سئوگی دبی/ ستار گول محمدی
قان اولدو کؤنول مؤحنت اول ماه جبیندن
سوزدوکجه شکر چاه-ی زنخدان لبیندن
زار اولدو گئجه م، گوندوزوم افغان ایله کئچدی
هئچ کیمسه‌یه سیر وئرمه‌دیم عشقین ادبیندن
لیلا دئیه عشقیده سر کویونا دوشدوم
هئچ سورمادی مجنونلوغومون بیر سببیندن
گر سجده اوچون بیر گئجه محرابینه دوشسم
بالله کی دوشر خسته جانیم تاب و تبیندن
اظهاره گلیر دل بو تمّنا ایله هر شب
نوطقوم توتولور گوندوز اولاندا غضبیندن
ترسادی، مسلماندی باشا دوشمورم اصلا
قورخوب سوروشا بیلمیرم اصل و نصبیندن
نه رحمه گلیب عاشیقینه بیر کرم ائیلر
نه موشگوله باخ دل چکیر ال اؤز طلبیندن
قالدیم آسیلی وصل ایله هیجران آراسیندا
یارب منی قورتار بئله عشقین عجبیندن
عشق اهلی دؤزر عشقیده “ستّار”ا دئین کی
هر جور و جفا حاصیل اولار سئوگی دبیندن
یک پاسخ
ساغ اولون بیزیم ده سایتی یایملایین