اؤلوم ائوی(۱)
قاسیم پناهی
ایش یییه‌سی آیلیغیمی ماسانین اوستونه آتیب بیر دنه ده حئسابی چوروتمه بلگه‌سی پولون یانینا توللاییب سیقارئتینی آغ بورما بیغنین آلتیندا ایتمیش دوداقلاریندان گؤتوروب بلگه‌نی گؤسته‌ره‌رَک:
ـ اوغول بالا من سنین سهولرین اوچون سرمایه‌می الدن وئره بیلمه‌رم. بورا بیر قول آت خوش گلدون.
اوولجه نه باش وئردیگینی بیلمه‌دیم، «خوش گلدون» سؤزونو ائشیدرکن اؤزومه گلیب دیل_آغیز ائتمک اوچون یالواریشلی باخیشلا اونو سوزدوم. ساچ‌سیز باشی قهوه رنگلی آجیقلی گؤزلرینی داها جیددی گؤسته‌ریردی. اوزونون ایکی طرفینده دوز بیغینین قورتاردیغی یئرده قیرمیزی یاناقلارینین اَتی ساللانیردی. آغ کؤینه‌گینین یوخاریدان ایکی دویمه‌سی آچیق قالدیغی اوچون سینه‌سینین اوره‌گی بولاندیران قیوریم تَرلی توک‌لری گؤرونوردو. بئلینی قولتوقلو ایستولونا سؤیکه‌ییب شیشمان قارنینی قاباغا وئریب سرت باخیشینی اوستومه سالمیشدی. بیردن من آغزیمی آچمامیشدان اؤنجه دینامیت کیمی آچیلیب الینی ماسانین اوستونه چیرپیب باغیردی:
ـ نه‌یه باخیرسان اده، قول چک خوش گلدون.
دیل-آغیز ائتمک ایسته‌سه‌یدیم ده بو سون باغیرتیسینیا دؤزمه‌ییب تئز کاغیذا قول آتیب پوللاری جیبیمه باسیب شرف‌سیز دئیه‌رَک اوتاغی ترک ائدیب بیر باشا بینادان ائشیگه چیخدیم. نه ائدیب هارا گئده‌جه‌گیمی بیلمیردیم. او شیشمان کیشییه شرف‌سیز دئدیگیم اوچون اؤزومدن آجیقلی’ایدیم، بیر یاندان دا اؤزومه حاق وئریردیم اوچ ایل او شیرکتده زحمت چکمیشدیم آنجاق آتام حیاتینی دگیشندن سونرا دونیادا هئچ بیر کیمسه‌م اولمادیغی اوچون اؤزومو الده ائده بیلمیردیم. توپارلانماق اوچون منه داها آرتیق زامان وئرمه‌لی’ایدی. آددیملایاراق قارماقاریشیق فیکیرلریمی دوزَنله‌مک ایسته‌دیگیم ده بیردن اؤزومو آتامدان میراث قالان ائوین قاباغیندا گؤردوم. جیب‌لریمی آختاریب آچاریمی تاپیب قاپییا سالدیم، توتاجاقدان یاپیشیب آزجا اؤزومه ساری چکیب آچاری فیرلاتدیم ‘تق’ سسی’ایله قاپی آچیلدی. حیطیمیمیز کوچه‌دن آلچاقدا اولدوغو اوچون ایکی پیلله آشاغی ائنیب ایکی طرفینده بالاجا باخچاسی اولان گئنیش حیطی گؤزدن کئچیریب اسکی معمارلیغینی قوروموش ائوه دوغرو آددیملادیم. بیر زامانلار های_کویله دولو اولان ائو نئجه ده سس‌سیز و داریخدیرجی گلیردی. ائوین تاختا قاپیسینی آچیب ایچه‌ری کئچدیم. قوناق سالونوندا مئبئل‌لرین دوزومو، دیوارلاردا آتامین چکدیگی منظره شکیل‌لری و آنامین توخودوغو خالچا هر شئیی عادی گؤسته‌ریردی، عادی اولمایان تک شئی اونلارین اولماماسی‌ایدی. آلاقارانلیق، نَم قوخولو ائو اوره‌گیمی ائله سیخدی دئدیم بلکه ایندی خاطیره‌لرین سالدیریسیندان هلاک اولوب آتا_آنام حیاتاینی دگیشدیگی بو سالوندا ییخلیب اؤله‌جه‌یم. ایختیارسیز آتامین پنجره‌نین قیراغیندا اولان قولتوقلو ایستولونا یاخینلاشیب اوندا اوتورماق ایسته‌دیم آنجاق موبایلیمین سسی مانع اولدو. جیبیمدن چیخاریب تانیش اولمایان بیر نومره‌نی تئلفونومون صفحه‌سینده گؤردوم. دورمادان علاقه توشونو چکیب ائشدیرم دئدیم.
ـ آراز بی؟
ـ بلی اؤزومم. سیز ؟
ـ من رحمتلیک آتانیزین مصلحتچی وکیلی آقازاده’یم. زحمت اولماسا ساعات ۱۷:۰۰ ده منیم دفتریمده اولون. اؤنملی بیر مسئله‌نی سیزله آرادا قویمالییام. ایزله‌می ساوجیقلا سیزه گؤندره‌جه‌یم. حله‌لیک.
