بو شهره قان دوشه‌جک…
غفور امامی‌زاده‌خیاوی

(ایلقار موذن‌زاده‌نین کیتابینا بیر باخیش)

شعرلرینی اؤنجه‌دن چئشیدلی درگی‌لر، سایت‌لار و مجازی آلانلاردا اوخویوب تانیدیغیمیز ایلقار مؤذن‌زاده‌نین ایلک کیتابی سون گونلرده «آنامین یایلیغی یاییم ائوی» طرفیندن ۸۸ صفحه ده یاییملاندی: «اوره‌یینه دؤنوشسوز بیلیط».
شعرلرینده کلاسیک مودئرن دئمه‌دن بیر چوخ قالیب‌لرده اؤزونو سیناخدان کئچیرن شاعیرین شعرلرینی بو قیسا یازیدا تنقید ائتمه نیتینده اولمادیغیمی‌وورغولاماقلا برابر، ماراغیمی‌چکن باشلیجا اؤزللیک‌لری و تمل عونصورلاری ایله ایلگیلی باخیش‌لاریمی‌اورتادا قویماقلا کفایتله‌نه‌جه‌ییمی‌سؤیله‌مه‌ییم گره‌کیر بوردا.
هر شئیدن چوخ سئوگی شاعیری اولدوغو سطیر- سطیر شعرلریندن دوشونولن ایلقار موذن‌زاده‌نین شعر ائلئمان‌لاری و هونر ساحه‌سینین وئردییی ایمکانلاریندان راحاتلیقلا فایدالانماسی، بونلاری اثرلریندن اورتایا چیخان واقعیت‌لره اویغون شکیلده دییشیب اوخوجوسونا سونماسی‌دیر منیم اوچون ماراق دوغوران قونو.
اونون شعرلرینده بیر بوداق الینده کی بئش بارماقلا پاییزی ساناییر؛ سحر- سحر باغا گیرمیش بیر بالتا ایکی شاهید آختاریر؛ تانیش بیر سلام بیردن بیره دیکسینتییه چئوریلیر؛ اؤلولر ترحیم بیلدیریش‌لرینین دیلی ایله دانیشیر؛ بیر اووچو جئیران نعشی‌نین اوستونده یاسین اوخویارکن گونش چایدا سوزور؛ سوروجو اؤلولرین روحونو داشیییر و واقعیت همشه دونوق و سرت قابیغیندان سویونارکن آچیغا چیخیر.
هر شئیین بیربیریله ایله ایلگی ده اولدوغو بیر دونیانین ایچینه دالمیش اولمانین وئردییی ایزله‌نیم‌لری ایله لوش* واقعیت کلمه- کلمه اوزه چیخیر بو شعرلرده. هر شعر بیر گوپون اولور اؤزوندن نیفرت ائدن و شاعیرین الی ایله اؤزونو آرادان قالدیرماغا محکوم واقعیتین جمودوما. شاعیر نه گؤزل و ایبهامسیز بیر ایستیکانلیقدان دانیشیر:
گئدنده آند آلیب ایچدین سوسوز باخیش‌لاریمی
دامار- دامار آخیب عشقین بو ایستیکانلیغیما
و یا آغاجلار آداملار کیمی‌اینتیحار ائده بیلیر اؤز دونیاسینین نارسیزلیغیندان:
بیر آغاج کؤرپونون اوستونده اوزانمیش دره‌یه
اؤزونو اؤلدوره‌جکمیش گئجه نارسیزلیقدان
هر شئیه اینسانی سجیه‌لر وئریلیر:
سوبای خیانت‌لر دؤشرگه‌سی
رژه گئدیر لحظه‌لرین عصبینده
گل دؤنک دؤرد دووار بدن‌لریمیزه
روح جسمانیت تاپیر:
هئی تانری
گؤرن مندن سونرا
روحومون چاتلاقلاری قاسناق باغلادیمی؟
باغلاندیمی‌روحومون جیغیرلاری؟
و شعر دؤنوب تروریست اولور:
بیلدینیزمی‌هئچ
اوره‌ییمده کی شعرلر
اؤزلرینه آیاقدان باشا دینامیت باغلاییب
اینتیحار ائدیرلر…
بیر قوشما دا گؤز ائشیتمکله، قولاق گؤرمکله، درد داراقلا و واقعیت خیال‌لا قول -بویون اولور:
گؤزلریم ائشیتمیر، قولاغیم گؤرمور
دیمیش بیربیرینه ایت آشی کیمی
دردیمی‌هئچ داراق دارامیر هؤرمور
یییه سیز اؤلویم باش داشی کیمی
شاعیرین دئیه بیلمه‌دیکلرینین دئیه بیلدیکلرینه بوراخدیغی ایزلر، بیر جیناسین آراجیلیغی ایله دردی لذته قاتیر:
آشیق‌لار قفه سینده
سوسوبلار سازلار
قوش‌لار قفه‌سینده
بولبول‌لر کیمی.
بو قیسا شعردن آذربایجان میللتینین قفسده کی سوسموشلوغونو، دیلسیزلییینی آنلامایان کیم دیر؟
شاعیر هیجایی شعرلرینده ده مودئرن فضالار یاراتماقدا اوغور قازانیر. بیر طنز شعرینده مئساژلار تلگرامدا اپریییر، دویغولار ریپورت اولور، گؤزلر موبایل کیمی‌سؤندورولور، موبایل‌لار آدام کیمی‌باسدیریلیر و اورک آلما تک سویولور:
بایاقلاری سن یوخ ایدین قوی دئییم
الینده کی اوره‌ییمی‌سوی دئییم
من اؤلموشم گل بو دردی اوی دئییم
گؤر‌هاچاندی تلگراما گلمیرم
نه اولسون کی سن اولماسان نئینیرم.
طبیعتین هر شئیینی بیربیریله ایچ ایچه گؤرن بیر شاعیرین شعرینده، بوتون عونصورلارین تانیش خصیصه‌لرینین باشقا عونصورلارا نسبت وئریلمه‌سی ائستئتیک فضالار، دویارلی تصویرلر و چکیجی ترکیب‌لرین یارانماسی ایله سونوجلانابیلیر.
کیتابا آذربایجانین تانینمیش هونر آدامی‌سایین «آتابای»ین جیلد و صفحه طراحلیغی باشقا بیر گؤزه للیک باغیشلاییب.
«شهره قان دوشه‌جک» شاعیرینین کیتابینی بوتون شعر سئورلر اوخومالی‌دیرلار منجه.

*لوش: خییوو دا بو کلمه “یوموشاق، شُل” آنلامیندا ایشله نیر.