اؤلوم ائوی(۲)
قاسیم پناهی
قیزلار گئتدیکدن سونرا احمد اوتوردوغو یئرده دیرسه‌گینی، دیزلرینین اوستونه قویوب، مئبئلین اوستونده ایکی قات اولوب ساغ الی‌ایله،سول الینین بارماقلارینی شققیلداداراق نه‌ییسه دوشونور کیمی اولدو. منیم سسیمله اؤزونه گلیب گؤزلریمه باخدی.
ـ سیز کیمسینیز؟ او آدام نه‌دن سیزی اؤلدورمک ایسته‌ییردی؟
احمد ـ گولومسه‌ییب: منیم ده بونو آنلاتماغیم زامان آپارار.
ـ قولاق آس، بورادا آنورمال اولایلار باش وئریر. سؤیله بلکه بیر ایپ اوجو تاپدیق.
ـ نه! سؤزو اوَله‌ییب_گوَله‌مه آچیق دانیش.
ـ بو ائوده روح، بلکه ده جین وار.
احمد نه‌سه بیلمیش کیمی اوز_گؤزونون رنگی آتدی. الینین تیتره‌مه‌سینی گؤروردوم. توپورجه‌گینی اودوب باشلادی:
احمد ـ ایران دئوریمیندن اؤنجه آتاملا_آنام بو کند’ده یاشاییرمیش. بیر گون آنام مئشه‌دن درمان اوتلار توپلایارکن کیمینسه طرفیندن وحشیجه‌سینه اؤلدورولور. آتام منله باجیمی گؤتوروب آمئریکایا قاچیر. بیز اوردا بؤیوموشوک. آتام تئز_تئز بورا گلیردی آنجاق نه اوچون گلدیگینی هئچ زامان بیزه دئمه‌زدی. سونونجو دؤنه او دا بوردا اؤلدو. بیزه تکجه خبری چاتدی.نه مئییدی تاپیلدی، نه ده بیر ایز. بیز اونون و آنامین اینتیقامین آلماق اوچون گلمیشدیک. آرابامیزی کندین اورتاسینا بوراخدیق. ایپ اوجو تاپماق اوچون مئشه‌یه واردیق. سونرا دا او وامپیره بنزر کیشی و قالان ماجرانی دا کی اؤزون گؤردون.
من ده باشیما گلن‌لری اونا صؤحبت ائله‌دیم بئله قرارا گلدیک کی گون اورتادان سونرا کنده گئدیب یئرلی‌لردن بیلگی توپلایاق.
ائله بو آندا نرگیز یانیمیزا گلدی. قارداشینین اوزونه باخیب سونرا منه طرف دؤندو. بیر آز گولومسه‌دی. گولومسه‌ینده گؤزلری نئجه ده گؤزل اولوردو. منه باخینجا داش هئیکله دؤنموش کیمی نه ترپه‌نه بیلدیم نه ده نفس آلا بیلدیم. هئچ دوشونموردوم ده بلکه ! یالنیز اونو سوزوردوم. بیردن احمد’ین سسیله اؤزومه گلدیم:
احمد ـ بالام هارداسان؟ نرگیز دئییر یئمک حاظیردی. اولمایا سنین یئمه‌گین یوخدو؟
سونرا بیر _ بیرلرینه باخیب گولومسه‌دیلر.
ـ یوخ، یوخ، یئیه‌جه‌یم. نه‌سه بئینیمه گلدی، باغیشلایین.
مطبخده احمدله آداخلیسی، منله ده نرگیز اوز_اوزه اوتوردوق. یئمه‌گه باشلایاراق احمدله آداخلیسی صؤحبت ائدیردی‌لر. نرگیز ده یئمکله مشغول اولموشدو. گؤزلریمی اوندان چکه بیلمیردیم. تام دا منیم خیاللاریمدا دوشوندوگوم قیزدیر. گؤیچک، قانی ایستی…،بیر آن ایسته‌ییردیم الینی توتوب اوره‌گیمی سؤکوب_تؤکن دردیمی اونونلا پایلاشیم. بیردن باشینی قالدیریب گؤزلریمین ایچینه باخدی. بوز اریین کیمی آنلیمدا تر مونجوقلاندی. اوتانجدان باشیمی آشاغی سالیب یئمه‌گه باشلادیم.
