سن منیم کیمی سن …
کریم گول اندام
هردن باخیش‌لارین یول چکه‌جک‌دیر،
منیم باخیش‌لاریم یول چکن کیمی.
حسرت اوره‌یینده درد اکه‌جک‌دیر،
منیم اوره‌ییمده درد اکن کیمی،
سن منیم کیمی‌سن، من ده، سن کیمی.
بیر زامان سئوینجین دریاسینداسان،
بیر زامان غملرین اورتاسینداسان،
رؤیا‌لار، آرزی‌لار دونیاسینداسان،
گؤیرمک حسرتی چکن دن کیمی،
سن منیم کیمی‌سن، من ده، سن کیمی.
من اوره‌ک سیرریمی سؤیلدیم سؤزله،
سن منه سئوگینی آندیردین گؤزله،
من سنی اؤزلرم، سن منی اؤزله،
هر ایکیمیز بیر روح، بیر بدن کیمی،
سن منیم کیمی‌سن، من ده، سن کیمی.
غریب بیر قوش اولدوم وطندن آیری،
دوشدوم گولدن اوزاق، چمندن آیری،
آیلاردیر دوشه‌لی سن مندن آیری،
دالغین خیال‌لارا دالدین من کیمی،
سن منیم کیمی‌سن، من ده، سن کیمی.
داریخما، بیر زامان گؤروشه‌جه‌ییک،
گؤروشوب، باریشیب، اؤپوشه‌جه‌ییک،
بیر بیره قاریشیب سئویشه‌جه‌ییک،
ایکییه بؤلونموش بیر وطن کیمی،
سن منیم کیمی‌سن، من ده، سن کیمی.
