باییلاراق دونیایا
کیان خیاو
آغیر قانداللار ایچینده بیر توپلولوق؛
بو منم.
بیر سیرا یانمیش گؤوده وار ایچیمده
قوللار یان- یانا سالینمیش
دؤزومسوز گؤزله‌نیر اؤلوم آنلاری.
گلمه، گؤروشومه گلمه سئوگیلیم
دوغما یوردوموزون پارکیندا اوتور
قفس قوشلاری‌نین ایسته‌یینی دوشون
گونش ایشیغیندان قوورولوب دوشموش
قیریلا‌جاق سولغون یارپاقلارین چیتیرتی‌سینی دینله
و ماندئللا شکیلینی اوزه‌رینه آلمیش
کوکرک کولکلرده اوچان قزئته پارچا‌لارینی!
مندن دانیشما سئوگیلیم
نه سؤیلرسن دوستاق اولور
سونرا دوستاق دئدییینده
اؤزگور اینسانلار آنیلیر – آنیلماسین یوخسا سوچ اولور – ایچینده.
باخ، قولایجا گؤزل گؤزلرینله باخ
کیچیجیک بیر داش اوتاقدا اوتورموش بیر توپلولوق؛
بو منم.
پاس پرده‌لی پنجره‌لر وار ایچیمده
گون- گئجه دولموش دا یاغماز گؤزلر قیزاریر
قاپانیر تپه‌لرده یاشام اؤیکوسو.
مندن دانیشما سئوگیلیم
آنجاق دیل- دوداغین توتولماسین دئیه
سؤیله توپلولوق داغیلسین آغیر قانداللار ایچیندن
بیر آز دا قول- قیچین توتولماسین دئیه
منیم یانیمدا یورومه‌یه باشلا
بیر باخ، ایکی باخ، اوچ باخ
اوچ یوز اللی باخ
باخیشلاریمیز باییلاراق دونیایا گئتسین یاشامی سئوه‌رک.
بیر باخ، ایکی باخ، اوچ باخ
اوچ یوز اللی باخ
باخیشلاریمیزدا گئنیشلنسین یوللار
یولچولار.
آه، سئوگیلیم
کیچیجیک بیر داش دونیادا یاشاییریق هامیمیز
آغیر قانداللار ایچینده بیر توپلولوق گؤرونور
او منم
گلمه دئدیممی، باغیشلا
گل سؤیله‌شک گؤرک گؤرونورممی من
یوخسا سورونورممی من؟!…
28/ ۳/ ۱۳۹۳ (۲۰۱۴)
