دوشوب زلزله ای گوناهکارلر!
داغیلدی بوتون دکه، بازارلر!
دئدیم چوخ گوناه ائتمه‌یین باخمادیز،
جهنم یولون گئتمه‌یین باخمادیز،
دئدیم قورخون آللاهدن، قورخمادیز،
قالین پیس گونه ای بد افکارلر!
اذا زولزوله… زلزله وار دئدیم،
قالار تورپاق آلتدا رباخوار دئدیم،
سلم‌لر سالار بوینوزا مار دئدیم،
یئیر هم چالار جانیزی مارلر!
سؤزه باخمادیز، اولدونوز چون دونوز،
نه او آخماق اوغلان، نه بو پخمه قیز،
ازیلدیز، بوزولدوز، دئدیز آی دونوز
دا ها کوهنه لیب بویله اخبارلر!
بلالر وئریب عاقبت ال – اله
قویوبدور اوخون چیلله‌یه حرمله؛
قیریب یئر دامارین دوشوب زلزله،
قالیب تورپاق آلتدا گوناهکارلر!
ییغیب توربایا پوللاری گول‌صنم،
آلیب بانکدان توربا – توربا سلم،
گوناهکار اولوب قوم ظالیم ظلم
و عصیان ائدیب بو جفاکارلر!
او سندیکانی قوردو ملعون صفر،
اونا تابع اولموش نئچه کارگر،
تؤکولسون اونون باشینا سربه‌سر
دمیرلر، دیرک‌لر و اشجارلر!
یاییب عالمه گونده بیر بد خبر،
ووروب «آرمان» «کاسپیان»ه ضرر،
اولوب دؤولته لاپ یئکه بیر خطر،
ییغیب باشینا یاور و یارلر!
گاه آمریکادان، گاه اوروسدان دئیر،
آچیر سینه‌سین گاه یاریم قول گئیر،
یولوق کتدیلر کتده پیتزا یئیر،
ترقی ائدیب جوت و جار – جارلر!
دئدی ملایا وئرمرم بیر فییت،
اونو آختاریب زلزله کت به کت،
نئجه ویران اولدو ائوین بد نییت،
چکر کئف بو گون جومله دیندارلر!
قادین کوچه‌ده تئللرین اوینادیر،
بولور سینه‌سی سانکی بیر آینادیر،
دئییب- گولمه‌سی قلبیمی گؤینه‌دیر،
منه خوش گلیر ایندی بو زارلر!
گرک باش- گؤزون برکیده هر قادین،
چیخاردا یادیندان قادینلیق آدین،
گرکمز اوجالدا گؤیه فریادین،
تؤکه گر گؤزون یار و اغیارلر!
خدا امر ائدیب صاحیب زلزله
ملک یئر دامارین فقط سیلکه‌له!
ملک ده غضبناک و کم حوصله
قیریب یئر دامارین، دوشوب زلزله!
قیلیش- قالخانی چون گؤتوردو اله
سالیر عالمه یکسره ولوله،
قیراجاق هله خلقی سئل، زلزله
اگر ائتمه‌سه توبه بدکارلر!
بلالر «کمالی»نی ده قهر ائده‌ر
اگر منزلین مسکن مهر ائده‌ر،
سئل و زلزله دینسیزی سئحر ائده‌ر،
ائشیدسین یاتانلار و بیدارلر!
ولی عیبی یوخ، یاخشی فرصتدی ها!
بیلین قدرینی گر چه آفتدی ها!
سئل و زلزله، جنگ نعمت‌دی ها!
ییخیلسین، داغیلسین تولانبارلر!
