دئمه اؤله‌جه‌یم
شریفه جعفری

وار یوخ بو دونیادا بیر اومیدیم وار
اونو دا نه اولور اؤلدورمه بئله!
گؤزومون قارشیندا یوموب گؤزونو
اومید چیراغیمی سؤندورمه بئله!

ایکی گؤزوم چیخسین، بیر جانیم چیخسین
گؤرمه‌ییم داش اوسته اوزانمیش سنی.
بیلیرسن نه قده‌ر موتلودور کؤنلوم
دونیادان دویارکن قازانمیش سنی.

نه اولور یاندیرما آرتیق قلبیمی
بیر داها اؤلومدن دانیشما بئله!
یادیندا سؤیلردیم هپ منی سن سئو
بیر کره دئمه‌دین آلیشما منه!

ایندیسه او قده‌ر سئویب دورموشام
فلک ده، اؤلوم ده چالانماز سنی.
باخما کی سوسورام سن دانیشاندا
آلله دا الیمدن آلانماز سنی.