
بیلیرم کی آیریجلاریندا
سیخیلاجاق اوره‌ییم
گؤینه‌یه‌جک قامچی زولاقلی کوره‌ییم
(۳)
آآآ آی منه اوزانان بیر مهربان اَل
گلیب سیغاللایا اوره‌ییمین شاخدالاری‌نین قار چیچه‌یینی
اوخشایا یاسدیغیمین سس‌سیز کوچه‌یینی
جانلاندیرا سئللوللاریمین قارانلیق سیللوللارینی
گوج آلارام اوندا گؤزلری‌نین بولاغیندان
منده بنووشه‌لر بیتر
منده منلیک یئتر
چانقیللی بولاغیمین کؤپوک قیزلاری
یاللی گئده‌ر قارا دنیز هاواسی
دئیَر:
گلدیم اوی ی ی ی ی ….
آذاربایجان سئلجانی.
