اوستاد کریم مشروطه‌چی(سؤنمز) عزیزلندی

گؤرکملی آذربایجان شاعری اوستاد کریم مشروطه‌چی(سؤنمز) آبان آیی‌نین ۱۰نجی گونو تبریز ادبی- مدنی جمعیتی طرفیندن عزیزلندی.
«گونش خانیم امانی»‌نین آپاریجیلیغی ایله کئچیریلن بو موسیقیلی و سؤزلو تدبیر «ائل بیلیمی» موسسه‌سی‌ طرفیندن و «ائوده آل» سایتی‌نین امکداشلیغی ایله قورولموش و تدبیرده بیر چوخ تانینمیش آذربایجان شاعر، یازیچی و اجتماعی مدنی شخصیتلری اشتراک ائتمیشدیر.
اوستاد سؤنمزین حیات و یارادیجیلیغی و اجتماعی مدنی شخصیتی حقینده مجلیس اشتراکچیلاریندان دکتر حریری، رحیم رئیس‌نیا، علیرضا صرافی، محمدعلی نقابی و دکتر شربیانلو چیخیش ائتمیش و آذربایجان شاعرلریندن «محمدعلی نهاوندی(مغان)»، «حسن مجیدزاده(ساوالان)»، «عزیزپور» و «حاجی هریزلی» اؤز شعرلرینی اوخوموشدولار.
تهراندان جناب «دکتر حسین صدیق دوزگون» طرفیندن مجلیسه گؤندریلن تبریک یازیسی «ائل بیلیمی» موسسه‌سی‌نین قادین‌لار قولونون مسئولو «سوسن خانیم نواده رضی» واسطه‌سیله اوخونموش و جناب «علی مرادی» طرفیندن اوستاد سؤنمزه مخصوص حاضیرلانمیش تیزر ده گؤستریلمیشدیر.
مراسیمده «ائل بیلیمی» موسسه‌سی، «موسسه‌نین قادین‌لار قولو»، «خانم اسلامی» و «جناب نخجوانی» طرفیندن اوستاد سؤنمزه خصوصی هدیه‌لر تقدیم ائدیلمیشدیر.
بو مراسیمده اوستاد سؤنمزین شخصی کیتابخاناسی، بوتون الیازمالاری، ادبی مدنی شخصیتلرله قارشیلیقلی مکتوبلاشما سندلری و آرشیوینده اولان باشقا سندلرین «ائل بیلیمی» موسسه‌سینه باغیشلانماسی اعلان ائدیلدی.
تدبیرده واختیله رحمتلیک «حسن آذربایجان»ین یاراتدیغی موسیقی گروهونون و کیچیک یاشلی خواننده «امیر رضا خداوردی پور»(آلتای)ین ایفالاری مجلیس اشتراکچیلاری طرفیندن طنطنه ایله قارشیلاندی.