«هوشنگ آذراوغلو» وفات ائتدی

یاییلمیش خبرلر اساسیندا، خرداد آیی‌نین ۲۸نجی گونو تانینمیش آذربایجان خواننده‌سی «هوشنگ اوج بلاغی»(آذراوغلو) وفات ائتمیشدیر. تبریزلی بیر عائله ده ۱۳۱۷نجی ایل انزلی شهرینده دونیایا گؤز آچان هوشنگ آذراوغلو خواننده‌لیک صنعتینده داها آرتیق «سیزه سلام گتیرمیشم» ماهنیسی ایله شؤهرت قازانمیشدیر. بو صنعتکار گنجلیک دؤرونده گولش اوزره ملی کاماندانین عضوی اولموش و ملی و بین‌الخلق یاریشلاردا اوغورلار الده ائده بیلمیشدیر. سونرالار بیر آرتیست کیمی‌ده بیر نئچه فیلملرده چکیلمیشدیر.
هوشنگ آذراوغلو خواننده‌لیک صنعتینی آذربایجانین گؤرکملی صنعتکاری «مصطفی پایان»دان اؤیره‌نیر؛ انقلابدان سونرا تورکیه‌یه گئدیر و ۱۹۸۵نجی ایل اؤز خواننده‌لیک صنعتی اعتباریله تورکیه جمهور باشچیسی «تورقوت اوزال» طرفیندن قیزیل کپنک مکافاتی آلیر.
گؤرکملی صنعتکار آذربایجان موسیقیسی‌نین تبلیغی یولوندا بیر چوخ اؤلکه‌لرده او جمله‌دن: کانادا، انگلیس، فرانسه، آمریکا، ترکیه، بلاروس، تورکیه و … کنسرتلر وئریر و آذربایجان جمهوریسینده تانینمیش صنعتکارلار زینب خانلاراوا، ذاکرممد‌اوا، آقاخان عبداله‌یو و رامیز ‌قلی‌یئو کیمی‌صنعتکارلارلا مشترک چیخیشلاری اولور.
«ایشیق» – آذربایجان ادبیات و اینجه صنعت سایتی آدیندان آذربایجان موسیقی صنعتی‌نین گؤرکملی خادمی‌خواننده «هوشنگ اوج بلاغی»(آذراوغلو)نون ایتگیسینی آذربایجان خالقینا، سئونلرینه و حؤرمتلی عائله‌سینه باش ساغلیغی دئییر و صنعتکارین شرفلی خاطره‌سینی عزیزله‌ییریک.

«ایشیق» – آذربایجان ادبیات و اینجه صنعت سایتی
۲۹/۰۳/۱۳۹۸