گون اورتا یئمه‌گیندن سونرا، یئرلی‌لردن بیلگی توپلاماق اوچون هم ده احمدین آراباسینی عیمارته گتیرمک اوچون دؤردوموزده بیرلیکده کنده واردیق. یول بویونجا قیزلارا دویدورمادان احمدله ائوین آنورماللیغیندان دانیشدیق. کندین ایچینده اولان تک_تک آداملار بیزی گؤرونجه هورکموش کیمی هارا گئده‌جک‌لرینی بئله اونودوردولار.
زینب ـ کندین اهالیسینه نه‌سه اولوب؟
ـ یوخ، بیز خانین ائوینده اولدوغوموز اوچون بئله داورانیرلار.
نرگیز ـ باوو…دئمک سن خان اوغلوسان هه؟
ـ یوخ، من اورادا قوناغام.
احمد ـ بوش_بوش دانیشماغی بوراخین بیز بیلگی توپلاماق اوچون گلمیشیک ها.
ـ من دونن بورادا بیر دوست تاپمیشام. او کسین بیزه یاردیم ائده بیله‌جک.
بیرلیکده صمد عمینین کلینیکاسینا گئتدیک. سلاملاشاندان سونرا اوشاقلاری اونا تانیتدیردیم و دئدیم منیم قوناقلاریم دیرلار. سونرا دا آنلاتدیم مئشه‌ده دولانارکن بئله بیر اولای باش وئریب اونون اوچون سندن یاردیم آلماق ایسته‌ییریک. صمد عمی بیر شئی بیلیب گیزله‌دیر کیمی، بو کندده ائله بیر شئی اولماز یقین وهمه دوشوبلر دئدی. احمد صمد عمی‌دن سؤز آلماق اوچون دؤنه‌لرجه اولانلاری داها جانلی سؤیله‌دی آما هر دؤنه صمد عمی ائله بیر شئی اولماز دئدی.
سونوندا بیزی یالنیز بوراخین دئیه احمده هیم ائله‌ییب، سیز گئدین آرابانی گتیرین بیرلیکده بورادان عیمارته گئده‌ریک دئدیم. اونلار چیخدیلار.
هاوا یاواش_یاواش قارالیردی. صمد عمی‌دن سؤز آلماق اوچون فیکریمی بیر یئره توپلاییب گؤزلریمی گؤزلرینینه تیکدیم. دون گئجه باش وئرن‌لری اونا دانیشماغا باشلادیم. صمد عمی قورخو کئچیریر کیمی اللرینی بیر_بیرینه سورتوردو هردن ده دوداقلارینی دیشله‌ییردی. سؤزلریم قورتاراندان سونرا صمد عمی‌نی دینله‌ییر کیمی سوسدوم آنجاق او هئچ نه دئمه‌دی. بیر آن آرامیزدا سس‌سیزلیک یاراندی. سونرا صمد عمی آجیناجاقلی باخیشلا منی سوزوب دوشگون سسله، آراز او ائودن گئت دئدی.
ـ نییه کی صمد عمی !آنلات لوطفن آنلات.
بو آندا کیمسه‌لر کلینیکایا سالدیرمیش کیمی قاپینی تپیکله‌یبب آچدی. ایکیمیز ده دیک آتیلیب قاپییا دؤندوک. احمد’له زینب نرگیزین قولتوغونا گیریب اونو ایچه‌ری گتیره‌رَک آغلاییردیلار. ایستولدان قالخیب اونلارا ساری یئریدیم. نرگیزین اوزونده یارا گؤرونوردو.ساغ الینی ده سول بؤیرونه باسمیشدی. بارماقلارینین آراسیندان قان داملاییردی. احمدله زینب اونو آیاق اوسته ساخلاماغا چالیش‌سالار دا آز قالیردی اونلاری دا اؤزویله ییخسین.
اوزومو احمد’ه توتاراق نه اولدو دئیه باغیردیم. احمد سسینی چیخارمادان آغلاییردی. صمد عمی اوتاقلارین بیرینی گؤسته‌ره‌رَک بورایا گتیرین دئدی. نرگیزی تاختین اوستونه اوزالتدیق. صمد عمی آپتِک‌چه’نی(ایلک طیببی یاردیم قوتوسو) گتیریب اوزونون یارالارینی میکروب‌سوزلاشدیرماغا باشلادی. اوزونو منه ساری دؤندریب: ـ باخیا وورا بیلرسن؟
ـ هه.
صمد ـ تئز اول حاضیرلان اوزونون یارالارینی باخیالا، یاراسی درین دیر.
