او‌ حزین سس، بو‌ خالقین سسی ایدی، سوسدو!!!
سعید موغانلی

بو ایل، (۱۳۹۸)-جی ایلین تهران کیتاب سرگیسی قوتاراندان سونرا، قوم نومره‌سی ایله بیر زنگ آچیلدی. سالاملاشاندان سونرا، چوخ حزین بیر سسله دئدی ملک‌نژادام… محمد ملک‌نژاد.
دئدیم: تأسفله تانییا بیلمه‌دیم!
دئدی: «بیات»ین دوستویام، «بوغاناق» کیتابی‌نین مؤلفی…
شوخلوغا سالیب دئدیم: هم بایات خانینا ارادتیم وار، هم بوغاناق رومانینا… داود دوستار بوغاناغی او قدر تعریفله‌‌میشدی دوستلارا، آلدیم و‌لی اوخویا بیلمه‌میشم.
دئدی: اوخومایاجاقسانسا کاش آلمیردین…
دانیشیق بیر آز آجیلاشدی…
دانیشیغیمیز چوخ سویوق اولماسین دئیه سؤز آراسی دئدیم: کاش بوغاناق کیتابینی بیر سیرا کتاب ساتیش ائولرینه داغیداردیز! هئچ یئرده یوخدو. دوستلارین تاپماغی چتین اولوب.
دئدی: لطفا یاشماق کیتابلارییلا پخش ائدین! من باجارمیرام و…
دئدیم: یایماغینی یایارام، ولی کتابفروش‌لاردان پولونو آلا بیلمیرم! هامیسی جیبیمدن گئدیر. بئله اتفاق‌لار چوخ دوشوب. کتابفروش حسابین وئرمه‌ییب، من مؤلف حسابینی قایتارماغا مجبور اولموشام. بیزه ۱۳۸۵-جی ایلدن بورجلو قالان کیتاب‌ساتانلاریمیز وار….
بیر آز داها سوسدو… ائله ساندیم کی تلفون کسیلیب…
حزین سس داها حزینجه‌سینه دئدی: دؤرد کیتابیم قالیب الیمده… بیلمیرم کیمله، هانسی ناشیرله چاپ ائدیم؟!… بئش آلتی یوز صفحه‌لیک سراسکند فولکلورو، ایکی آراشدیرما و بیر ناغیل… پووئست ده دئمک اولار…
– نظریز نه‌دی؟
همیشه بئله چاغلاردا دوستلاریما محافظه‌کارانه جواب وئرردیم، اورک‌لری سینماسین دئیه…
بو دؤنه دفترده‌کی قارماقاریشیقلیغا باخدیم، آچیقجا گئرچه‌یی دئدیم!
– قاداسی اوچ آیدی ائو و دفتر کرایه‌سینی وئره بیلمه‌میشم!!! گئرچکدن دوروموم پیس‌دی… ساتیش او قدر آزدی، باتاقلیغا دوشموشم سانکی…
حزین سس، -«منیم همیشه شانسیم بئله اولوب!» دئییب، تئز ساغوللاشدی…
بو گون او‌ حزین سسین همیشه کؤچدویونون خبرینی یازمیشدی ایشیق سایتی…
بایاقدان بَری وجدان عذابی قویمور دوروب، کارتونلاییب، اوست- اوسته ییغدیغیم ساتیلمایان کیتابلاری یوک ماشینینا ووردوروب، باشقا بیر کیچیک آنبارا داشییام! بلکه صابخانانین دانلاغیندان قورتارام…
ایشیغا دونوخموشام و دوشونورم؛
او‌ حزین سس، بو‌ خالقین سسی ایدی، غریبجه‌سینه سوسدو!!!