ـ باش اوستونه. حله‌لیک.
خوش گون‌لریمین خاطیره‌لرینی اؤزونده ساخلایان ائوین اورا_بوراسینی دولاندیغیمدا ساوجیق سسی یئنه سوکوتو پوزدو، وکیل ایزله‌می منه گؤندرمیشدی. قول ساعاتیم ۱۶:۰۰نی گؤسته‌ریردی کسینلیکله من ائودن چیخیب اورایا گئدنه‌دک او دئدیگی زامان اولاجاقدی. تئز ائودن چیخیب قاپینی کیلیدله‌ییب خیاباندان بیر تاکسی توتوب وکیلین دفترینه یوللاندیم. زامانا اؤنم وئردیگیمه گؤره دوز دئدیگی واختدا اورادایدیم. کاتیبه‌یه اؤزومو تانیتدیردیغیمدا اوتاغی منه گؤسته‌ردی. قاپینی دؤیوب ایچه‌ری گیردیم.
ـ سلام
ـ سلام آراز بی بویرون ایله‌شین.
وکیلین یانیندا قیوریم ساچلی، ماوی گؤزلو بیر اوجا بوی آریق کیشی اوتورموشدو کئچیب هر ایکیسی’ایله گؤروشوب وکیلین قارشیسیندا اوتوروب بویورون دئیه‌رَک سؤزلرینی گؤزله‌دیم.
ـ اؤنجه سیزی بورایا چکدیگیم اوچون عذر ایسته‌ییرم آما بو اؤنملی مسئله‌نی سیزله آرادا قویمالییام. رحمتلیک آتانیز حیاتینی دگیشمه‌میشدن اؤنجه ائوینی ساتمیشدی بو آیین باشیندا ائوی تحویل وئره‌جکدی…
ـ (سینیرلاناراق)نئجه یعنی؟
ـ حقیقت بودور کی سون زامانلار آتانیزین پولو اولمادیغی اوچون ائوینی ساتماق قرارینا گلیب اونو ساتدی. بو آیین باشیندا ائوی تحویل وئرمک لازیم‌دیر.
ـ آما…، آما منیم اورادان باشقا هئچ یئریم یوخدور. بو گون ایش یئریمدن دن قوولموشام. بس من…، من هارادا یاشایاجاغام. اؤزونوز بیلیرسینیز آرتیق حیاتدا هئچ کیمسه‌م یوخدور.
اؤزومو ساخلایا بیلمه‌ییب گؤزلریمین یاشینی آخیتدیم آنجاق بیلمه‌دیم بو یاش سینیرلاندیغیم اوچون’ایدی یوخسا چاره‌سیز اولدوغوم اوچون.
آدینی بیلمه‌دیگیم اوچونجو آدام:
ـ آراز منیم بیر ائویم وار، اوردا هئچ کیمسه قالمیر. ایسته‌سن اوردا یاشایا بیلرسن.
همیشه بیرینین منه یازیغی گلمه‌سیندن نیفرت ائدیردیم. آشاغیدان یوخاری گؤلمه‌جه‌یه بنزر گؤزلرینه باخیب لازیم دئییل دئدیم.(منیم آدیمی هاردان بیلیردی!)
ـ من آقازاده‌نین قدیم دوستویام. ایندی ده اونا باش چکمک اوچون تورکیه‌دن بورا گلمیشم. هر حالدا من او ائوین آدرسینی سنه وئریرم. بیر زامان گئتمه‌گین اولسا آچاری آقازاده’دن آلا بیلرسن.
بونو دئییب کؤینه‌گینین جیبیندن قلم کاغیذ چیخاریب نه‌سه یازیب منیم قارشیما قویوب آیاغا قالخیب وکیل’له ساغ‌اوللاشیب منه ده حله‌لیک دئییب قاپییا ساری یئریدی. وکیل منه باخیب کاغیذی گؤسته‌ره‌رَک دئدی اونو گؤتور لازیمین اولار. باشیمی دؤندردیم تانیمادیغیم کیشیه باخام آما او گئتمیشدی.( بس نییه قاپینین سسینی ائشیتمه‌دیم او گئدنده!)
وکیل ـ دوستوموزا باخ ایگیرمی بئش ایلدن سونرا بیزی گؤرمه‌گه گلیب، بئش دیقه اوتوروب ائله گئتدی کی هئچ بیلمه‌دیک.
آقازاده’ایله ساغ اوللاشیب دفتردن چیخدیم. هر شئی آیدین’ایدی من ایکی گوندن سونرا آتامین میراثینی تزه صاحیبینه تحویل وئرمه‌لی’ایدیم. ایش یئریمدن قوولماسایدیم شیرکت وئرَن اوتاقدا یاشایاردیم آما ایندی گئجه‌لری یاتماغا دا یئریم یوخدور. بیردن او تانیمادیغیم کیشی یادیما دوشدو، باشقا یول یوخ‌ایدی من حله‌لیک او دئین ائوه کؤچمه‌لی’ایدیم. یولومو بیر کؤهنه‌چی دوکانینا سالیب ائوین گرکسیز اشیاءلارینی ساتماق اوچون اونو ائوه گؤتوردوم. بیر ساعاتدان سونرا حیط قاپیسینی آچیب اونونلا بیرگه حیطدن ائوه ساری آددیملادیق. بویو آلچاق دولو بیر کیشی’ایدی سئوینجدن هئچ بیلمیردی نه ائتسین. ایبلیس واری گوله‌رَک: ـ دئدین هر نه وار ساتیرسان هه؟
ـ هه ساتیرام آز دانیش ایشینی گؤر.