احمد ایسلاق گؤزلریله منه باخیب سالونا چیخدی. آردینجا زینبی ده گؤندردیم احمد’ین یانیندا اولسون. آلت‌لری حاضیرلاییب نرگیزین یانینا گلدیم. یازیق قیز اؤزوندن گئتمیشدی. گؤزلریم دولدو.الیمی آستاجا یاناغینا سورتدوم. ایلک گؤردوگومدن بری دفعه‌لرجه خیالیمدا بوینونا ساریلیب یاناقلارینی اؤپموشدوم.نه یازیق کی ایلک دفعه باییلمیش گؤوده‌سینه توخوندوم. بیر آن خیالا دالدیم. گؤره‌سن اونوندا منه حیسسی وار می؟ او دا منی سئویر می؟ آه آراز…آه، سن نئجه ده پاخماسان. او قیز هئچ سنی تانییرکی سئوسین ده. یازیق سئوگی دوورانی دئییل ایندی هر شئی پولا باخیر. سن ده کی پوتور آدامین بیری، نه‌یینه وورولاجاق سنین؟
صمد عمینین ـ آراز باشلا ـ سسیله اؤزومه گلدیم. بوتون فیکریمی بیر یئره توپلادیم ائله سیریق ووروم کی باخیانی آچاندان سونرا یئری قالماسین. صمد عمی ده قارنینین یاراسینی باخیالاماقلا مشغول اولدو. ایشیمیز قورتاراندان سونرا سالونا چیخیب احمد’له زینب’ین یانینا گئتدیک. احمد’ه باخیب نه اولدو دئیه سورو وئردیم. احمد گؤزونون یاشینی الینین ترسیله سیلیب درین بیر نفس آلیب باشلادی : هر شئی آرابانین یانیندا باش وئردی. رولون آرخاسیندا’ایدیم. زینب ده اوتورموشدو. نرگیز دئدی باشماغیما چینقیل دولوب.سونرا دا اوتوردو باشماغینی چیخاریب چینقیللاری بوشالتسین. بیردن باغیرتی سسی گلدی. آرابادان ائندیم گؤردوم نرگیز یارالی دیر. نه اولدو، نئجه اولدوسونو بیلمه‌دیک. زینب قورخوسوندان قیمیلدامادان احمدین گؤزلرینه باخیردی. من ده قورخموشدوم. صمد عمی بیزه باخیب پیچیلدایاراق دئدی آللاهین لعنتی سیزه گلسین.بو سؤزله صمد عمی’نین بیر شئی‌لر بیلدیگینه امین اولدوم. احمد نرگیزی گؤرمک اوچون اوتاغا گئتدی. آردینجا زینب ده بیزه باخیب گئتدی. صمد عمینین الیندن یاپیشدیب یالواریشلی باخیشیمی گؤزونه تیکدیم.
ـ صمد عمی بیر شئی بیلیرسن‌سه سؤیله. بورادا نه‌لر باش وئریر؟
صمد ـ من بو اولایلارین نه‌دنین بیلیرم. اللریمی یویوم گلیم سنه سؤیله‌یه‌جه‌یم. آما یالنیز سنه. سؤز وئر کی هر شئیی بیلدیکدن سونرا قوناقلارینی دا گؤتوروب ائله بو گئجه بو کند’دن گئده‌سن.
ـ سؤز وئریرم.
صمد عمی گؤزلرینی سوزدوروب قاپییا دوغرو آددیملادی. گئجه‌نین قارانلیغی کند’ه چؤکموشدو. صمد عمی قاپیدان ائشیگه چیخیب کلینیکانین یانیندا کی تووالته ساری گئتدی. آرادان نئچه آن کئچدی. بیردن ائشیکدن تاراق_توروق سسی قالخدی تئز تووالته دوغرو قاچدیم. احمد ده اوتاقدان چیخیب آرخامجا قاچدی. تووالتین آلمینوم قاپیسی یاری آچیق قالمیشدی. ایره‌لیله‌ییب آستاجا بارماقلاریمین اوجویلا قاپینی آچدیم. بیر آن سانکی اوره‌گیم آغزیما گلدی. باغیرماییم دئیه الیمین بیرینی آغزیما باسیب تیتره‌ک آیاقلاریملا چتینلیکله ایکی آددیم دالی قاییدیب اوزومو باشقا یؤنه چئویریب آغلاماغا باشلادیم. مندن سونرا احمد قاپینی آچدی. او دا صمد عمینین گؤوده‌سینی آل قان ایچینده گؤروب باغیردی. صمد عمینین باشینی دینامیتله پارتلاتمیش کیمی بئینی زادی دیوارا یاخیلمیشدی. احمد نرگیز_نرگیز باغیریب کیلینیکایا گیردی من ده اونون آرخاسینجا اوتاغا دوغرو قاچدیم. قیزلار بیر_بیرینی قوجاقلاییب گؤزلرینی یومموشدولار.
