اوزون یوللاردا دا اومود واریمیش،
باغلی یوللاریندا آغلار قالمیشام.
آیریلیق اود کیمی جانیمی یاخیر،
آغناییب اوستومه داغ‌لار، قالمیشام.
هر بیر شئی سن اولوب، گوللر ده سنسن،
گؤزومون یاشی‌یلا شکیلین آخیر؛
هر بیر شئی گؤزومده سنسن، دانیشیر
جانسیز دووارلار دا سن اولوب باخیر.
سن منه سئومه‌یی اؤیرتدین گؤزه‌ل،
هیجری ده اؤیره‌دیب گئده‌یدین باری.
سینه‌مه داغینی چکمه‌دن اؤنجه
قلبیمی اوخلاییب گئده‌یدین باری.
شیرین خاطیره‌لر حسرت‌له دولو،
گؤزومون یاشی‌یلا اورتاق یاستیغیم.
سن مزار ایچینده، من مزار اوسته
رؤیامدا قووشوب بیرجه یاتدیغیم.
گولوشلو باخیشین آغلار گؤزومده
هئیکلین یونموشام ابدی قالسین.
سن یوخسان، هر زامان داریخان چاغی
گولوشلو باخیشین کؤنلومو آلسین.