باشقا بیر ائوه داشیناجاغیم اوچون بیر نئچه گرکلی اشیاءلاری او جومله‌دن آتام چکن شکیل‌لرله آنام توخویان خالچانی گؤتوروب باشقا اشیاءلاری دگر_دگمه‌زینه ساتیب یوک داشیما آگئنتینه(آژانس) زنگ ائدیب صاباح او کیشی دئین ائوه کؤچمک قرارینا گلدیم. دئمک اولار گئجه یاری اولموشدو کؤهنه‌چی بوتون اشیاءلاری سیلیب سوپوروب پوللارینی وئریب گئتدی. سون گئجه اؤز ائویمیزده قوناق’ایدیم، یورقونلوقدان آز قالیردیم آیاق اوسته یاتام. اؤزومو حیطده تاختا دیوانا چاتدیریب اوستونده اوزاندیم. آغیر بیر سوکوت ائوه چؤکموشدو سانکی او دا منیم کیمی یارالی’ایدی. گؤزلریمی باغلاییب قارا چگیرتکه‌لرین جیریلتیسینا قولاق آساراق خیالا دالدیم.
اوشاق اینیلتیسینین سسینه دیواندان ائنمک ایسته‌دیگیمده درین بیر قویویا دوشدوم. بالاجا بیر داش کیمی قویونون ظولوماتلیغیندا مایاللاقلایاراق آشاغی گئدیردیم آما قویونون دیبینه چاتمیردیم. بیردن قویو اودلا دولدو بوتون گوجومله باغیریب یاردیم ایسته‌دیم آنجاق کار وئرمه‌دی. آلوولار منی بورودوگونده دیک آتیلیب اؤزومو دیوانین اوستونده گؤردوم. یومروقلاریمی ائله سیخمیشدیم دیرناقلاریم آز قالیردی اتیمه کئچیب الیمی یارالاسین. قارا باسمیشدی اؤزومو آما بو یوخونو نئجه یوزماق اولاردی؟ نه اوچون من اوشاق اینیلتیسینین سسینه گئتدیکده او آلوولو قویویا دوشدوم ؟ سورغولاریما هئچ بیر جاواب تاپا بیلمه‌ییب یئنیدن اوزاندیم.
آخشام اوستو بوتون ایش‌لریمی بیتیریب آقازاده‌نین دفترینه گئتدیم. کاتیبه اونون اولمادیغینی بیلدیریب آرخاسیندا اوتوردوغو ماسانین چکمه‌جه‌سیندن آچارلاری چیخاریب منه وئردی.
ـ دئمیشدی‌لر بو آچارلاری سیزه وئرَم.
ـ چوخ ساغ اولون خانیم.
آچارلاری آلیب یولا دوشدوم. آقازاده هاردان بیلرمیش من او ائوه گئده‌جه‌یم، آخی من دونن اؤزومو او قدر ده ماراقلی گؤسته‌رمه‌دیم !
اؤزومو ائوه چاتدیردیم. یوک داشیما آگئنتینین طرفیندن ماشین گلینجه هاوا یاواش_یاواش قارانلیقلادی. اشیاءلاری ماشینا یوکله‌ییب یولا دوشدوک. یول بویونجا سوروجو’ایله بیر کلمه بئله کسمه‌دن حیاتیمی اوشاقلیقدان دوز بو ماشیندا اوتوردوغوما قدر گؤزدن کئچیردیم. اوولدن ائله بئله‌ایدیم داشدان سس چیخاردی مندن یوخ،بعضن ساعاتلارجا بیر یئرده اتوروب بئینیمده اؤزومله دانیشاردیم یادا نه ائده‌جک‌لریمی پیلانلایاردیم. نه یازیق کی من آتا_آنامی تئز الدن وئریب اونلاردان قالان تک وارلیغی دا ایتیریب، ایندی’ایسه تانیمادیغیم کیمسه‌نین ائوینه کؤچمک مجبورییتنده‌ایدیم. ساعات تخمینن ۰۱:۲۰’ایدی ماشینین دایانماسی’ایلا اؤزومه گلدیم. آدینی بیلمه‌دیگیم هانسیسا کندین لاپ یوخاری باشیندا (دئمک اولار تپه‌ده) بؤیوک بیر عیمارتین قاباغیندا دایانمیشدیق.
سوروجو ـ اده رحمتدیگین اوغلو ۵ ساعاتدی یاتیبسان دو ده.
ـ یاتمامیشدیم.
سوروجو ـ هه سن دییندی، یاتان منیم خالام’ایدی. بابام بورا هارادی بیزی گتیریب چیخاردیبسان.
ماشیندان ائنیب عیمارتین گیریشینه طرف یئرییب کنددن تکه توک ساییریشان ایشیقلارا باخیب الیمین ایچیله آنلیما ووردوم.
