من اورمو گؤلویم
سؤز: ائلچین حسن‌زاده- سس: کبری میرحسینی
حاضیرلایان: یوسف عبادیان
بو سؤزلر ده یمه‌سه خاطیرینیزه
من اورمو گؤلویه‌م سوسوزلامیشام
قابارمیش بو دیلسیز ساحیللریمده
یارامدان بیر ایت تک قودوزلامیشام
اوزومده نه اولدوز نه آی شکیلی
کؤکسومده بیر قوجا گمی باتیبدیر
بیر اوشاق اوینارکن ساحیللریمده
باغریما بیر قارا تکر آتیبدیر
هر گئجه بو سس سیز آی ایشیغیندا
داریخیر اوره ییم شپه‌لریمه
داریخیر ناهاردا گونش وورار کن
گؤیلره قالخان او یاشلی تریمه
نه تانری آغلادی نه‌ده بولودلار
گون به گون قایغیلار دوغولدو منده
گئت به گئت شورانلیق هوبدو باغریما
هر لحظه بیر دنیز بوغولدو منده
یاتمیشدیم مینلر ایل درینلیگیمده
اویاتدیز،دیکسیندیم دوز یالاتدینیز
اؤز دردیم اؤزومه بس دئییلدی هئچ!
یاراما بیر آز دا سیز دوز قاتدینیز
ازلدن سویومون شورانلیغیندا
نه بالیق یاشاردی نه بیر توسباغا
ایچیمده بیر شپم‌ده قالماییبدیر
چیرپام من اؤزومو هئی سولا-ساغا
باخین من اؤلندن سورا هله‌ده
ماسادا دوزدانلار دنیز قوخویور
بیر بالیق اوزر کن خیرخیرانیزدا
سحردن گئجه‌یه ناله اوخویور
ییغیرام دوزلاری اوووجلاریما
شهرین باشینا بیر کول الییه‌م
ایستیرم هرگئجه سس‌سیزلیگیمده
اؤزوم اؤز یاراما دوز سپه‌لییه‌م
