گله‌جک ایچین کیچیک بیر “قارالاما”
بهروز اسماعیل‌زاده
۱٫
دوشونجه منم. بو تعریف گؤتورمه‌ین بیر جومله‌دیر. ساده‌جه آچیقلانا بیلر. آچیقلاماغین نئچه یؤنو اولدوغو ایچین سفسطه‌یه مئیلی اولان بیر اولاجاقجاسینا تهلوکه‌لی و دوزلودور. اصلینده شئیطنت باشلانقیجدا قورخونون تملینی سارسیتماق ایچین یارانان بیر دوشونجه‌نین اویوندان لذت آلابیلمه گوجونون ساده‌جه نئچه قوللاریندان بیری‌دیر. قورخو دوشونجه منم دئین بیرینه سوروملولوق گتیرمه‌ییر، آنجاق بو دوشونجه‌نین درینلییینی دوشونوب ده، اؤز قوراللارینی تهلوکه‌ده گؤره‌ن آیدین‌لارین بیلینج آلتیندا یاشایان وارللیغلارینا آچیلان بیر ساواش‌دیر.
دوشونجه دئدیییمده ایلک اینسانین یئر اوزونه آیاق قویماسیندان توتون تا بو چاغین هر هانسی دورومونون قوتسال دووارینا یازیلان یئنی بیر ایزدیر.
ایز هر زامان ایمگه‌سینی یارادان بیر وارلیق‌دیر. ها دوشونجه ده قالا، ها دوشونجه دن یولا چیخا. ها دوشونجه‌دن آتیلیب یئریمه‌یه باشلایا، ها یئریمک‌دن سونرا بیر شئی‌یین دورومون نسنه‌نین آلتیندا قالا. سونوجو گؤزه آلان بیر دوشونجه باشلانقیجدا دور- آخساسا بئله یولا دوشموش بیر وارلیق ساییلیر منده.
۲٫
ایمگه، ساده‌جه ایمگه دئییل. بیر دوشونجه‌نین نئچه دؤنه آجی چکدیغی آنلاردان ساده‌جه بیری‌دیر. دوشونجه‌دن دوغان بو تابلو، تابو دان تابوت‌لارا قدر دئییشمه گونلوغوندن، گئچمیشه بورونوب، گله‌جک‌لرده پارچالانا بیلر. پارچالانماق دا هدف تیکه پارچا اولماق دئییل. تیکه‌لرین هر هانسی بیرینده یئنی‌دن سانجی‌یا بورونموش بیر دوشونجه‌نین عاجیزلییه مئیدان اوخویان بیر وارلیق‌دیر.
مئیدان دئدیییمده، هئیکل‌لشمیش بیر تاریخدن توتون تا دووارلاریندا سلوقان لاختالانمیش چاغین ایزلریندن ایمگه‌لره بویلو اولان بیر دوشونجه‌دن سؤز آچیرام.
بیر شئی‌لر تیکه پارچالاناجاق… گؤزله‌یین منی
بیرده ایمگه وار بو جومله‌نی سئویرم
سئودیییم بیر جومله‌نین،کاراکترین، دورومون، دوشونجه‌نین قاباغینا نوقطه قویمارام
دوشونجه سایقی‌نین سارسیلماز قورالی‌دیر.
شئعیر شئیطنت‌دیر. آنی بیر جننت. آنی بیر لذت ده باشلانیب سونسوز بیر داددا گولومسه‌مک‌دیر دئمک ایستردیم، آما نه یازیق کی منیم تعریف ائله‌مکدن آجیغیم گلیر. تعریف اولان بیر تمل سورونلار یاشایا بیلر.
من ایسته‌دیییم زامان هر بیر قالیبه حؤکم وئره بیله‌رم . چونکو قالیب مندن باشلاییر. مندن باشلایان بیرینه بویون ایمک آوانگاردا گارد توتماق‌دیر. آوانگاردلارا گارد توتماق قالیب‌لرین ایشی‌دیر. من دوشونجه‌یه‌م. اولدوغوم بیر شئیی تعریف ائله‌مک من‌لیق‌دیر. آچیقلاماق ایسه آیدین‌لیق‌دیر. من هر ندن، هر کیمدن اؤنجه یازدیقلاریمین لذتینی اؤزوم دادمالی‌یام. شئعیریمین دادی داماغیمدا قالمالی. من موخاطب ایچین لذتیمین قاباغینا سینیر چکه بیلمه‌رم. موخاطب داد آلسا نه موتلو اونا. آلماسادا بونون سوروملوسو من دئییلم. من اؤز لذتیمین سوروملوسویام. اگر یازدیقلاریم منی سرخوش ائله‌ییرسه زامان ایچینده موخاطب ده لذت آلابیلر؛ آلماسادا نه موتلو موخاطبه. دوروم‌دا مندن کئچیر، آخیم‌دا. من اؤزومده اولان بیر آنی تعریف ائله‌مک‌له اؤزومو آلداتا بیلمه‌رم. من مجهول بیر زامان ایچین یاشامایی سئومیرم. مجهول بیر زامانا اؤزونو ساخلایان اینسان تکرارلاردا قالمایا محکومدور.