ـ لعنت منه، نه‌دن او ایزله‌می اوخومادان بورایا گلمه‌گه قرار وئردیم ؟
سوروجو ـ اؤز _ اؤزووا نه دئییرسن گلیم ایچه‌ری؟
ـ گل
ایکی طرفی بارماقلیق(نرده) اولان قاپی‌سیز گیریشدن ایچه‌ری کئچدیم. یاشیل چمن‌لری آز قالا آدامین دیزینه’دک اوزانمیش گئنیش حیط ایل‌لر بویو کیمسه‌نین بورادا یاشامادیغینی سؤیله‌ییردی و حیطین اورتاسیندا ایکی قاتلی بؤیوک ائو (بارماقلیقلارین دوزولوشوندن بللی’ایدی ائوین دالیندا دا حیط وار ) گؤرکمی’ایله آدامی قورخودوردو. ائوین قاباغیندا کی ائیوانا ساری یئریدیگیمده ائله بیلدیم کیمسه ایکینجی قاتین پنجره‌لرینین بیریندن منی گؤز آلتینا آلیب، باشیمی قالدیریب باخدیغیمدا پرده‌نین ترپندیگینی گؤردوم آما یقین مئه پرده‌لری ترپه‌دیر دئیه باش قولاق آلمادیم. سوروجونون یاردیمی ایله اشیاءلاری ائیوانا داشیدیق.
گونشین ایلک شوعاسی‌ایله یوخودان آییلدیم. نه زامان ائیواندا یاتدیغیم یادیما گلمیردی. هر یئر یام یاشیل اوتلار و آغاجلارلا دولموشدو، چیچک‌لرین قوخوسو آدامین عاغلینی باشیندان آلیردی. ائیوانا باخدیغیمدا اشیاءلاری یئرینده گؤرمه‌دیم ! یانی نئجه اولموشدولار ؟ اولمویا آخشام منی یوخو توتدوغوندان سونرا اوغورلاییبلار؟ بلکه سوروجو داشییب ییغیب ائوین ایچینه ؟ بو سورغولارلا پیلله‌کندن ائنیب ماشینا ساری یئریدیم سوروجو رولون آرخاسیندا باشینی دیزلرینین آراسینا سوخوب دیزلرینی ده قوجاقلامیشدی. بارماغیملا شوشه‌نی دؤیدوگومده ائله آتیلدی آز قالمیشدی باغری یاریلسین. منی گؤردوکده تئز ماشیندان ائنیب آغزی سؤز توتار_توتماز:
ـ عمی اوغلو منیم پولوم وئریسن گئده‌م؟
ـ اشیاءلاری سن ایچه‌ری داشیدین ؟
ـ قارداش من پول زاد دا ایسته‌میرم قوی من گئدیم.
ـ سن نییه بئله چاشقینسان ؟ نه اولوب سنه؟
ـ آخشام اشیاءلارون اؤز _ اؤزونه گئدیردی ائوه. سن الله قوی من گئدیم.
اشی نییه چاش_باش دانیشیرسان گه پولون خوش گلدین.
سوروجونون پولونو وئریب یولا سالدیم عیمارتین گیریشیندن چیخیب کنده ساری یولا دوشدو. ائوه ساری قاییداندا آغاجلاردا هئچ بیر قوشون اولمادیغینی گؤردوم. نه پیس یانی بو قدر آغاجدا بیر دنه ده قوش یووا سالماییب ؟ او سوروجو اؤز_اؤزونه نه دئییردی، ائله بیل قورخموشدو !
ائوین ایکی طرفه آچیلان بؤیوک تاختا قاپیسینی آچیب بؤیوک بیر سالونا آددیم آتدیم. آووو… بورا هارادی ؟ لاپ بئله سلطنتی ائودی. یادیما گلن بورانین بنزرینی تئلویزیادا بیر ده تهراندا اولدوغوم زامان قاجار ساراییندان گؤروش ائدرکن گؤرموشدوم. نم نئچه مئتیرلیک بیر فرش سالونون اورتاسیندا و ایکی طرفینده دوزولموش شاهانه ایستول‌لار بیر ده تاواندان ساللانمیش اوچ بؤیوک آنتیک چیلچیراق آغزیمی آچیق قویموشدو. ائوین رطوبت قوخوسونا باخمایاراق هر شئی پار…پار پاریلداییردی. دیوارین بیر طرفی دؤرد بؤیوک پنجره‌دن و بیر طرفی ده سیرالی اولاراق آسیلمیش تابلولارلا آییله‌وی شکیل‌لردن عییبارت’ایدی. شکیللره یاخینلاشیب بیر نئچه‌سینی گؤزدن کئچیردیم ایلک نئچه شکیلده دؤرد نفرلیک بیر آییله چئشیدلی فیقورالارلا رسم اولونموشدو آما گئتدیکجه آییله‌نین ساییندان اکسیلیردی.
اؤنجه خورما ساچلی تخمینن بئش یاشلی اوغلان اوشاغی شکیلدن یوخ اولدو، سونرا اون‌ایکی یاخود اون‌اوچ یاشلی قیز سونرا آییله‌نین آناسی و سونوندا آتاسی.
سون شکیلده تکجه آتانین رسمی وار’ایدی منه ائله گلیردی بونو هارداسا گؤرموشم آما قارنیمین قورولتوسو دوشونمه‌گه ایمکان وئرمه‌دی.
