تزه اؤز آیاغیم اوسته دورموشام،
کؤلگه‌نی باشیمدان چکن دلی‌یم.
گونلریم بیر گونه چیخسین‌لار دئیه،
گونو گون آلتیندا کئچیرملی‌یم.
سنه گون آلتیندان دئییم افندیم،
بوردا سو آختاران مین-مین سوسوز وار.
جهنم شعله‌سی چکن آدام‌لار،
آیاغیم آلتینی قویو قازیرلار.
سنه گون آلتیندان دئییم افندیم،
او قده‌ر نور رنگلی زهر ایچمیشم.
یوللاردا تاپدانمیش کئفلی یولچویام،
اؤزومون اوستوندن یوللار کئچمیشم.
سنه گون آلتیندان دئییم افندیم،
گون آلتی دونیانی بو گونه سالدی.
بوگون نیفرتلره زاهی‌سا دونیا،
دونن گون آلتیندا اوشاغا قالدی.
منی گون آلتینا آددادان کؤرپو،
تزه‌دن کؤلگه‌یه دوغرو چکیلدی.
قارقیشین آرخامجا گورولتو سالدی،
کؤلگه دره‌سینه اوچدو تؤکولدو.
تزه اؤز آیاغیم اوسته دورموشام،
کؤلگه‌نی باشیمدان چکن دلی‌یم.
دونیانین ان قالین قارانلیغینی
من گونون آلتیندا کئچیرملی‌یم.
یک پاسخ
کئشگه بو شاعر آدلانیب شعر یازماغا قالخانلار، تورکجه میزی ساغلام اویره نیب، یاپما فآذری قورولوشدان قیریلا بیله لر…دیل یوخسونلوغو بوگون ایران تورکلری مین ادبی متن لری نین تملجه سورونو…ایسترسه یئنیجه تورکجه یازانلار، ایسترسه اوزلرینی پیشکسوت نه بیلیم پئشه کار سانانلار