گولون بوغازیندان الینی گؤتور
محمد سیمزاری
دست از گلوی گل بردار (حسین منزوی)

 گولون بوغازیندان الینی گؤتور
سیخسان گول بوغولار، باغچا بوغولماز.
حقیقت سو‌ایلا سوواریلان باغ
مجازین یئلی‌له آشیب داغیلماز.

قدیمدن رسم‌دیر پاخیل دونیادا
خبرین یئتیرر عشقین قارغالار.
آغیزدان آغیزا دوشر بو خبر
عاشیقی تئز گلیب دوتار دارغالار.

دارغالار؛ دوشونمز خیلقتده سئودا
حققین گولوشودور خالیقین نازی.
یارین قاشلاری‌نین نستعلیقیندن
سوروشسه قارقییا اودلار کاغاذی.

قویما حقیقتین گوللری سولسون
قوی بوتون دونیایا عطری یاییلسین.
سئودانین کیمسه‌یه زیانی یوخدور
محبّت توفاقین قویما داغیلسین.

مغزین کارگاهی گره‌گ ایشله‌سین
اوره‌ک بارگاهی ماهنی اوخوسون.
عاقیلین بیلیگی ایشیق اییرسین
عاشیقین اوره‌یی سئودا توخوسون.

قیناما ایشیقا آچیلان گؤزو
ایشیقا آچیلان گؤز یاتا بیلمز.
حقیقت دویغوسون دادان دوداقلار
دوشونوب داددیغین دای آتا بیلمز.

اوره‌یی عشقیله آچیلان اینسان
حیات فلسفه‌سین آراماق ایستر.
مینلرجه سئودالی غزل یازان قیز
اونلارین بیر بیتین یاشاماق ایستر.

آزادلیق چاتیلماز آرزیسی اولسا
حسرتی چیگنینده داشییار عاشیق.
دردلرین ساغالدان مرحم اولماسا
یاراسین دوزیلا قاشییار عاشیق.

آنلاسان نه یاخشی آنلا سئودانی
یوخسا بو ده‌یرلی دونیانی اؤتور.
حقیقت مجازلا بوغولوب  اؤلمز
گولون بوغازیندان الینی گؤتور.
13/مهر/۱۳۸۳