بو ائلدن دیره‌ک گئتدی!
کریم گول‌اندام
بو ائلدن دیرک گئتدی!
یاردیمجیل بیلک گئتدی.
پوسکورن وولکان سوسدو،
اودلو بیر اوره‌ک گئتدی!
اللی ایلدن آرتیق چیرپینان اوره‌یی‌نین یاغینی، گؤزلری‌نین نورونو چالیشقان قلمی ایله دوغما یوردو، آنا دیلی و میللتی‌نین قابیلیتی اوغروندا خرجله‌ین نغمه‌کار بولبول، محمود صادقپور(«شامی») ۱۳۹۵-نجی گونش ایلی‌نین تیر آیی‌نین اونوندا سوسدو. او بیر خیال کیمی حیاتا گؤز یوموب، ابدیته قووشدو. دیری ایکن قدرینی بیلمه‌دیگیمیز سایسیز صالح وطن ائولادلارینا تای اولاراق «شامی»نین ده قدرینی، حقیقی ده‌یرینی بیلمه‌دیک! هئچ ده گلایه یئری یوخدور. هر میللت گئنیشمه‌سی، بیشکینلییی و مودروکلویو قده‌ر اؤز ائولادینا ده‌یر وئرر! بیز ده سای جهتیندن بئش قات سایر سویلاردان آرتیق اولدوغوموزا باخمایاراق، حالا تام قایناییب، بیشیب یئرینه دوشمه‌میشیک. بونونلا بئله نهنگ، پارلاق اولدوزلار عرصه‌یه چیخارتماقدا بؤیوک پتانسییئله مالیک اولدوغوموزا شوبهه یوخدور. «شامی» کیمی بیر پارلاق اولدوزون تورک سماسیندا ایشیق ساچماسی دا بونا بیر ثبوتدور.
«شامی» محض اونا گؤره سایر تای- توش و یاشیدلاری ایله فرقله‌نیر کی، او هله آلتی صینیفلی بیر مکتبی بیتیرمه‌میش اوستادلیق مقامینی حق ائتمیشدیر! گؤر نه درجه ده چالیشقانلیق لازیم ایدی. «محمود صادقپور» او تحصیل اوزو گؤرمه‌ین باریجیق بالاسی بوگون نه تکجه اورمونون بلکه اوتای- بوتای دوغما آذربایجانین پایئزیاسی‌نین، ساتیریک شعری‌نین، وطن پرورلیک قابیلیتی‌نین طبیعت نغمه‌کارینا چئوریلسین! او چوخ دا ساغلام اولمایان گؤزلرینی اون ایللرله آذربایجانا، تورک عالمینه عاید اولان هر بیر یازی، کیتاب و مطلبه توشلامیش و اونون شیره‌سیندن منیمسه‌میشدیر! «شامی» سؤزون حقیقی معناسیندا بیر سؤز اوستاسینا چئوریلمیش و نائیلیتی هئچ ده آسان قازانمامیشدیر! بلکه اونا صاحیب چیخان اولسایدی فلاکت دولو کوچه‌لر،خیاوانلاردا دوچرخه اوسته حادثه‌یه اوغراییب، ایللر دیز ناحیه‌سیندن زده آلدیغی اوچون سرطان‌لا ال به یاخا اولمازدی!
یالنیز یارادیجیلیغی‌نین بیر گوشه‌سی ایکی کیتابی(طبیعتین قوینوندا-داشلی یول) دا میللتیمیزه معلوم اولان «شامی» بوز داغی کیمی گؤوده‌سینی قارانلیق دریادا گیزلی ساخلامیشدیر! اوغورلو اقبالا توش گلدیکلری اوچون یالنیز من تک بیر نئچه شانسلی یاخین دوستلاردان عبارت اونون گیزلی خزینه‌سینه یول تاپمیشلار. اونون دوشونجه طرزی، خرافه‌پرستلیکله گرگین و کسگین چارپیشمالاری، جراح بیچاغیندان ایتی ساتیریک دیلی، اومانیست مفکوره‌سی، شیرین فولکوریک بیانی، سایاچی‌لارین، عاشیق هاوالاری‌نین، چئشیتلی قوشلارین، آتالار سؤزلری‌نین، اعجازکار قلمی ایله یاشاتدیرماسی سرودلاری، هیمن‌لری، ماهنی سؤزلری، منظومه‌لری و مینلر نظیره، تضمین، آلقیش، قارغیش، حربه –زوربا، عاشیق شعرلری هله ایشیق اوزو گؤرمک آرزیسیندادیر! او آدی کیمی هم «محمود» هم ده «صادق» اولموش و عؤمور بویو ریاکارلیقدان، ایکی اوزلولوکدن و یالتاقلیقدان اوزاق اولموشدور. او، حیاتی بویو محبت بولاغی، وطن نغمه کاری و یوخسوللار یارینا چئوریلمیشدیر. سعادته باخ! او منه ان یاخین یئرده باریجیق گوشه‌سینده ابدیته قووشارکن قونشو اولدو.!
یک پاسخ
اؤلمز شاعیریمیز شامی نین اولو روحو شاد اولسون، قوتسال یولو دواملی!
دیرلی شاعیریمیز گول اندامین آخارلی قلمینه عشق اولسون کی، مرحوم شامی نین سانباللی ایشلرینی گؤزل شکیلده ایشیقلاندیریب!
ساغ اولسون دیل و ادبیاتیمیز اوغروندا چالیشان، ایشیق سایتی نین امکداشلاری …