«یاشماق» سیرا کیتابلاری نشری‌نین ۱۴-جی ایلی مناسبتیله
سعید موغانلی

بو‌ گون یاشماق کیتابلارینین نشری‌نین اون‌دؤردونجو ایل دؤنومودور.
اون‌دؤرد ایل قاباق، سکسن بئشینجی ایلین ایگیرمی سککیزینده، بیرینجی «یاشماق» یایینلاندی.
یاشماق نشر اولاندان ایکی گون سونرا، خردادین بیری جریانلاری و اعتراض‌لاری باشلادی! خالق کوچه-بازاردا «ایران قزئتی»نه اعتراض اولاراق تظاهرات ائدیردی، بیز مدنی مرکزلرده مجله داغیدیردیق.
خالق اوغور قازاندی، بیز اوچ ساییدان سونرا بیر چوخ ندنلردن اؤترو مجله‌نی دایاندیردیق…
مجله نشری دایاندیقدان سونرا، یاشماق سیرا کیتابلارینی نشر ائتمه‌یه باشلادیق.
بو‌ گونه قدر یاشماق سیرا کیتابلاریندان، ۲۰دن چوخ ناشیرین یاردیمییلا ۳۰۶عنوان تورکجه کیتاب یایینلانیب.
بو‌ کیتابلارین چوخونلوغو سیرایلا شعر، رومان، حیکایه، اوسطوره، فولکلور، آراشدیرما، تاریخ و سؤزلوکدن عیبارت‌دیر.
بو تاریخه قدر اَن چوخ ساتیلان و اوخوجولار طرفیندن یاخشی قارشیلانان کیتابلار، رامیز روشن، حبیب ساهر، بختیار واهابزاده، آنار رضا، نادر الهی، سهند، آفاق مسعود، علی تبریرلی‌نین اثرلری و ایگیرمی بیر جیلدده نشر اولان آذربایجان شعر آنتولوژی‌لری اولوبدور.
ساتیلماییب آنباردا توز یئیَن کیتابلار دا وار تاسفله…!
* اون‌بئش ایل اؤنجه «پیتزا و‌ فست‌فود رستورانی» واریم ایدی، ایندی بیر آنبار اوخونولمامیش تورکو کیتاب…
و دانیشماغا گلمز چوخ آجی اولاریلار …
* بو ایللرده یاشماق کیتابلاری‌نین یایینلانماسیندا چالیشان و‌ اَمک قویان باجاریقلی، گؤزو‌-گؤیلو توخ، بیلیکلی امکداشلارین گؤزلریندن اؤپورم…
آدلارینی چکسم قورخورام بیر چوخلارینی اونوتموش اولام! آما اوچ ساییدا یایینلانان یاشماق ژورنالی‌نین جسارتلی مدیر مسئولو «سیما دیدار» و عمومیتجه یاشماقدا مدیر هنری و گرافیست کیمی اورکدن چالیشان باجاریقلی رسام، طراح و چئویرمن دوستوم سایین «مهیار علی‌زاده»دن آد چکمه‌مک انصافسیزلیق ساییلار…
* مین‌‌دؤرد‌یوزونجو ایلده تورکجه کیتاب نشر ائدیب ائتمه‌مه‌یییمیزه بو ایل ایچینده دوشونمه‌لیییک…
* اوخوجوسو اولمایان تورکجه کیتاب یایینلایاق!؟
* بو‌ گونلرده دب اولان اصطلاحاً «آموزشی و‌ کمک آموزشی» نشرینه کئچک؟!
* یا پیتزا رستورانینی یئنیدن برپا ائدک…
اولماق و اولماماق!
مسئله بودور…
درین سایغی و سئوگی ایله؛—

بعدالتحریر:
ای بس که نباشیم و جهان خواهد بود
نی نام ز ما و نی نشان خواهد بود
زین پیش نبودیم و نَبُد هیچ‌ خلل
زین پس چو‌نباشیم همان خواهد بود
[حکیم عمر خیام]

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4