اصلینده ایمگه دوشونجه‌نین دورولماسی ایچین ایلغیملار ایله آنلاشا بیلر. بیر دوشونجه‌نین نئچه یؤنلو ایمگه‌سل بیر وارلیق اولدوغونو گؤرمک ده اولار، حیس ائتمک ده. دوشونجه حاکیم یئرینه مغلوب اولانین ذهنینده داها چوخ آجی ایمگه‌لرله اؤزونو قاندیرا بیلر. بیز بیر دوشونجه‌نین پیس یادا یاخشی اولماغینا باخمایاراق، او دوشونجه‌نین دوروموندان کئچن ایمگه‌لرله باخیشیمیزا یؤن وئره بیلمه آواتتاژینا مالیک بیر دوروم ساییلا بیله‌ریک. دوروم دئدیییمده هر هانسی بیر آن اولا بیلر. ایمگه‌لر بیزلره یئنی کیملیک‌لر قازاندیرا بیلن بیر وارلیق ساییلاراق دوشونجه‌دن دوشوب بیزلری یئنی بیر آلان ایله تانیش ائدندن سونرا – آنلاشیلان یادا آنلاشیلمایان – بیر سارسینتی ایله دور آخسادا بیلر. بو دور آخساما اوستوموزده اولان باخیشلارین بیزلردن اومودونو کسمه ایمگه‌سینی ده جانلاندیرا بیلر، اومودونو کسمه ایمگه‌سینی ده. هر حالدا بیز دوشونجه اولدوغوموز ایچین و یئنی ایمگه‌لری مغلوب بیر توپلوما حاکیم ائتدیییمیز ایچین آجی بیر تاخما آدایله اوز به اوز گلدیییمیزی دوشونه‌رک بو ایلغیملاری آچیب آشماق فیکریندن دالی چکیلسک بئله آجی بیر ایمگه دوشونوله‌جک بیزلری…
ایمگه‌ده تمل بیر تابو اولمادیغی ایچین من ایمگه‌لرین وار اولوشونداکی آنلاری لذت آلماق ایچین باشقا بیر دوشونورون دوشونجه‌سینه احتییاجیم یوخدور.
سیلگی‌لرین سیله بیلمه یئته‌نه‌یینی دوشونجه‌نین ذهنینده‌کی ایمگه‌لردن آلسانیز اگر، سیلگی ساده‌جه سیلگی کیملییینی داشیماق ایله داشینیب گئتمک زوروندا قالاجاق.
باشلاماق باش آلیب گئتمک دئییل. گئتمه‌یین باشینا باشقا بیر سورون یوکلمک‌دیر.
بیز سیندیرماق فعلینه باغلی بیر آخیم آخیتمالی‌ییک. دوشونجه‌نین ایمگه‌سینده هانسی جانلانیرسا جانلانسین
۳٫
دوشونجه‌دن دوغوب حیاتا یئریکله‌ین ایمگه‌لره بیرده تئکنیک ایچیرتسک بام باشقا بیر لذت دولار روحوموزا. تئکنیک دوشونجه‌نین اوست یاپیسیندا دایانیب آلت یاپیسینی گؤزله‌ییب درین یاپیسیندا ایمگه‌نی قوجاقلاییب آیری بیر حیات ایله قارشیلاشدیرار بیزلری. آیری بیر حیاتا گؤز آچان اوخوجو قیرخینی یئنی آشمیش بیر اوشاق کیمی اؤنجه باخیشلاری ایله ایمگه‌لره شاشقینلیق باغیشلایار؛ ایمگه‌نی دادماق ایچین ایستر ایسته‌مز اونو آغزیندا دادماق ایسته‌یه‌جک. بو صافلیق من یازارا بوتون لذتینی دادمیش بیر حیاتین قایتارماسینی یئنی گؤسته‌ره‌جک. تئکنیک ایمگه‌نین فیطرتینده اولدوغو ایچین ساده‌جه منی گؤزله‌دییینی اعتیراف ائده‌جک‌جه‌سینه آلچاق گؤیول بیر وارلیق‌دیر. تئکنیک دئدیییمیزده دوشونجه تاریخینه یئنی‌دن بیر باخیش آتمامیز گرکیر. دوشونجه تاریخی دئدیییمده ماغارالاردا یاشایان ایلک اینسانین ایمگه‌سینی ذهنیمیزین قویوسوندان چیخاریب گون قاماشدیران گؤزلرینده جانلاندیرمایا گلن دوشونجه‌نی یئنی‌دن دوشونمه‌میز گرکیر. ایلک اینسان دوشونجه‌دن عیبارت‌دیر .ناقص اولسا بئله و قورخو بورادان باشلایار.