دونندن هئچ نه یئمه‌میشدیم گرک بیر شئی تاپیب قارنیمی دولدورام آما بو کؤهنه ائوده کی معلوم دئییل نئچه ایل‌دیر بوشدو یئمک اوچون نه اولاجاق ! یادیما گلدی سالونا گیرَرکن ساغ طرفیمده مطبخه اوخشار بیر یئر گؤردوم تئز اورایا قاییدیب بؤیوک بیر مطبخه گیردیم. بورادا دا هر شئی دوزَنلی و قایداسیندا’ایدی. سویودوجویا یاخینلاشیب مین بیر نذیر_نیازلا قاپیسینی آچدیم بیر آن سانکی آیاقلاریم یئره میخلاندی گؤزلریمله گؤردوگومه اینانا بیلمیردیم سویودوجودا چوخ سئودیگیم سوسیکا، کولباسا، اَت و یئمک اوچون لازیم اولان هر شئیدن اؤزو ده تپ_تزه‌سی وار’ایدی. بونلاری بورایا کیم آلیب ییغیب ؟ اولمایا آقازاده؟ یوخ اونون ایشی اولا بیلمز بلکه ده ائله او تانیمادیغیم کیشی بیلیب من بورایا گله‌جه‌یم اونون اوچون بونلاری حاضیرلاییب ! نه‌سه بوش وئر ایندی بونلاری دوشونمک زامانی دئییل آجیمدان اوره‌گیم کئچیر. سئودیگیم سوسیسکالار و کولباسالاردان بیر آز بیر قابا ییغیب بیر نئچه دنه ده آلما گؤتوروب ماسانین اوستونه قویوب، ایستوللارین بیرینی چکیب حیطه باخان پنجره‌یه طرف ایله‌شیب یئمه‌گه باشلادیم. هوسله یئدیگیمده بیر آن ائله حیس ائله‌دیم کیمسه قارشیمدا اوتوروب منی سوزور آما مندن باشقا بو عیمارتده هئچ بیر جانلی یوخ ایدی یاواش _ یاواش شوبهه‌لَنسم ده خیال اولدوغونو ساندیم. قارنیمی دویوراندان سونرا کندی تانیماق هم ده کندلی‌لرله تانیش اولماق اوچون عیمارتدن چیخیب کنده ائنمک قرارینا گلدیم. بیر آزدان سونرا الیمه بیر دگنک آلیب عیمارتین اؤنونده کی دؤنگه‌دن کنده ائندیم جماعات ال‌لری’ایله منی گؤسته‌ریب بیر _ بیرینین قولاقلارینا نه‌سه پیچیلداییردیلار. یولدا منله اوز_اوزه گلن هر کیمسه یولونو اگیب اگری _اگری باخیب یانیمدان میزیلدایاراق کئچیردی. کندلی‌لرین داورانیشیندان اؤزومده چاتیشمازلیق اولدوغونو حیس ائدیب پال_پالتاریمی یوخلادیم، تیشرتیم تمیزدیر، شالواریمین دا زیپی آچیق دئییل. بئله‌لیکله باشا دوشدوم من اونلارا یاخینلاشیب نه‌سه سورسام دا اونلار منله دانیشمایاجاق یاخشیسی بودور دؤولته عایید اولان بیر یئر تاپیب بورانین هارا اولدوغونو اؤیره‌نیم. بیر آز کندده فیرلاندیقدان سونرا کیلینیکایا بنزر بیر یئر گؤروب یاخینلاشدیم ساری بیر لووحه‌ده کندین قاراداغ کندلریندن اولدوغونو اؤیره‌نیب ایچه‌ری گیردیم بالاجا بیر سالون او طرف _ بو طرفینده ایکی قاپی‌سیز بالاجا اوتاق ، اوتاقلارین هر بیرینده بیر یاتاق و سالونون دیبینده بالاجا بیر ماسانین آزخاسیندا آشاغی _ یوخاری اللی یاشلی بیر کیشی وار. یاخینلاشیب سلام وئردیم.
اوزومه باخمادان: ـ علئیکیم، بویورون.
ـ من بو کنده…
سؤزومون آراسینا گیریب دئمه‌گینه کؤنولسوز اولاراق: ـ هه بیلیرم دونن گئجه خانین ائوینه گلیبسن.
خان ! بس بونا گؤره هامی مندن چکینیر. ائله اونون اوچون ده منیم بورایا گلمه‌گیمین خبری بو قدر تئز هر یئره یاییلیب !
ـ منیم بورادا کیمسه‌م یوخدور علاج‌سیزلیقدان او ائوه داشینمیشام. من بورادا بیر ایش تاپیب بیر آز پول ییغیب شهره قاییتمالییام. اکینچیلیک زاد الیمدن گلمیر آما ایگنه وورماق، یارا باغلاماق زاد الیمدن گلیر لاپ بئله مال حکیملیگیندن ده بیر شئی‌لر بیلیرم اولورسا من بورا دا سیزه یاردیمجی کیمی ایشله‌ییم.
