بئش شعر
مسعود اسلامی

(۱)
گونشین سون نفسینده بوغولوب اورمان
یاپراقلار بیری بیرینین بوینونا آخیر
باغلارا دومان چؤکوب
شهر دورغون
دنیز دایانیب باخیر
ناققالار لومبا- لومبا اودور بالیقلاری
گؤزلرینده ایلدیریم شاخیر
گؤزلریمده گونش داریخیر
شهر دورغون
دنیز دایانیب-
باخیر!

(۲)
شعیریمین قانادیغی
قانسیزلیغیمدان‌دیر
چک الینی اوره‌ییمدن
قان قوسارام
اللرینی قورویار دنیز
اوشویه‌رم تیراختور سویونار
چک اؤپوجویونو:
دیکتاتور روژونو یاخما اوز گؤزومه
“سئوگی‌نین ترس آواندی” اولماز
«هیهات من‌الذله»
اوشویورم اوره‌ییم اود توتوب یانیر
اللریم تیراختور قوخویور
گؤزلریم
تبریز!

(۳)
آیاق یالین سؤزجوکلر
اودوزموش شعیرلر کیمی‌دیر
بیر چاناق توت آراغی چکیب باشیما
آلاجام گؤزلرینی!
هئچ اولماسا قان قوساجام اؤلومو
کیمسه اؤز ایشینی گؤرر کوچه لرده
من ده،
قورخما، آغاجین قورخمامازلیغی
اوزوم آغاجی کیمی‌دیر
کس، بو آغاجلاری بیرر- بیرر
کس شیرین دامارلارینی
هر طرفدن باشلاسان سئوگییه سونولور
بیر قورتوم پوزا بیلر ساچلارینین قارانلیغینی
اللرین اؤز ایشینی گؤرر
یاشاسین…

(۴)
ائو گیزلیجه‌سینه اونا باخیر
او دا، میراث سئوگییه
تاوانین اولدوزلاری سؤنوب
ایرفده‌کی شکیللر
اوره‌یینده قالیر
گاه، گؤزلرینده
پیشیک اوولاییر دووارین باشیندا
تیراس…
آخ، نه یازیق دونیا
بوش وئر آللاه …حیات
گؤزلدی هر شئی
لعنت اولسون
سیگارایا، او آخشام چاغینا
نه یازیق…

(۵)
قارسیز قیش گئجه‌سی
دیلیم سؤزلریمین قوللوغوندا
ماهنی‌سیز بیر ایلنجه، سارالمیش بیر سئوینج
اللریمده دونان چیچکلر
قاپیمیزدا قار آدامی،
بیر فیلیم چک… گولوشلریمدن
گؤزلرین گؤیرسین قاپ باجامیزدا
باخیشین هئیوا قوخوسون
بیر شکیل چک دیلیمدن سؤزلریمین بورنو قاناسین
قیسا بیر شعیر اوخویوم ماشینیمین طالعیندن
اوخویوم کؤلگه‌مین اقتدارینی
نومره‌سیز تئلئفونلاردان،
امنیت: خیرداجا قارا بالیق گؤی اوزو دنیز
شعیریمی باغلا دیلیمه قاپیمیز قاشینسین
هر شئی هر زامان،
دویولا بیلر
امنیت ده!