احمد ـ ترپه‌نین، تئز اولون. بوردان گئتمه‌لییک.
نرگیز،زینب’ین یاردیمیلا تاخدان ائندی. احمد من ماشینی آلیشدیریم دئیه ائشیگه قاچدی. من ده نرگیزین بیر طرفینه کئچیب یئریمک اوچون اونا یاردیم ائتدیم. کیلینیکادان ائشیگه چیخیب نرگیزی بیر تهر آرابایا اوتوردوب اؤزوموزده میندیک. عیمارته دوغرو یولا دوشدوک. هئچ بیریمیز اؤزوموزده دئییلدیک. قیزلار قورخولاریندان قیمیلدانمیردیلار. احمد بوتون گوجویله آیاغینی قاز پئدالینا باسمیشدی دوداقلاریندا نه‌سه پیچیلداییردی.
دیرسه‌گیمی آرابانین پنجره‌سینین قیراغینا سؤیکه‌ییب الیمی آنلیما دایاناجاق ائتدیم. صمد عمی’نین پارتلامیش کلله‌سی گؤزومون اؤنوندن قیراغا چکیلمیردی. اونا نئچه ایلین دوستو کیمی بیر حیسسیم وار’ایدی. ائله اونون اوچون ده دوشوندوکجه اوره‌گیم داها چوخ یانیردی. ایختیارسیز گؤزلریمین یاشی یاناقلاریما سوزولدو. بوتون بو بلالار من می اوزومدن باش وئریردی؟ آتامین می اوزوندن؟یوخسا او آقازاده’ایله دوستونون می اوزوندن؟ گؤره‌سن بو اوشاقلارین بختینده نه‌لر وار کی منله بیرگه بو جهنمین اورتاسینا دوشوبلر؟اونلاری بیلمیرم آما منیم حیاتیمدان اوشاقلیق گون‌لریمی چیخسان قالانی ائله جهنمده کئچمیشدی. آتام ائلئکتیریک اداره‌سینین قوللوقچوسو’ایدی. بیر گون ایش باشیندا نه‌سه سهو باش وئریر و اونو ائلئکتریک وورور. او اولایدا قیچینین بیرینی ایتیریب اوتراق اولدو. ائله همین ایل‌لردن ده ائوده اوره‌گی سیخیلماسین دئیه رسساملیغا اوز گتیردی. یادیما گله‌نی او گون‌لر منیم اون ایکی یاشیم وار’ایدی. آتام اوتراق اولاندان نئچه آی سونرا اونون ماعاشینی اؤنجه آزالدیب سونرا دا کسدی‌لر. آتام او وعضیتله نقدر اورا_بورا گئتسه ده کار وئرمه‌دی. او گوندن آنام شام کیمی گؤزلریمین اؤنونده اریمه‌گه باشلادی. ائوین بوتون پیروبلئم‌لرینی چیگنینه آلمیشدی. آخیری دؤزه بیلمه‌ییب اونون دا یوک‌لرینی من داشیماغا قرار وئردیم. اون اوچ_اون دؤرد یاشیمدان باشیم ایشله‌مه‌گه ائله قارسشمیدی کی عؤمرومدن ایل‌لرین نئجه گلیب کئچمه‌سینین بئله فرقینده اولمامیشدیم. آنامین حیاتینی دگیشمه‌سی آردینجا اوچ ایل سونرا آتامین حیاتینی دگیشمه‌سی گئرچکدن ده منیم حیاتیمی جهنمه چئویرمیشدی. ایندی ده کی بو اولایلار…
