آراز سئودالی شاعیر «بهروز صدیقی»
کریم قربانزاده
آراز پاییزین قیسا گونلرینه آخیردی. سرین پاییز کوله‌یی شیلتاقجاسینا موغانین کوچه باجالاریندان کئچیردی. مشه عزیز کیشی‌یه موشتلوق وئردیلر: گؤزلرین آیدین اولسون، اوغلون اولدو!
بهروز صدیقی ۱۳۴۸ینجی ایلده موغاندا ایشچی بیر عائیله‌ده حایاتا گؤز آچیب. پاییز اؤز الوانیلغیندان اونا قلمینه، سسینه اولدوغو قدر پای وئریب. ایلک تحصیلینی پارساباددا بوعلی مدرسه‌سینده، اورتا مکتبی‌ایسه امام خمینی دبیریستانیندا بیتیریر. آراز نغمه‌لری، او تایدان گلن حزین موغامات سسی، موغانین گوللو- چیچکلی طبیعتی ۶۸ینجی ایللرده بهروز صدیقی‌ده شاعیرلیک حیسین اویادیر. ۶۹ نجو ایلین ۲۱ آذرینده ایلک شعری اوستاد یحیی شیدانین ایداره ائتدییی مهد آزادی روزنامه‌سینین تورکی صحیفه‌سینده چاپ اولور.
سن ای سو سسلی سئوگیلیم
سئوه‌جه‌یم سنی من…
پارسابادین ادبی مدنی محفل‌لریندن آلدیغی ایلهام، آلقیشلار اونو گؤزل دوشونجه‌لی صنعتکار اولماغا یؤنلدیر. او تکجه شعر یازمیر؛ ۱۳۷۰ینجی ایلده آذربایجانین اؤلمز داهی شاعیری «صمد وورغون»ون «شاعیر نه تئز قوجالدین سن» عنوانلی شعرینی بیر کاسئته ییغیر. کاسئتی دینله‌ینلر اونون دیکلاماتورلوق قابلیتینه احسن دئییب، دوستلارینین خوصوصیله‌ده یاخین دوستو «اباسط اصغری»نین قارشیلاماسی اوندا درین تاثیر بوراخیر. او گوندن بری «بهروز صدیقی»نین گؤزل سسی ایله ایگیرمی‌دن آرتیق دیکلمه یاییلیر. اونون دیکلمه‌لری بیری بیریندن گؤزلدی؛ آنجاق «عاریف کسگین»ین شعرینین اوستونه قویدوغو سس ان گؤزل دیکلمه‌لریندن بیریدی. هله ده «بهروز صدیقی»نین سسینی سئونلر هر هفته دوشنبه گئجه‌لری «ادبیات سئونلر» اینترنت گروپوندا اونون دیکلمه‌لرینین یولونو گؤزله‌ییرلر. او دفعه‌لرله بو اینترنت ادبی گروپونون دیکلمه یاریشماسینین غالیبی اولوبدور. دیکلمه اوصلوبو داها آرتیق «گول تکین جاببارلی»، «میکاییل میرزه»، «امینه یوسیف قیزی» و «انور ابلوچ»ون اوصلوبونا یاخیندیر و اونلاردان تاثیرلنیز.
آراز سئودالی شاعیر «بهروز صدیقی» ۱۳۷۷ینجی ایلده اؤز عمیسی قیزی ایله عائیله قورور. ایندی بیر قیز، بیر اوغلان اونون سئوگی حایاتینین ثمری‌دیر.
بوگونلر «بهروز صدیقی»دن سانال دونیاسیندا، موختلیف درگی‌لرده گؤزل و دیرلی شعر، نثر، دیکلمه و ترجومه لرین یاییلماسینین شاهیدی اولوروق. یاخین گله‌جکده اونون گؤزل ترجومه‌لریندن بیر مجموعه «قونشو دوواریندان ساللانان آلما» باشلیقی آلتیندا ایشیق اوزو گؤره‌جک.
آراز سئودالی شاعیریمیزدن بوگونه قده‌ر اوچ کیتاب ایشیق اوزوگوروب: «یالقیز آغاج دوستلوغوندا»، «گونه باخان» و «گلین گئدک گونش گیله». «بیر آددیم سئوگی‌یه» آدلی دیگر شعیر کیتابی‌دا یاخین گله‌جک ده چاپ اولاجاق.
«بهروز صدیقی» ائل شاعیری‌دیر. اونون شعرلری موغان طراوتده‌دیر. یورد سئورلیک، اینسان سئورلیک، عدالت‌پرورلیک، آذربایجانا باغلی‌لیق. بیرکلمه‌ده دئسک؛ خالقیمیزین سعادتی، وطنین نائلیتی، صولح و تمیز سئوگی موضوعلاری اونون شعرلرینین بؤیوک بیر قیسمینی تشکیل ائدیر. بو ادبی اثرلر اونون مدیرلیک ائتدیگی «تونقال» آدلی اینترنت کانالیندا دا یاییلیر. هله لیک بئله اولسون. اونون حایاتی عشق ایله دولغون و قلمی داهادا یازار اولسون.
سس و سؤز / بهروز صدیقی
