اؤیونمه دوستوم!
ستار گول‌محمدی
یاواش یئری ییخیلارسان آ دوستوم
هئچ یویورن کام آلمامیش بو داغدا
هر باهارین بیر قیشی وار دالینجا
باشا چاتماز عؤمور گولون بو تاغدا
…
یاخشی دوشون ندیر خئییر، ندیر شر
جاهیل اینسان بو دونیانی منیمسر
آلداتماسین سنی قدرت، سنی زر
هر یئنیشین یوخوشو وار قاباقدا
…
اینانمیرسان اوخودوغون درسینه
یاتاق اولماز حقیقته هر سینه
فیرلانماسین باشیم اوسته ترسینه
الینده‌کی ایکی باشلی چوماقدا
…
اوخو داستانینی کئچن جانلارین
گؤر نه حکمتی وار هر بیر آنلارین
دونن قیلینجیندان قان دامانلارین
بو گون باشین سوزن گؤردوم آیاقدا
…
آچیلمامیش مین اوزو وار دونیانین
دئییلمه‌میش مین سؤزو وار دونیانین
تاریخ آدلی مین گؤزو وار دونیانین
یاشاساندا عصیرلردن اوزاقدا
…
منم دئییب یئرسیز-یئرسیز آز اؤیون
باغلی قالماز همیشه‌لیک بیر دویون
طالع ووروب باخت گئیرسه ها بیرگون
اود پوسگورر کوله دؤنموش اوجاقدا
…
ساتقین یئتسه هر شؤهرته، هر آدا
اوجوز ساتار اؤز قارداشین خور یادا
کامیل اینسان کامال گزر دونیادا
قوچاق یاشار قوچاق اوغلو قوچاقدا
…
چوخ شوگه‌لر گؤردوم سارایا دؤنموش
چوخ سارایلار گؤردوم آه وایا دؤنموش
پای گودنلر ایندی بیر پایا دؤنموش
حسرت-حسرت عؤمور سورور بوجاقدا
…
حقیقته بیر یاراقدیر عدالت
عدالتسیز حقیقته نه حاجت
“ستّار” سنه او گون قوپار قیامت
اوره‌ک سؤزون سیخجالانسا دوداقدا
یک پاسخ
اعتبارینا اینانیرام حورمتلی ستار، یاخین یئرلی اولدوقدا هله بیربیریمیزی گؤره نمه میشیک! سئحرآما پوئماسینین ۳۱۷-نجی بندینی سیزه حصر ائدیره م. قاراداغذا حسین دئیه ن هر ماللا /مجلیس قوردو یزد مدال خان لارلا !/ شاعیر قوربان مین دوگونلو سوواللا / قوربان گونو حاق قاپیسین باغلادی / امام – یزید باریشینا آغلادی . * قوربان علی انصاری .