احمدین سسیله قارما_قارشیق فیکیرلریم اوچدو. عیمارتین ائیوانینین اؤنونده آرابانی ساخلاییب اطرافی یوخلاماق اوچون بارماقلیقلارین یانینا گئتمیشدی. من ده آرابادان ائنیب زینب’ین یاردیمیلا یئنه ده اؤزوندن گئتمیش نرگیزی قوجاغیما آلیب عیمارته دوغرو یئریدیم. ایچه‌ریده نرگیزی دیوانین اوزرینه اوزالدیب باش اوجوندا اوتوردوم. اللریمله ساچلارینی تومارلاییردیم احمد”له آداخلیسی دا گلدی‌لر. اونلار دا منیم نرگیزه اولان دویغولاریمی دویموشدولار. یئریمی احمد’ه وئریب مئبئل‌لرین بیرینین اوستونده اوتوردوم. زینب بیر آز سو گتیریب نرگیزین اوز_گؤزونو یودو. باش اوجوندا احمدی گؤرن نرگیز بیر آز ساکین اولدو. زینبین بنیزی آغ آپپاق اولسادا قورخوسونو چوخ دا دیندیرمیردی. بیر آز نرگیزه اوره‌ک وئریب،من یئمه‌گه بیر شئی‌لر حاظیرلاییم دئییه گولومسه‌ییب مطبخه گئتدی.آخشام یئمه‌گینده احمد ائوده‌کی روحو چاغیرماق اوچون تانیشی اولدوغونو سؤیله‌دی. اؤنجه من راضی اولمادیم آنجاق بیر آز دوشوندوکدن سونرا گؤردوم کی بو جهنمدن چیخماغیمیزین تک یولو بودور. احمد کیمه‌سه زنگ ائله‌ییب بورایا گلمه‌سینی ایسته‌دی او دا راضیلیق وئردی. پیروبلئم چیخماسین دئیه مئبئل‌لرین اوستونده یاتماغا قرار وئردیک. دوغروسو قورخو هر بیریمیزین ایچینه کؤک آتمیش دیر.
مئبئل‌لر اوستونده زینب نرگیزله اوغراشیردی. احمد آیاقلارینی کیچیک ماسانین اوستونه اوزادیب گؤزلرینی یومموشدو. من ده اونون کیمی آیاغیمی کیچیک ماسانین اوستونه قویوب باشیمی مئبئله سؤیکه‌دیم.
ائویمیزین اؤنونده’ایدیم. جیب‌لریمی آختاریب آچارلاریمی تاپدیم. قاپینی آزجا اؤزومه ساری چکیب آچدیم. پیلله‌کن‌لردن آشاغی ائندیم. ایچه‌ریدن هم اینیلتی سسی، هم ده قاه_قاها سسی گلیردی. بدنیمین بوتون اورقانلاری تیتره‌دی. آیاقلاریمی آددیم آتماغا زورلاییب ایره‌لی گئتدیم. ایچه‌ریده هر شئی بیر_بیرینه دگمیشدی. یئرده بیر اؤلو وار’ایدی آنجاق کیم اولدوغونو بیلمیردیم. ایسته‌دیم یاخینلاشام بیر اوغلان اوشاغینین ایبلیس واری گولوشو بئینیمه دوشدو. بو سسی تانییردیم. بوتون گوجومله باغیردیم…
احمدین ساکین اول دئین سسیله قارشیلاشدیم. قان ترین ایچینده‌یدیم. بوغازیم اورمو گؤلو کیمی قوروموشدو. گؤزلریمی قیزلارا ساری دولاندیردیم. اونلار اویانمامیشدیلار. آیاغا قالخیب احمدله مطبخه گئتدیک. یوخودا چابالادیغیمی سؤیله‌دی من ده اونا گؤردوگوم یوخونو تعریف ائتدیم. سونرا دئدی کی صاباح بیر شئی‌لر آلماق اوچون شهره گئتمه‌لیییک ایسته‌رسن ائوینیزه ده بیر باش چکرسن.
اورادا نه زامان یوخویا دالدیغیمیزی بیلمه‌میشدیک. زینب’ین سسیله اویاندیق. سحر یئمه‌گی حاظیرلاییب نرگیزی ده ماسا باشینا گتیرمیشدی. بیر آن سونرا بیز ده حاظیرلانیب ماسا باشینا گلدیک. نرگیزین اللرین الیمه آلیب کئیفینی سوردوم. او دا بیر گؤز ووروب احمدی گؤسته‌ره‌رَک یاخشییام دئدی. اوتانجدان تئز اللریمی گئری چکیب یئمه‌گه باشلادیم.
هر کس یئمه‌گینی بیتیرندن سونرا شهره دوغرو یولا دوشدوک…
آردی وار