دوشوندویوم ایمگه‌لره تئکنیک باغیشلاماق منیم ایشیم‌دیر
آلت دان آلماق آلمانین وار اولوشونا شوبهه آرتیریر
تئکنیک اینسانین دوشونجه‌سینده ایمگه‌له‌نن هر بیر شئیه، نسنه‌یه، دوروما، آخیما یئنی‌دن اولما یئته‌نه‌یینی باغیشلایار
ایلک اینسان
ماغارا
دوشونجه
قورخو
ایمگه
یولا دوشمک
یورولماق
دور آخساماق
اوره‌تمک
ایلک اینسان آرابالارلا یول گئدیردی ایندی
تئکنیک دئدیییمده دوشونجه ایمگه‌نین یؤنلرینی دئییشدیردیکدن سونرا بیر دوروم دا قالماماسی‌دیر. دوروم دویغوسوز قالدیغیندا گئت گئده هئچ بیر شئی ایفاده ائتمه‌یه‌جک و بو ایفاده هر کسین ذهنینده دورقونلوغا ندن اولاجاقجاسینا تکرا اولموش بیر دوروم ساییلاجاق. اؤرنک اوچون: “سنی سئویرم”
بو دورقونلوغدا قالمیش بیر دورومدو ساده‌جه و تکرارلانمیش اولدوغو ایچین ده هئچ بیر شئی ایفاده ائتمیر منه آرتیق. بیزلری بو دورقونلوق دوروموندان ساده‌جه دوشونجه‌نین ایمگه‌لره یئنی یؤن باغیشلاییب تئکنیک ده قابیق دئییشمه‌سی قورتارا بیلر. قورتارا بیلر دئییرم چونکو مطلق بیر دوروم اولمامالی .اولدو ایسه دورقونلوق دوروموندا تکرارلاناجاییق.
باشقا بیر اؤرنک داها:
Seviyorum seni
ekmeği tuza banıp yer gibi
ناظیم حیکمتین شئعیرینده کی بو دیزه دوشونجه‌نی دورقونلوغدان اویادیب یئنی بیر ایمگه‌نی قوجاقلایاراق دورومو آخارلیغا یؤنلندیریر
– دوروم شئعیرده دورقونلوق یاشاییرسا سوروملوسو منم
– دوروما آخارلیق باغیشلاماق دوشونجه‌نین دونوق ایمگه‌لرله یئنی‌دن ایلگیلنمه‌سی ایله آیدینلاشار
– منه دوشونجه‌نین ایمگه‌لره باغیشلادیغی تئکنیک دن سونرا قارالاماق دوشر
– قارالاماق چاغین ناخوشلوقلارینین قاباغیندا آشیلاناجاق آخار دوروملاردان ساییلا بیلر
– من “بیر” چوخونلوغام
۴٫
قارالاماق دئدیییمده هر ندن اؤنجه بوتون چاغلارین قالیجی اولان آدلارینا بیر باخیش آتدیم. هر کیمی ایسته‌ییرسه‌نیزسه دوشونون. دوشونجه‌سینی قورخوسوزجاسینا آختاریب ایمگه‌لردن گئچیرمک ایچین تئکنیک ده قالماییب دا قارالاماغا یول آچیب و ایزلرینی حیاتین یؤن وئرمک‌ده اولدوغو بیزلرین باخیشلاریندا سوردورمکده‌دیرلر. قارالاماق بیر دوشونورون ایستر ایسته‌مز دوشونجه‌سینین درین یاپیسیندا وار
زاهیدین بیر بارماغین کسسن دؤنر حق دن کئچر
گؤر بو مسکین عاشیقی سراپا سویورلار آغلاماز
بورادا اولان دوشونجه ایمگه ایله تئکنیکین بیر آرایا گلمه‌سی ایچین قارالاماغین نه قدر درین بیر ایز قویماسینی بوتون آجی‌لارا باخمایاراق گؤرمک اولار
زاهید اوصاف جهننم قیلیر ای اهل ورع
وار اونون مجلیسینه گؤر کی جهننم نه ایمیش
یا بو بیت‌ده کی قارالاماق تکجه شاعیرین یوخ بوتون چاغلارین آوانقارد دوشونجه‌سینی حئیرت ده ساخلامیش بؤیوک بیر ایزدیر.
– قارالاماق دئدیییمده ساده‌جه بیر ایمگه دوشونولسون دئیه یانلیش‌دیر.
– دوشونجه‌نین ایمگه‌یه یئنی بیر روح باغیشلادیغینی تئکنیک‌لرده دوشونولموش قارالاماق جانلی ساخلایا بیلر.
