آذربایجانین گؤرکملی شاعر، ژورنالیست و فولکلور تدقیقچیسی «سوسن خانیم نواده‌رضی»نین وفاتی‌نین قیرخینجی گونو موناسیبتینه صنعتکارین مزاری باشیندا طنطنه‌لری مراسیم کئچیریلدی. شنبه گونو اردیبهشت آیی‌نین ۲-سی ساعات ۱۱-ده تبریز شهرینین وادی رحمت مزارلیغی‌نین صنعتکارلار بؤلومونده بیر چوخ آذربایجان یازیچی، شاعر، تدقیقاتچی و اجتماعی مدنی شخصیتلرینین اشتراکیلا کئچیریلن بو مراسیم «ائل بیلیمی موسسه‌سی» طرفیندن ترتیب ائدیلمیشدی.
مراسیم رادیو و تلویزیون آپاریجیسی جناب «جلیل‌نژاد»ین گؤزل آپاریجیلیغی ایله قئید اولوندو. ایلک چیخیش ائده‌ن سوسن خانیمین باجیسی «لادن نواده‌رضی» اولدو؛ سونرا ایسه ائل بیلیمی مؤسسه‌سی‌نین بانی‌سی و مدیر عاملی، تانینمیش اجتماعی شخصیت و فولکلور تدقیقجیسی جناب «علیرضا صرافی»، گؤرکملی آذربایجان یازیچیسی «رقیه کبیری»، تانینمیش مغنی و موغام ایفاچیلاری«سولماز خانیم بالایی» و «حسین ملکی‌زاده»، رئژیسور «ملیحه خانیم واعظی» و دوکتور «میکائیل نظری» سوسن خانیم نواده‌رضی شخصیتی، یارادیجیلیغی، گؤردویو ایش‌لر و ادبی مدنی فعالیتلری حاقیندا و اونونلا باغلی خاطیره‌لریندن دانیشدیلار.مراسیمین سونوندا سوسن خانیمین اوغلو جناب «فواد حسن‌حسین» مجلس اشتراکچیلاریندان تشکر ائدیب و تدبیره سون قویدو.
مراسیمده دانیشانلاردان باشقا، بیرچوخ آذربایجان ادبی اجتماعی شخصیتلری او جومله‌دن: نیگار خیاوی، زهرا آبدار، کبری میرحسینی، مرجان مناف‌زاده، اولکر تبریزلی، گونش امانی، اولدوز طهماسب‌زاده، شبنم توحیدی( تانسو)، قاسیم تورکان و … برابر، داغچی قادین‌لار، ائل بیلیمی موسسه‌سی و مهد تمدن(سانجاق) درگیسی‌نین امکداشلاری گئنیش اشتراک ائتمیشدیلر. «تبریزلی اولکر»ین بو مراسیمدن چکدییی شکیللری تقدیم ائدیریک:
قایناق: ائل بیلیمی موسسه‌سی‌نین تلگرام کانالی@el_bilimi
یک پاسخ
روحو شاد، یئری دینج اولسون..