رسمی خبر آژانسلاری‌نین یایدیغی خبره اساسا، اردبیل شهری‌نین تانینمیش حکیم و شاعری دوکتور یوسف معماری دوشنبه شهریورین ۱۴نجو گونو وفات ائتمیشدیر.
دوکتور یوسف معماری ۱۳۲۰نجی ایل اردبیل شهری‌نین پیرعبدالملک محله‌سینده دوغولموش، ابتدایی و اورتا تحصیلاتینی بو شهرین صفوی مدرسه‌سینده، عالی تحصیلاتینی ایسه تهران دانشگاهی‌نین گؤز حکیملییی بؤلومونده بیتیرمیشدیر.
دوکتور معماری ائل آراسیندا حؤرمتلی بیر اجتماعی شخصیت و تورک دیللی شاعر کیمی تانینمیشدیر. اونون بیر چوخ شعرلری داها آرتیق تبریز و اردبیلده نشر ائدیلن آنا دیللی مطبوعات اورقانلاریندا یاییلمیشدیر. بونلاردان علاوه، دوکتور معماری «عمر خیام»ین رباعی‌لری‌نین بوتونونو آذربایجان تورکجه‌سینه ترجمه و کیتاب شکلینده نشر ائتمیشدیر.
«ایشیق» سایتی آدیندان، ائل آراسیندا حؤرمتلی بیر حکیم کیمی تانینان و اردبیل ادبی محیطی‌نین گؤرکملی شخصیتی دوکتور یوسف معماری‌نین وفاتینی اونون مؤحترم عائله‌سینه، سئونلرینه و اردبیل ادبی محیطی‌نین چالیشانلارینا تسلیت دئییریک. باشینیز ساغ اولسون!
ایشیق – آذربایجان ادبیات و اینجه صنعت سایتی
۱۵/۰۶/۱۴۰۱
یک پاسخ
روحوشاداولسون