بو خاطیره هئچ واخت منیم یادیمدان چیخماز. من چوبانلیق ائد‌ن ایل‌لرین بیرینده یای فصلی هر ایلده‌کی کیمی «شاه‌وئردی» یایلاغـینا کؤچ ائتدیک. من او زامان آتامین یانـیندا کؤمکچی گئده‌ردیم. هامی منی «بالاچوبان» سسله‌یردی، بیر گون من آتاملا یایلاقدا قویون – کئچی‌لری اوتاریردیم کی، آتام اوزونو منه توتوب دئدی:
ـ بالا چوبان! من داغـین اته‌یینده‌کی کنده گئدیرم. آخشام قاش قارالاندا قایـیداجاغام، سورودن میغایات اول. ایت‌لر ده کی، یانـیندادیر. سونرا سوروشدو: تک قورخمازسان کی؟ من بیلمه‌دیم کی، قورخارام یا یـوخ! یالنـیز گولومسه‌دیم. آتام الینی کوره‌ییمه ووروب دئدی: باراکاللا اوغلوم! بیلیردیم کی، قورخمازسان، سن داها بیر کیشی اولموسان!
آتام گئتدی… آخشام اولدو. من نه قده‌ر گؤزله‌دیم، آتام گلمه‌دی. اؤز- اؤزومه دئدیم: حتمن گئجه‌نـین قارانلیغـیندا یـولو ایتیریب، هاردان اولسا سحر گلر. اوره‌ییمه قورخو دوشموشدو، یاتا بیلمیردیم. ایت‌لر ده یاتمیشدیلار… بیر سس ائشیتدیم، گؤره‌سن کیمدیر؟- دئدیم؛ آدام‌دیر، یوخسا جاناوار…
سسله‌دیم: آتا… آتا! جاواب گلمه‌دی. یـئنه هامان سسی ائشیتدیم. سانکی بیری حزین سسله آغلایـیردی. دقتله باخدیم… قارانلیقدا گؤزوم بیر بالاجا آیی‌یا ساتاشدی. ایسته‌دیم ایت‌لری هایلایام. دیلیم توتولدو. آیی منیم ایکی آددیم‌لیغـیمدا دایانمیشدی. بیر الینی گؤیه قالدیریب، آغلایـیردی. یاخشی باخدیم حـیوانـین آیاغـینا بیر چالغی تیکان باتمیشدی. تیکانی آیـی‌نـین آیاغـیندان چیخارتدیم. آیی آغلاماق سسی‌نی کسیب و درحال اورادان اوزاقلاشدی. منیم حالیم اؤزومه گلدی، قورخودان چیخدیم، آمما یـئنه ده یوخوم گلمه‌دی. گئجه یاری‌یا چاتمیشدی. قویون‌لار، ایت‌لر یاتمیشدیلار. آتامدان یـئنه خبر چیخمادی. آی سود کیمی ایشیغـی‌نـی داغ- داشا سالمیشدی… یـئنه بیر سس قولاغـیما چاتدی. یاخشی باخاندا ایکی آیـی‌نـی گؤردوم. آنا و بالا ال‌لرینده بؤیوک بیر شئـی گتیریردیلر. قورخودان ایت‌لری اویاتدیم. آیـی‌لار ایت‌لری گؤردوکده ال‌لرینده‌کی شئـیی یـئره قویوب گئری قایـیتدیلار. من یاواش- یاواش او شئیه یاخین‌لاشدیم؛ بیر بال پته‌یی گؤردوم. دئمه، آنا آیی منه بال سؤوقات گتیرمیشدی. آخی من اونون بالاسینی آغـیر درددن قورتارمیشدیم. سحر آچیلاندا، آتام گلدی و من اونا ماجرانی دانیشدیم، آتام گولدو و چوبوغونون توستوسونو گؤیه اؤتوروب دئدی:
ـ اوغول! آنالار چوخ بؤیوک ایش‌لر گؤره‌ر، بال گتیر‌ن آیی دا بیر آنادیر…اوغلوم… آنا!
یک پاسخ
روحو شاد اولسون محمد قاضی نین. ایشیق سایتی نین دولاندیرانلارینا دا عشق اولسون کی بو یازیچی لاریمیزین آدلارینی دیری ساخلاییرلار. محمد قاضی یاشاسایدی یقین بیزیم ادبیاتیمیزدا یئنی بیر گنجعلی صباحی وجودا گله جک ایدی. اونون اوره گه یاتان حئکایه لرینین بعضی نمونه لرینی ۱۳۶۰ و ۱۳۶۱- نجی ایللرده چاپ اولان ” یئنی یول” مجله سینده اوخویا بیلرسینیز. من محمد قاضی ایله فقط بیر ایکی دفعه تئلفونلا دانیشدیم . آنجا اونون لطفو همیشه منه شامیل اولموشدو. او تبریزین ثبت احوال اداره سینده ایشله دیگی گونلرده منیم باجیم تبریز ده سیجیللیسینی دگیشدیرمک اوچون او اداره یه گئدیر . قاضی شناسنامه نین اوستوندن باجیمی تانییر و آتامین آدین چکه رک دئییر: بیز بو شاعیره خدمت ائتمه لییک . وبئله لیکله اوزو اداره نین اوتاقلارینی بیر بیر آرخادا قویوب و باجیمین ایشینی انجام وئریر. اونون بو ایشی هله ده بیزیم عائله ده دئییلیر. بوندان علاوه ماماقانلی معلم داود سلمانزاده ممقانی دا اوندان منه چوخ خوش خاطیره لر تعریف له ییب کی واختیله اونلاری یازاجاعام ان شا الله. محمد قاضی نین خاطیره سی همیشه بیز آذربایجانلی یازیچیلارین یادیندا دیری قالاجاقدیر.