۸ مارت دونیا ظریف لیک گونو موناسیبتیله…
حمید آصفی
تیخ تیخ خانیم !
الینی وئر منه دستاراجی
تهران سوسوزدی تهران تیکانلی
کابوی‌لیقدان ییخیلمیش تاخ تاراخ خانیم!
کاکتوس سرتلییی‌دیر جانین
جانا گلمیش ده گومانسیز و پناهسیز.
و منه وئر اللرینی، اللرین وودکا آجیلیغیندان شیرین.
پینتی ساچلارین اورلانمیش، داراخ! خانیم
کولک قارشیلیغین‌دیر سنین
و تهران کولکسیز…
کولکسیزده زیبیل….
اوئی ی ی ی سولوغون داغلاریندان بؤیوک، داغ ییه‌سی
ساچلارین شومور بالاسی شوموردی…
و قوچ قوزولارین، باشی کسیک لئش
سودسوز و سوموکسیز امیلمه‌میش
امیلمه‌سی اولاناقسیز داش تاققیلتیسی ی ی ی
و بیزیم سوسوزلوغوموز تهرانین گوناهی‌دیر
گوناه هر جئب‌دن بیرین اسگیلتمکدیر بیرین آرتیرماق
آداملار تهراندا جئبلریندن تانینیرلار.
و گوناه شومور ساچلاریندا مین یول شمشیره راس گلمک
سنین‌سه:
ارکک‌لرین جئبینده قپیک قوروش سسی‌دیر سسین
و گؤودن محاریبه‌دن باسیلمیش دا گلمیش عسگر کیمی تؤرتؤکونتو
پاییزینا یاتاق آختاریرسان بیلیرم
قیشینا باشینا چکه‌جه‌یین ایستی قوجاق
گل یاتاق
بو قبیردن او مین بیرینجی قبیره جن
و قوجاق
و قوجاق
سویوق‌دیر خانیم!
قوجاقلار تهراندا سویوق‌دیلار
ذوکام اولاجاقمیش کیمی؛ سان
و گئت . گئت اؤزونو تانی
تانری اؤزونده‌دیر دئمیش بیر کیشی.
کیفسک اوزاق ایللرین آرخاسیندان گلن بیر ارکک! دئمیش بونو
بوینوندا مین بیر سنین گوناهین یازیلمیش بیر ارکک
قوینوندا هر دؤیوشچودن بیر شمشیر سالدیرمیش بیر ارکک
ارک‌لر چوخدان سنی قوناق ائتمک ایسته‌ییرلر آنفولانزایا
گیریپ توتاجاق تاخچانداکی غورورون
ساتین آلینمیش و سینیق و اوجالیقدان یئره سالینمیش گؤوردن
تپیک ذؤیوشونده سنی توپارلایاجاق‌لار خالچالار
و او زامان…
تانری دا سویوق قوجاقدیر منجه بیله‌جکسن…
ساده‌جه آددیملارین تیتیخ خانیم کیمی تاخ تاراخ اولماسین
اویانماسین ایبلیس…
تهراندا پیس پیس میلیونلارا یاخین ایبلیس یاتیر.
یاتیر دا سویوق یاتاقدا سویوق قوجاق کیمی تیتیق خانیم
جنازه نه آند ایچیرلر تهرانداکی‌لار! آند ایچیرلده آواندا گئدیر هر شئی
نه بیز اؤلوروک نه اونلار
اؤلوم ده تهرانا بیر بهانه‌دیر..
و من بهانه‌لری دوشوننده دیلیم توپوق وورور تیخ تاراخ تیخ تیخ داراخ تاراخ….
اونسوز دا بیزیم چوخداندیر قاطاریمیز چاتیب
دوشن کیم دوشورولن کیم !!!
اومود سنه‌دیر آنجاق خانیم هئی!!
دده‌م قوروقود بویوندان بیر بویلانسانا
قادین ایپک‌لیکدیر دئیه سریلسه نه اوستوموزه
تهرانا اومود یوخ
اومود اوجا شیرویه قالمیش و سن اوجالیقسان دئیه کولک قارشیلیغیندان اسیر
اسیریئسیر ارکک‌لر
خسته، آنجاق آیاق اوسته ارکک‌لر
اؤلومونه سوسورام سنین تیخ تیخ خانیم
اؤلومونه دوشونرم سنین داراخ خانیم….
