نیم پهلوی‌نین ملکه‌سی اؤز مخالفلرینه «اؤلوم» شعاری وئردی(مرگ بر سه فاسد ……….)
اؤلومون بایراغینی چون اله آلمیش ملکه
یئنی‌دن اؤلکه‌میزه ولوله سالمیش ملکه.
سئچه بیلمیر هله‌لیک گیوه‌نی چوستدان ملکه،
آغزینی آچدی او گون سؤیله‌دی داستان ملکه،
سپدی نیفرت توخومون، شوملادی بوستان ملکه،
اؤلومون بایراغینی چون اله آلمیش ملکه
یئنی‌دن اؤلکه‌میزه ولوله سالمیش ملکه.
سلطنت چؤهره‌سی تاریخ بویو تام زیل قارادیر،
دانیشارکن بو قادین خالقدا نیفرت یارادیر،
باشا دوشمور نه دئییر! هانسی زاماندیر؟ هارادیر؟
درک ائدنمیر بو زمانی گئری قالمیش ملکه
یئنی‌دن اؤلکه‌میزه ولوله سالمیش ملکه.
نه زامان اولسا بئله، قویسا اگر باشه تاجی
بو یازیق میللتیمین دردینه اولماز علاجی؛
یئنه‌ده یوکسله‌جک میللت آرا، آغری- آجی
کی یقین نازلی شیرین خولیایا دالمیش ملکه
یئنی‌دن اؤلکه‌میزه ولوله سالمیش ملکه.
بیری اؤزگورلویه هایلار، بیری‌سه یان دانیشیر،
ار، مساوات باغیریر، آروادی قان- قان دانیشیر،
بو یاناشما آچیق، آیدینجا تضاددان دانیشیر،
میللتین صبر تییانی داها دولموش ملکه!
یئنی‌دن اؤلکه‌میزه ولوله سالمیش ملکه.
سلطنت دؤورو یازیق میللتیمین آخدی قانی،
قوی سالیم یادینا من قانلار ایچن شاهلار هانی؟
اوخو تاریخی، دوشون، آذربایجانی تانی
بو دیارین نئچه مین انسانی اؤلموش ملکه!
یئنی‌دن اؤلکه‌میزه ولوله سالمیش ملکه.
بو دیاریمدا منیم حاقسیز آخان قانه اینان!
اؤزونو سالما تورا میرزه قلمدانه اینان!
قانا، قان ایسته‌ین اول آذربایجانه اینان!
بو سبب‌دن او شاهین دوشمنی اولموش، ملکه!
یئنی‌دن اؤلکه‌میزه ولوله سالمیش ملکه.
بهمن ۱۴۰۱