جیب تئلفونونو ماسانین اوستونه قویوب قاشلارینین دوگونونو آچدی آما آنلیندا کی قیریشلار ایتمه‌دی. قارا شَوه مونجوغا بنزر گؤزلرینی منه تیکیب یاریمچیق بیر گولوش دوداغینا قاچیراراق:
ـ سن دئییرسن بلکه بورا هارادی ؟ بورانین او قدر گلیری یوخدو کی پول ییغاسان، هئچ منیم خرجیم چیخیر کی. من ده مجبورییت اوزوندن بوردایام آلتی آیدان سونرا پئنسیاچی(بازنشسته) اولاجاغام.
بورا هئچ آیدا دا بیر خسته گلمیر بو کندلی‌لر اولماسا من آجیمدان اؤله‌رم.
ـ سیز ایذین وئرین من بورادا اوغراشیم گؤرک نه اولور بلکه باشقا بیر ایش تاپدیم.
ـ منیم سؤزوم یوخدور نه واخت بورا گلیرسن گل من ده تک‌لیکدن چیخارام، آما بوردان سنه پول چیخماز باشقا ایش آختار.
ـ چوخ ساغ اول، چوخ ساغ اول. بس من صاباح ساعات نئچه ده بورادا اولوم؟
ماسانین آرخاسیندان آیاغا قالخیب منله گؤروشدو ال‌لرینین هر بیری منیم ایکی الیم بویدا اولاردی اؤزو ده گؤوده‌لی اوجا بوی بیر آدام’ایدی.
ـ هاچان گلسن گه او قدر ده اؤنملی دئییل(گوله‌رک) چونکو بوردا خسته یوخدو.
ـ دئدین آدین نه دی؟
ـ آرازام. بس سیز ؟
ـ صمد. کندلی‌لر صمد عمی دئییر.
صمد جیددی گؤرونسه ده دانیشیغیندان بیر ده گؤزلریندن بللی اولوردو اوره‌گی یوموشاق آدام‌دیر. اونو او قدر کاریزمالی حیس ائتدیم کی من ده ایسته‌ییردیم اونو صمد عمی چاغیریم آما اوتاندیم.
ـ صاباحا قدر حله‌لیک صمد بی.
ـ حله لیک.
صمد عمی’دن آیریلیب کیلینیکادان ائشیگه چیخدیم یاواش _ یاواش هاوا قارالیردی گلدیگیم یولو قاییدارکن کند’ده کی ائولره فیکیر وئردیم هامیسینین بؤیوک حیطی، هامیسیندا دا یاشلی _ یاشلی آغاجلار، چیچک‌لر، یام_یاشیل چمن‌لر هم ده آغاجلارین هر بیریسینده ان آزی ایکی _ اوچ دنه قوش یوواسی وار ؛ بس او بویدا عیمارتین آغاجلاریندا نه‌دن هئچ بیر قوش یووا سالماییب! بو فیکیرلرله باشیمی قاتمیشدیم بیردن بیر اوشاغین سسی’ایله اؤزومه گلدیم. اوشاق عیمارتین دؤنگه‌سینی اوزو یوخاری قاچاراق آغلاییب یاردیم ایسته‌ییردی. هردن ییخیلیردی آرخاسینا باخیب دوروب یئنیدن قاچیردی. بللی’ایدی اوره‌گی آز قالیر آغزینا گلسین آما دورمادان قاچماغا جان آتیر. دؤنوب آرخاما باخدیم قورخونج نه‌سه یوخ’ایدی، اولمایا مندن قورخوب قاچیر ! آرخادان سسله‌یه‌رَک اونا ساری قاچدیم آنجاق منیم سسیمه هئچ تپکی گؤسته‌رمه‌دن قاچیب عیمارتین حیطینه گیردی من ده اونون آرخاسینجا حیطه گیردیم. اوشاغین عیمارتین دال طرفینه گئتدیگینی گؤروب قاچاراق اؤزومو اورایا یئتیردیم. تخمینیم دوز چیخمیشدی عیمارتین آرخاسیندا دا بؤیوک بیر حیط وار’ایدی عینی کنده طرفده کی کیمی چئوره‌سی بارماقلیق’لی و بیر قاپی کی اورادان چیخان اؤزونو مئشه‌نین اورتاسیندا تاپاردی. اوشاق قاچیب مئشه‌نین ایچینده گؤزدن ایتدی. هاوا آرتیق قارالمیشدی مئشه’ده کی آغاجلار آداما قورخونج گلیردی اونون اوچون ده اوشاغین آرخاسینجا گئتمه‌ییب ائوه قاییتدیم. هئچ اشیاءلاریم یادیما دوشموردو بس اونلار نئجه اولموشدو. ایکی تاغلی بؤیوک قاپینی آچیب ایچه‌ری گیردیم جیب تئلفونومون فنرینی یاندیریب سالونون ائلئکتریک کلیدینی تاپیب چیراغی یاندیرماق ایسته‌دیم آما ائله بیل ائلئکتریک کسیلمیشدی مطبخین قاباغیندان کئچیردیم سانکی آرخادان بیری منه گولوب دیواردا کی شکیللره ساری یئریدی. ایشیغی یئریمک سسی گلن یئره توتدوم، کیمسه یوخ’ایدی آنجاق آددیملارین سسی حله ده گلیردی قورخومدان ال _آیاغیم تیتره‌مه‌گه باشلادی. توپورجه‌گیمی زورلا ایچه‌ری اؤتوروب کنده گئدرکن جیبیمه قویدوغوم پیچاغی الیمه آلیب سسین آردینجا گئتدیم سون شکیلدن سونرا آنام توخویان خالچا، آتامین چکدیگی رسیم‌لردن بیری و سوندا منیم شکلیم دیواردا’ایدی. اوره‌گیم ائله چیرپینیردی آز قالیردی دؤشومو یاریب ائشیگه آتیلسین. یئنه ده آددیم سسی باشلاندی آددیملار بیر آز مندن اوزاقلاشیب داریسقال پیلله‌کن‌لرله ایکینجی قاتا قالخدی. بوغازیم قوروموشدو ائله بیلدیم یوخو گؤرورم قولومون توکونون بیرینی چکدیم کی یوخدا اولسام آییلام آما یوخ، یوخو دئییلدی. ایسته‌مه‌دن سسین آردینجا ایکینجی قاتا قالخدیم. دونندن بو عیمارتده اولدوغوما باخمایاراق بیرینجی دفعه اولاراق بورایا گلمیشدیم. پیلله‌کن‌لرین آغزیندان باشلاییب قارانلیقدا دیبی گؤرونمه‌ین اوزون بیر سالونا آیاق قویدوم. هر ایکی طرفیمده اوز به اوز اولان باغلی قهوه رنگلی قاپیلار وار. غریبه’دیر بورانین هاواسی آشاغی قاتدان چوخ سویوق’دور توک‌لریم بیز_بیز اولدو. آددیم سسی هله داوام ائدیر من ده اونون آردینجا چوخ احتیاط’لا یئریییرم. سالونون سونو گؤرونن زامان سس کسیلدی اورادا دا اوز به اوز اولان ایکی اوتاق وار آنجاق ساغ طرفده کی قاپینین رنگی چهرایی، سول طرفده کی’ایسه قیرمیزی دیر! آددیملارین سسی منی بورایا نه‌دن گتیردی؟ یوخسا بو عیمارتین غریبه‌لیگی’ایله علاقه‌لی نه‌سه وار ! من بو اتاقلارا گیرمه‌لی’یم آما هانسینا؟ بونلاری دوشوندوگومده بیردن چهرایی قاپی یاواش_یاواش آچیلماغا باشلادی. روحوم بدنیمدن چیخاجاق کیمی یئنه ده اوره‌گیم آز قالیردی دؤشومو یارسین. قورخومدان باشیم دؤنوردو، گوجله اؤزومو ایاق اوسته ساخلاییب پیچاغین ساپینی الیمده سیخیب تئلفونومون ایشیغینی اؤنومه سالیب اوتاغا ساری یئریدیم بیر آددیم ایچه‌ری گیرمیشدیم تئلفونومون ایشیغی سؤندو. آرتیق هئچه زادی گؤرمه‌دیم. ایسته‌دیم قاییدام سالونا قاپی ائله برک اؤرتولدو دئدیم ایندی چرچیوه‌سیندن چیخیب باشیما دوشه‌جک. موبایلیم’لا پیچاغیم الیمدن چیخیب نم هارا توللاندی. اولدوغوم یئرده دیزلریمین اوستونده اگله‌شدیم. اوتاقدان اوغلان اوشاغینین گولمک سسی قالخدی. بیر تهر اؤزومو اله آلیب دوشگون سسیمی زورلا بوغازیمدان چیخاردیم:
ـ کیمسن؟
هئچ بیر یانیت گلمه‌دی تکجه گولوش سسی یوکسَلدی. قورخودان یوخسا سینیردان اولدوغونو بیلمه‌دیم آما باغیردیم:
کیمسن ؟ جواب وئر !
یئنه ده هئچ بیر یانیت گلمه‌دی یالنیز گولوشون سسی داها یوکسه‌لیب ابلیس واری گولوشه دؤندو. کیمسه یاواش_یاواش منه یاخینلاشیب باشیما دولاناراق منی آجیغا میندیرمک اوچون گولوردو. سسی ائله بئینیمه دوشموشدو آز قالیردیم دلی اولام ال‌لریمی برکدن قولاغیما باسیب بوتون گوجومله گؤزلریمی یومدوم. های_کوی سسینه گؤزلریمی آچدیم. گونشین شوعالاری پنجره‌دن اوتاغا دولموشدو.بیر آن اؤزومو سرسم کیمی حیس ائتدیم. اوتاقدا کی یاتاغین آیاغینا سؤیکه‌نیب قالمیشدیم. گئجه‌کی ایبلیس واری گولوشلر یادیما دوشدوکده ال_آیاغیم تیتره‌ییب کئییدی. اولدوغوم بوجاقدان اوتاغی گؤزدن کئچیردیم. ائوین آشاغی قاتینیندا هر شئیین اوز قایداسیندا و دوزنلی اولماسینا باخمایاراق بو اوتاقدا هر شئی قاتما_قاریشیق’ایدی. اوتاغین دیواریندا آشاغیدا گؤردوگوم خورما ساچلی اوغلان اوشاغینین شکلی وار’ایدی. دئمه‌لی بورا اونون اوتاغی دیر. او آیاق سسی منی نه‌دن بورایا چکدی؟ یئنه ده پنجره دن های_کوی سسی گلدی، چتینلیکله آیاغا قالخیب پنجره‌نین آرخاسینا یئتیردیم اؤزومو. اوتاغین پنجره‌سی عیمارتین آرخاسیندا کی مئشه‌لیگه آچیلیردی. گؤز ایشله‌دیکجه یام_یاشیل آغاجلاردان باشقا بیر شئی گؤرونموردو آنجاق اونلارین آراسیندان یاردیم_یاردیم دئیه سس‌لر ائشیدیلیردی. تئز اوتاغین بیر طرفینه دوشن موبایلیملا پیچاغیمی الیمه آلیب عیمارتین آرخاسینا قاچدیم. شوبهه ائتمه‌دن اؤزومو مئشه‌یه ووروب سسین گلدیگی یؤنه دوغرو قاچدیم. سس‌لر آیدینلاشدیقجا موتورلو میشار سسی یوکسه‌لیردی. اوچ آدام منه ساری قاچیردی. اونلارین ایکیسی قیز بیری ایسه اوغلان’ایدی. آرخالاریندان اوزونون بیر طرفی چاپیلمیش، پال_پالتارلاری قانلی اولان وامپیره بنزر بیری موتورلو میشارین آغزیلا هاوادا نه‌ییسه کسمه‌گی ایفاده ائده‌رَک اونلارین دالینا دوشموشدو. قاچانلار منه یاخینلاشدی اوغلان منه قاچ_قاچ دئیه باغیردی اونو دینله‌مه‌ییب دایاندیم. اوغلان قیزلارین بیرینین الیندن وتموشدو قاچاراق منیم یانیمدان کئچدی‌لر. اونلاردان آزجا گئری قالان قیزین آیاغی بیر کؤتوگه ایلیشیب ییخیلدی. اوز_گؤزونده قورخونو گؤرمک اولوردو دوغروسو من ده قورخموشدوم. اونون ییخیلارکن باغیرماسینین سسینه یانیمدان کئچن‌لر ده دایانیب آرخالارینا باخدیقدا قورخودان دونوخوب قالدیلار. وامپیره بنزر کیشی قاه_قاها چکیب آیاقلاندی. قیزا ساری یوگوروب الیندن یاپیشیب یئردن قالدیردیم سونرا وار گوجومله قاچین دئیه باغیردیم. یئنه ده هر کس قاچماغا داوام ائتدی. بیر آزدان سونرا عیمارتین بارماقلیقلاری گؤروندو اورایا_اورایا دئیه سسلندیم. اؤنوموزده گئدن قیزلا اوغلان حیطه گیرَر_گیرمز چمن‌لرین اوستونه ییخیلدیلار آردلاریندان الینی مؤحکم توتدوغوم قیزلا من ده حیطه واردیق. او دا اونلار کیمی نفس دارلیغی اوجباتیندان یئره دوشدو. آرتیق میشار سسی گلمیردی دئمک گونلیگیمیز ساغالمیشدی. بیر آن شیرکتده اولدوغوم اوچ ایل مدتجه هر گون ایدمان ائتدیگیمه سئویندیم. اونلار کیمی منیم نفسیم دارلیق ائتمیردی. الیندن یاپیشیب قاچیردیغیم قیز گؤزلریمین ایچینه باخاراق گولومسه‌ییب ساغ اول دئدی. منسه اونا الیمی اوزالدیب دیمز دئییب الیندن یاپیشیب قالدیردیم آیریجا اونون یولداشلارینی دا قالدیریب گلین ائوه گئتمه‌لییک دئییب قاباغا دوشدوم. اونلار دا آردیمجا گلدیلر. عیمارتین ایکی طاغلی بؤیوک قاپیسیندان ایچه‌ری گیردیک. منیم ایلک دفعه بو عیمارته گیردیگیم کیمی اونلار دا چاشقین_چاشقین اطرافا باخیردیلار. بویورون دئیه مئبئل‌لری گؤسته‌ردیم. اوچوده بیر طرفده اوتوردولار من ده قارشیلاریندا ایله‌شدیم.
اوغلان ـ بورا سنیندی؟
ـ یوخ
اوغلان ـ بوردا نه گزیرسن
ـ هئچ اؤزومده بیلمیرم
بیر_بیرلرینه باخیب گولوشدولر.
ـ سیز کیمسیز؟
اوغلان ـ من احمدم
سونرا الینی یاپیشیب قاچیردان قیزی گؤسته‌ردی بو آداخلیم زینب و بو دا باجیم نرگیز. بس سن؟
ـ آراز
نرگیز گولومسه‌ییب: بورا سنین دئییلسه ! اوندا بوردا نه گزیرسن ؟
ـ بونو آنلاتماغیم زامان آپارار. بورادا گوونلیییک. حله‌لیک بو ائو منیم اختییاریمدا سیز ده قوناغیم سیز، راحات اولون.
زینب الینی قارنینا سورته‌رَک: بو کؤهنه ائوده یئمه‌گه بیر شئی تاپیلار؟
ـ گوله‌رَک: بوللو _سوللو. سیز مطبخده بیر شئی حاظیرلایین من ده احمد’له بیر آز صحبت ائله ییم.
آردی وار……
